Yohanes 15:7-17

⁷Ma efu un e tan ini Mi, èn efu un tan du san Mi taigi unu, dan un kan aksi san un wani, èn un sa kisi en.

⁸Mi P'pa sa kisi glori efu un e gi furu nyanyan, bika dati o sori tak' unu na sma fu Mi.

⁹Leki fa a P'pa lobi Mi, na so Mi ben lobi unu tu. Tan ini a lobi fu Mi!

¹⁰Efu un e du san Mi komanderi un fu du, dan un o tan ini a lobi fu Mi, leki fa Mi e tan ini a lobi fu Mi P'pa, fu di Mi hori Misrefi na den komanderi fu En.

¹¹Mi taigi un den sani disi fu un kan abi a srefi prisiri san Mi abi, èn fu un prisiri fu tru.”

¹²“Na disi Mi e komanderi unu: Un mus lobi makandra leki fa Mi ben lobi unu.

¹³A moro bigi lobi san wan sma kan abi, na fu gi en libi abra gi den mati fu en.

¹⁴Unu na Mi mati, efu un e du san Mi e komanderi unu.

¹⁵Mi no e kari un knekti moro, bika wan knekti no sabi san en masra e du. Ma Mi kari unu mati, bika Mi taigi unu ala sani san Mi P'pa taigi Mi.

¹⁶A no un ben teki Mi, ma na Mi teki unu. Mi poti unu fu un go èn fu un gi furu nyanyan san e tan. Dan Mi P'pa sa gi unu ala sani san un aksi En ini Mi nen.

¹⁷Na disi Mi e komanderi unu: Un mus lobi makandra.”