ዮሃኒሳ 8:19-57 in Gofa

¹⁹ ኤንቲ፥ «ኔ ኣዋይ ኣዉን ዴዒ?» ያጊዲ ኢያ ኦይቺዶሶና። ዬሱሲ ዛሪዲ፥ «ሂንቴ ታና ዎይኮ ታ ኣዋ ኤሬኬታ። ታና ኤሪዳባ ጊዲያኮ፥ ሂንቴ ታ ኣዋካ ኤራናሺን» ያጊስ።

²⁰ ዬሱሲ ፆሳ ኬꬃን ሙፃታ ሚሺያ ዬጊያ ሳፂኔይ ዴዒያ ቤሳን ሄሳ ታማርሲስ። ኢያ ቃማይ ቡሮ ጋኪቦና ጊሾ ኦኒካ ኢያ ኦይኪቤና።

²¹ ቃሲካ ዬሱሲ ኤንታኮ፥ «ታኒ ባና፤ ሂንቴ ታና ኮያና፥ ሺን ሂንቴ ኣቶቴꬂ ዴሞና ሂንቴ ናጋራን ሃይቃና። ታኒ ቢያሱዋ ባናው ሂንቴ ዳንዳዔኬታ» ያጊስ።

²² ኣይሁዴ ሃላቃቲ፥ «ኢ፥ ‹ታኒ ቢያሱዋ ሂንቴ ባናው ዳንዳዔኬታ› ያጌስ። ኢ ባና ባርካ ዎꬋኔዬ?» ያጊዶሶና።

²³ ዬሱሲ ዛሪዲ፥ «ሂንቴ ጋርሳፌ፤ ታኒ ቦላፌ። ሂንቴ ሃ ኣላሚያፔ፥ ታኒ ሃ ኣላሚያፔ ጊዲኬ።

²⁴ ሂንቴ ኣቶቴꬂ ዴሞና ሂንቴ ናጋራን ሃይቃና ጋዳ ታኒ ሂንቴው ኦዲዳይ ሄሳሳ። ታኒ ታና ጊዴይሳ ሂንቴ ኣማኖና ኢፂኮ ሂንቴ ኣቶቴꬂ ዴሞና ሂንቴ ናጋራን ሃይቃና» ያጊስ።

²⁵ ኤንቲ፥ «ኔኒ ኦኔ?» ያጊዲ ኦይቺዶሶና። ዬሱሲ ዛሪዲ፥ «ታኒ፥ ኮይሮፔ ሂንቴው ኦዲዳ ታና።

²⁶ ታኒ ሂንቴባ ኦዳዳ ፒርዲያባይ ዳሮባይ ዴዔስ። ሺን ታና ኪቲዳይሲ ቱማንቾ፤ ቃሲ ታኒ ኢያፔ ሲዒዳይሳ ፃላላ ኣላሚያስ ኦዳይስ» ያጊስ።

²⁷ ዬሱሲ ባ ኣዋባ ኦዴይሳ ኤንቲ ኣኬኪቦኮና።

²⁸ ሄሳ ጊሾ፥ ዬሱሲ ኤንታኮ፥ «ሂንቴ ኣሳ ናዓ ፑዴ ꬎቁ ኦꬂያ ዎዴ ታኒ ታና ጊዴይሳ ሂንቴ ኤራና። ቃሲካ ታኒ ታ ማታን ኣይኮካ ኦꬆናይሳኔ ታ ኣዋይ ታና ታማርሲዳይሳ ኦዴይሳ ሂንቴ ኤራና።

