ዮሃኒሳ 10:16-29 in Gamo

¹⁶ ሃይሳ ሃ ዶርሳ ዪሬን ጌሎንታይቲ ታስ ሃራ ዶርሳቲ ዴቴስ፤ ታ ኢስታካ ሃ ኤሃናስ ታስ ቤሴስ። ኢስቲካ ታ ቃላ ሲያናኔ ኢሲ ሜሄ ጊዳና። ሄሚዛይሲካ ኢሳዴ ጊዳና።

¹⁷ ታ ዛራዳ ዴንꬃናስ ታ ሼምፖ ታ ኣꬃ ኢሚዛ ጊሽ ታ ኣዋይ ታና ዶሴስ።

¹⁸ ታኒ ታ ሼምፖ ታ ዶሳራ ኣꬃ ኢማዲስ ኣቲን ኦኒካ ታፔ ዎꬂ ኤኬና፤ ታ ኣꬃ ኢማናስ ጊዲን ዎይኮ ዛራ ዴንꬃናስ ጊዲን ሼኔይ ታሳ፤ ሄሳ ሄ ኣዛዞዛ ታኒ ታ ኣዋፔ ኤካዲስ” ጊዴስ።

¹⁹ ሄሳ ሄ ቃላፔ ዴንዲዳይሳን ኣይሁዳታ ጊዶን ቃሴካ ሻኬቴꬂ ሜꬌቲዴስ።

²⁰ ዳሮ ኣሳይ “ኢዛ ቦላ ዳይዳንꬂ ዲዛ ጊሺኔ ጎሽ ጊዲዳ ጊሽ ኢንቴ ኢዚ ጊዛይሳ ኣይስ ሲዬቲ? ጊዳ።

²¹ ባጋይቲ ቃሴ “ዳይዳንꬂ ዲዛዴይ ሃይሳ ማላ ዴና። ዳይዳንꬂ ቆቂዳ ኣይፌ ፓꬂ ኤሪዜ?” ጊዳ።

²² ዬሩሳላሜን ፆሳ ኬꬃ ኦራꬆ ባዓሌ ቦንቾ ዎዴይ ጋኪዴስ፤ ሄ ዎዴይካ ባልጎ።

²³ ዬሱሲ ፆሳ ኬꬃ ጊቤ ጊዶን ሶሎሞኔ ሲሜሬቴꬃሶራ ኣꬊሺን፥

²⁴ ኣይሁዳቲ ኢዛ ጊዶ ኣꬂዲ “ኔ ኣይዴ ጋካናስ ኑ ዎዝና ሂርጋን ጋምዒሳኔ? ኔ ፆሲ ኪቲዳዴ ጊዲኮ ኑስ ቆንጪሳ ዮታ” ጊዳ።

²⁵ ዬሱሲካ ኢስታስ “ታ ኢንቴስ ዮታዲስኮ ሺን ኢንቴ ቃሴ ኣማኒቤይኬታ። ታ ኣዋ ሱንꬃን ታ ኦꬂዛ ማላታቲ ታ ጊሽ ዮቴቴስ።

²⁶ ኢንቴ ቃሴ ታ ዶርሳታ ጊዶንታ ጊሽ ታና ኣማኔኬታ።

²⁷ ታ ዶርሳቲ ታ ቃላ ሲዬቴስ። ታካ ኢስታ ኤራይስ፤ ኢስቲካ ታና ካሌቴስ።

²⁸ ታ ኢስታስ ሜርና ዴዖ ኢማና፤ ሙሌካ ኢስታ ꬋዬቴና፤ ኢስታ ታ ኩሼፔ ዎꬂ ኤካናስ ዳንዳያናዴይ ኦኒካ ዴና።

²⁹ ታስ ኢስታ ኢሚዳ ታ ኣዋይ ኡባፌ ኣꬌስ። ታ ኣዋ ኩሼፔ ኢስታ ኦኒካ ቦንቃናስ ዳንዳዬና።

¹⁶ Hayssa ha dorsa yiren gelontayti taas hara dorsati deettes; ta istaka haa ehanas taas bessees. Istika ta qaala siyananne issi mehe gidana. Heemmizayssika issade gidana.

¹⁷ Ta zaarada denthanas ta shempo ta aaththa immiza gish ta Aaway tana dosees.

¹⁸ Tani ta shempo ta dosara aaththa immadis attin oonikka taappe woththi ekkenna; ta aaththa immanas gidin woykko zaara denthanas gidin sheney taassa; hessa he azazoza tani ta Aawappe ekkadis” gides.

¹⁹ Hessa he qaalappe dendidayssan Ayhudata giddon qasseka shaaketethi medhetides.

²⁰ Daro asay “Iza bolla daydanthi diza gishshinne goosh gidida gish inte izi gizayssa ays siyeetii?” gida.

²¹ Baggayti qasse “Daydanthi dizaddey hayssa mala deenna. Daydanthi qooqida ayfe pathi erizee?” gida.

²² Yerusalamen Xoossa Keeththa ooratho ba7aale boncho wodey gakkides; he wodeykka balgo.

²³ Yesusi Xoossa Keeththa gibbe giddon Solomoone simeretethasora aadhdhishin,

²⁴ Ayhudati iza giddo aaththidi “Ne ayde gakkanaas nu wozna hirgan gam7isanee? Ne Xoossi kiittidade gidikko nuus qoncisa yoota” gida.

²⁵ Yesusikka istas “Ta intes yootadisko shin inte qasse ammanibeyketa. Ta Aawa sunthan ta ooththiza malatati ta gish yootetes.

²⁶ Inte qasse ta dorsata gidonta gish tana ammanekketa.

²⁷ Ta dorsati ta qaala siyeetes. Takka ista erays; istika tana kaallettes.

²⁸ Ta istas merna de7o immana; mulekka ista dhayetenna; ista ta kusheppe woththi ekkanas dandayanaddey oonikka deenna.

²⁹ Taas ista immida ta Aaway ubbafe aadhdhees. Ta Aawa kusheppe ista oonikka bonqanas dandayenna.