Yohanis 1:14-25

¹⁴Boe ma, ‘Lamatuak Dedeꞌa-kokolan’ ndia, nana bonggik dadik neu Hataholi. Ana nasoda nai ita lalada nala. Ita tita Ndia koasa inahuun. Ndia koasa inahuun leondiak, huu Ndia ndia, Manetualain Ana Mane Kisan. Ana nahiik natudu Ndia dale malolen neu ita, huu Ndia hada-tataon memak leondiak. Ma basa hata fo Ana nafada laꞌeneu Manetualain, memak tetebes leondiak.

¹⁵Yohanis ndia, nafada dedeꞌak laꞌeneu Hataholi ia. Ana nanggou nae, “Mamanene bou! Ndia ia, fo au tuik so ae, ‘Dei fo Hataholi esa sangga mai. Ndia koasan lena heni au. Huu bei ta bonggi au, naa te Ana mana memak nakahuluk so!’ ”

¹⁶Yohanis kokolak leondiak, huu Hataholi ndia nahiik nalan seli natudu Ndia dale malolen. Ma Ana tao leondiak nakandondoo henin neu ita basa nggata.

¹⁷Lele uluk ele, baꞌi Musa ndia nakonda Lamatuak Heti-heun neu ita bei-baꞌi nala. Tehuu hatematak ia, Hataholi ndia, na ndia, Yesus Karistus, fo natudu Lamatuak dale malolen neu ita. Ma basa hata fo Ana nafada laꞌeneu Manetualain, memak tetebes.

¹⁸Taa hambu nitak hataholi esa boe fo nita tebe-tebe Manetualain. Tehuu Ndia Ana Mane Kisan, fo Ana suek ndia, natudu ita Manetualain dalen. Kakanak ndia, nai Ndia Aman boboan. Huu Ndia boe oo Manetualain.

¹⁹Laꞌi esa, hataholi Yahudi la malangga nala malai Yerusalem ladenu malangga anggama hida, ma hataholi leo Lewi luma fo lateme laono-lau lai Uma Ina Huhule-haladoik. Ala leni lee Yarden selik leu, fo latane Yohanis Mana Salanik lae, “O ia, Karistus fo Lamatuak heluk so, fo sangga haituan mai, do?” Basa boe ma ana nafada sala nae, ndia ndia, see.

²⁰Ana manaku manggaledok nae, “Taa. Au ia taa Karistus.”

²¹Boe ma latane bali lae, “Mete ma leondiak, na, o ia see? Baꞌi Elia, do?” Ana nataa nae, “Taa boe.” Boe ma latane bali, lae, “Naafo o ia, Lamatuak mana kokolan feꞌek esa do?” Ana nataa nae, “Taa boe.”

²²Basa ndia, boe ma ala latane bali lae, “Mete ma leondiak na, o ia see? Mafada ai dei! Huu ai musi fali fo mafada malangga nala mana madenu ai. Tulun dei!”

²³Boe ma ana kokolak tungga hata fo baꞌi Yesaya sulak nitak nae, “Au ia, ndia hataholi mana manggouk nai mamana nees nae, ‘Basa hataholi mahehele tao neulalau dala kala, fo simbok Lamatuak mamain! Tao matetu dalak fo soluk Ndia.’ ”

²⁴Nai hataholi maleme Yerusalem mai lalada nala, hambu hataholi hida leme partei anggama Farisi mai.

²⁵Boe ma latane Yohanis lae, “Leoiak. Mete ma o taa ndia Karistus, taa baꞌi Elia, ma taa Lamatuak mana kokolan esa, na, hatina de o salani hataholi? O hambu haak neme bee mai?”