²⁹ ታና ኪቲዳይሲ ታራ ዴዔስ። ታኒ ኡባ ዎዴ ኢያ ኡፋይሲያባ ኦꬂያ ጊሾ ኢ ታና ታ ፃላላ ኣጊቤና» ያጊስ።

³⁰ ዬሱሲ ሄሳ ኦዲሺን ሲዒዳ ዳሮ ኣሳይ ኢያ ኣማኒዶሶና።

³¹ ዬሱሲ ባና ኣማኒዳ ኣሳታኮ፥ «ሂንቴ ታ ቲሚርቲያስ ኪቴቲኮ ቱማ ታና ካሌይሳታ።

³² ሂንቴ ቱማ ኤራና፤ ቱማይካ ሂንቴና ኣይሌቴꬃፌ ኬሳና» ያጊስ።

³³ ኤንቲ ዛሪዲ፥ «ኑኒ ኣብራሃሜ ሼሺ፤ ኑኒ ኦዴስካ ኣይሌቲቦኮ። ኔኒ ዎይጋዳ፥ ‹ሂንቴ ኣይሌቴꬃፌ ኬያና› ጋይ?» ያጊዶሶና።

³⁴ ዬሱሲ ዛሪዲ፥ «ታኒ ሂንቴው ቱማ ኦዳይስ፤ ናጋራ ኦꬂያ ኦኒካ ናጋራ ኣይሌ።

³⁵ ኣይሌይ ሜሪናው ሶ ኣሳራ ዴና፥ ሺን ናዓይ ሜሪናው ሶ ኣሳራ ዴዔስ።

³⁶ ናዓይ ሂንቴና ኣይሌቴꬃፌ ኬሲኮ ሂንቴ ኣይሌቴꬃፌ ቱማ ኬያና።

³⁷ ሂንቴ ኣብራሃሜ ሼሺ ጊዴይሳ ታኒ ኤራይስ። ሺን ታ ቃላይ ሂንቴ ዎዛናን ባይና ጊሾ ታና ዎꬋናው ኮዬታ።

³⁸ ታኒ ታ ኣዋይ ታና ቤሲዳይሳ ኦዳይስ፥ ሺን ሂንቴካ ሂንቴ ኣዋፔ ሲዒዳይሳ ኦꬄታ» ያጊስ።

³⁹ ኤንቲ ዛሪዲ፥ «ኑ ኣዋይ ኣብራሃሜ» ያጊዶሶና። ዬሱሲ ኤንታኮ፥ «ሂንቴ ኣብራሃሜ ናይታ ጊዲያኮ ኢ ኦꬂዳይሳ ኦꬃና።

⁴⁰ ሺን ፆሳፌ ሲዒዳ ቱማ ኦዲዳ ታና ሂንቴ ዎꬋናው ኮዬታ። ኣብራሃሜይ ሄሳዳ ኦꬂቤና።

⁴¹ ሂንቴ፥ ሂንቴ ኣዋይ ኦꬂዳይሳ ኦꬄታ» ያጊስ። ኤንቲ ዛሪዲ፥ «ኑኒ ቱማ ፆሳ ናይታ፤ ኑስ ኢሲ ኣዋይ ፆሳ ፃላሊ ዴዔስ» ያጊዶሶና።

⁴² ዬሱሲ ኤንታኮ፥ «ፆሳይ ቱማ ሂንቴ ኣዋ ጊዲያኮ ሂንቴ ታና ዶሳና፤ ኣይስ ጊኮ፥ ታኒ ፆሳ ማታፔ ያዳ ሃይሳን ዴዓይስ። ታና ኢ ኪቲስፔ ኣቲን ታኒ ታ ማታን ያቢኬ።

⁴³ ታኒ ጌይሳ ሂንቴ ሲዓናው ኮዮና ጊሾ ታ ጊያባይ ሂንቴው ጌሌና።

⁴⁴ ሂንቴ፥ ሂንቴ ኣዋ ፃላሄ ናይታ። ቃሲ ሂንቴ፥ ሂንቴ ኣዋይ ኣሞቲያባ ኦꬃናው ኮዬታ። ኢ ኮይሮፔ ዶሚዲ ሼምፖ ዎꬌይሳ። ቱሚ ኢያን ባይና ጊሾ ኢ ቱማ ኢፄስ። ዎርዶይ ኢያው ሜꬎ ጊዲዳ ጊሾኔ ኢ ዎርዶ ኣዋ ጊዲያ ጊሾ ዎርዶ ኦዴቲሼ ባፔ ኦዴቴስ።

⁴⁵ ታኒ ቱማ ሃሳያይስ፥ ሺን ሂንቴ ታና ኣማኔኬታ።

⁴⁶ ሂንቴፌ፥ ‹ኔኒ ናጋራ ኦꬂሺን ታ ቤዓስ› ጋናው ዳንዳዔይ ኦኔ? ታኒ ቱማ ኦዴቲያባ ጊዲኮ ታና ኣይስ ኣማኔኬቲ?

⁴⁷ ፆሳ ኣሲ ፆሳይ ጊያባ ሲዔስ። ሂንቴ ፆሳ ኣሲ ጊዶና ጊሾ ፆሳይ ጊያባ ሲዔኬታ» ያጊስ።

⁴⁸ ኣይሁዴቲ ዛሪዲ፥ « ‹ኔኒ ሳማሬ ኣሲ፤ ኔናን ቱና ኣያናይ ዴዔስ› ጊሼ ሊኬ ጊዶኮ?» ያጊዶሶና።

⁴⁹ ዬሱሲ ኤንታኮ «ታ ቦላ ቱና ኣያኒ ባዋ። ታኒ ታ ኣዋ ቦንቻይስ፥ ሺን ሂንቴ ታና ካዉሼታ።

⁵⁰ ታኒ ታ ሁዔ ቦንቾ ኮዪኬ፤ ታኒ ቦንቼታና ሜላ ኮዬይሲኔ ታው ፒርዴይሲ ዴዔስ።

⁵¹ ታኒ ሂንቴው ቱማ ኦዳይስ፤ ታ ቃላ ናጊያ ኦኒካ ሃይቄና» ያጊስ።

⁵² ኣይሁዴቲ ዛሪዲ፥ «ኔ ቦላ ቱና ኣያናይ ዴዔይሳ ኑኒ ሃዒ ኤሪዳ። ኣብራሃሜይ ሃይቂስ፤ ናቤቲካ ሃይቂዶሶና። ሺን ኔኒ፥ ‹ታ ቃላ ናጊያ ኦኒካ ሃይቄና› ያጋሳ።

⁵³ ኔኒ ሃይቂዳ ኑ ኣዋ ኣብራሃሜፔ ኣꬋዬ? ናቤቲካ ቃሲ ሃይቂዶሶና። ኔኒ ኔና ኦና ጋዳ ቆፓይ?» ያጊዶሶና።

⁵⁴ ዬሱሲ፥ «ታኒ ታና ቦንቺኮ ታ ቦንቾይ ሃዳ። ሂንቴ፥ ‹ኑ ፆሳ› ጊያ ታ ኣዋይ ኢ ታና ቦንቼስ።

⁵⁵ ሂንቴ ኢያ ኤሮና ኢፂኮ ታኒ ኢያ ኤራይስ። ታኒ ኢያ ኤሪኬ ጊኮ ሂንቴ ሜላ ዎርዶታይስ። ሺን ታኒ ኢያ ኤራይስ፤ ቃሲ ኢያ ቃላካ ናጋይስ።

⁵⁶ ሂንቴ ኣዋይ ኣብራሃሜይ ታ ዩሳ ጋላሳ ቤዒዲ ኡፋይታናው ኣሞቲስ፤ ቤዒዲካ ኡፋይቲስ» ያጊስ።

⁵⁷ ኣይሁዴቲ ዛሪዲ፥ «ሃሪ ኣቶሺን፥ ኔው ኢሻታሙ ላይꬂ ኩሚቤናሺን ዋናዳ ኣብራሃሜ ቤዓስ ጋይ?» ያጊዶሶና።

¹⁹ Entti, “Ne aaway awun de7ii?” yaagidi iya oychchidosona. Yesuusi zaaridi, “Hintte tana woykko ta Aawa erekketa. Tana eridabaa gidiyakko, hintte ta Aawakka eranashin” yaagis.

²⁰ Yesuusi Xoossa Keethan muxaata miishiya yeggiya saaxiney de7iya bessan hessa tamaarssis. Iya qammay buroo gakkiboonna gisho oonikka iya oykkibeenna.

²¹ Qassika Yesuusi enttako, “Taani baana; hintte tana koyana, shin hintte atotethi demmonna hintte nagaran hayqqana. Taani biyasuwa baanaw hintte dandda7ekketa” yaagis.

²² Ayhude halaqati, “I, ‘Taani biyasuwa hintte baanaw dandda7ekketa’ yaagees. I bana barkka wodhaneyye?” yaagidosona.

²³ Yesuusi zaaridi, “Hintte garssafe; taani bollafe. Hintte ha alamiyappe, taani ha alamiyappe gidikke.

²⁴ Hintte atotethi demmonna hintte nagaran hayqqana gada taani hinttew odiday hessassa. Taani Tana Gideyssa hintte ammanonna ixxiko hintte atotethi demmonna hintte nagaran hayqqana” yaagis.

²⁵ Entti, “Neeni oonee?” yaagidi oychchidosona. Yesuusi zaaridi, “Taani, koyroppe hinttew odida tana.

²⁶ Taani hinttebaa odada pirddiyabay darobay de7ees. Shin tana kiittidayssi tumanchcho; qassi taani iyappe si7idayssa xalaala alamiyas odays” yaagis.

²⁷ Yesuusi ba Aawabaa odeyssa entti akeekibookkona.

²⁸ Hessa gisho, Yesuusi enttako, “Hintte Asa Na7aa pude dhoqqu oothiya wode Taani Tana Gideyysa hintte erana. Qassika taani ta maatan aykkoka oothonayssanne ta Aaway tana tamaarssidayssa odeyssa hintte erana.

²⁹ Tana kiittidayssi taara de7ees. Taani ubba wode iya ufayssiyabaa oothiya gisho I tana ta xalaala aggibeenna” yaagis.

³⁰ Yesuusi hessa odishin si7ida daro asay iya ammanidosona.

³¹ Yesuusi bana ammanida asatakko, “Hintte ta timirttiyas kiitettiko tuma tana kaalleyssata.

³² Hintte tumaa erana; tumaykka hinttena aylletethafe kessana” yaagis.

³³ Entti zaaridi, “Nuuni Abrahame sheeshi; nuuni ooddeskka aylletibookko. Neeni woygada, ‘Hintte aylletethafe keyana’ gay?” yaagidosona.

³⁴ Yesuusi zaaridi, “Taani hinttew tuma odays; nagara oothiya oonikka nagara aylle.

³⁵ Aylley merinaw soo asaara deenna, shin na7ay merinaw soo asaara de7ees.

³⁶ Na7ay hinttena aylletethafe kessiko hintte aylletethafe tuma keyana.

³⁷ Hintte Abrahame sheeshi gideyssa taani erays. Shin ta qaalay hintte wozanan baynna gisho tana wodhanaw koyeeta.

³⁸ Taani ta Aaway tana bessidayssa odays, shin hintteka hintte aawappe si7idayssa ootheeta” yaagis.

³⁹ Entti zaaridi, “Nu aaway Abrahame” yaagidosona. Yesuusi enttako, “Hintte Abrahame nayta gidiyakko I oothidayssa oothana.

⁴⁰ Shin Xoossafe si7ida tumaa odida tana hintte wodhanaw koyeeta. Abrahamey hessada oothibeenna.

⁴¹ Hinttee, hintte aaway oothidayssa ootheeta” yaagis. Entti zaaridi, “Nuuni tuma Xoossaa nayta; nuus issi Aaway Xoossaa xalaali de7ees” yaagidosona.

⁴² Yesuusi enttako, “Xoossay tuma hintte aawa gidiyakko hintte tana dosana; ays giikko, taani Xoossaa matappe yada hayssan de7ays. Tana I kiittisppe attin taani ta maatan yabiikke.

⁴³ Taani geyssa hintte si7anaw koyonna gisho ta giyabay hinttew gelenna.

⁴⁴ Hinttee, hintte aawa Xalahe nayta. Qassi hinttee, hintte aaway amottiyabaa oothanaw koyeeta. I koyroppe doomidi shemppo wodheyssa. Tumi iyan baynna gisho I tumaa ixxees. Worddoy iyaw medho gidida gishonne I worddo aawa gidiya gisho worddo odettishe baappe odettees.

⁴⁵ Taani tuma haasayays, shin hintte tana ammanekketa.

⁴⁶ Hinttefe, ‘Neeni nagara oothishin ta be7as’ gaanaw dandda7ey oonee? Taani tuma odettiyabaa gidikko tana ays ammanekketii?

⁴⁷ Xoossaa asi Xoossay giyabaa si7ees. Hintte Xoossaa asi gidonna gisho Xoossay giyabaa si7ekketa” yaagis.

⁴⁸ Ayhudeti zaaridi, “ ‘Neeni Samaare asi; nenan tuna ayyaanay de7ees’ gishe likke gidokko?” yaagidosona.

⁴⁹ Yesuusi enttako “Ta bolla tuna ayyaani baawa. Taani ta Aawa bonchchays, shin hintte tana kawushsheta.

⁵⁰ Taani ta huu7e bonchcho koyikke; taani bonchchettana mela koyeysinne taw pirddeyssi de7ees.

⁵¹ Taani hinttew tuma odays; ta qaala naagiya oonikka hayqqenna” yaagis.

⁵² Ayhudeti zaaridi, “Ne bolla tuna ayyaanay de7eyssa nuuni ha77i erida. Abrahamey hayqqis; nabetikka hayqqidosona. Shin neeni, ‘Ta qaalaa naagiya oonikka hayqqenna’ yaagasa.

⁵³ Neeni hayqqida nu aawa Abrahameppe aadhdhayye? Nabetikka qassi hayqqidosona. Neeni nena oona gada qoppay?” yaagidosona.

⁵⁴ Yesuusi, “Taani tana bonchchiko ta bonchchoy hada. Hintte, ‘Nu Xoossaa’ giya ta Aaway I tana bonchchees.

⁵⁵ Hintte iya eronna ixxiko taani iya erays. Taani iya erikke giikko hintte mela worddotays. Shin taani iya erays; qassi iya qaalaakka naagays.

⁵⁶ Hintte aaway Abrahamey ta yuussaa gallasa be7idi ufayttanaw amottis; be7idikka ufayttis” yaagis.

⁵⁷ Ayhudeti zaaridi, “Hari attoshin, new ishatamu laythi kumibeennashin waanada Abrahame be7as gay?” yaagidosona.