ዮሃኒሳ 7:14-52 in Dawro

¹⁴ ባላ ቦንቺያ ጋላሳ ባጋን፥ ዬሱሲ ጌሻ ጎሊያ ቢዴ፥ ታማሪሱዋ ዶሜዳ።

¹⁵ ኣዪሁዳቱ ማላሌሌቲዴ፥ «ሃ ቢታኒ ኣይኔ ታማሬናን ሃዋ ኬና ዋኒ ኤሬዴ?» ያጌዲኖ።

¹⁶ ሄዋ ዲራው፥ ዬሱሲ ዛሪዴ፥ «ታና ታማሪሲያዌ ታና ኪቴዳ ፆሳ ማታፔ ዪያዋፔ ኣቲን፥ ታዋ ጊዴና።

¹⁷ ፆሳ ሼኒያ ኦꬃናው ዶሲያ ኦኒኔ ሃ ታኒ ታማሪሲያዌ ፆሳ ማታፔ ዪንቶ ዎይ ቃሲ ታኒ ታፔ ሃሳያዪታንቶ ኤራና።

¹⁸ ባሬዋ ሃሳዪያ ኡራይ ባሬ ሁጲያሲ ቦንቹዋ ኮዬ፤ ሺን ባሬና ኪቴዳዌ ቦንቼታና ማላ ኮዪያ ኡራይ ቱማንቻ፤ ኣኒ ዎርዶባይ ባዋ።

¹⁹ ሙሴ ሂንቴንቱሲ ሂጊያ ኢሚቤኔ? ሺን ሂንቴፔ ኢቱኔ ሂጊያ ናጌና። ታና ኣዪሲ ዎꬋናው ኮዪቴ?» ያጌዳ።

²⁰ ኣሳይ ዛሪዴ፥ «ኔናን ፃላሂ ዴዔ፤ ኔና ዎꬋናው ኦኔ ኮዬዳዌ?» ያጌዳ።

²¹ ዬሱሲ፥ «ታኒ ኢቲ ዎልቃማባ ኦꬂና፥ ሂንቴንቱ ኡባይ ማላሌቴዲታ።

²² ሂንቴንቱ ናና ሂንቴንቱ ዶካላና ማላ፥ ሙሴ ሂንቴንታ ኣዛዜዳ። ሺን ዶካሉሳይ ሂንቴንቱ ኣዋቱዋና ዬዳዋፔ ኣቲን፥ ሙሴና ዪቤና፤ ሄዋሲ ሂንቴንቱ ሳምባታን ኣቱማ ናና ዶካሊታ።

²³ ሙሴ ሂጊ ኣዛዜዳ ዲራው፥ ሂንቴንቱ ሳምባታን ዶካሊያዋ ጊዶፔ፥ ያቲና ታኒ ኢቲ ኣሳው ኩሜንꬃ ቦላ ፓꬄዳ ዲራው፥ ታና ኣዪሲ ሃንቄቲቴ?

²⁴ ቱሙ ፒርዳ ፒርዲቴፔ ኣቲን፥ ኣሳ ዴሙዋ ፄሊዴ ፒርዶፒቴ» ያጌዳ።

²⁵ ሄዋ ዲራው፥ ዬሩሳላሜ ኣሳፔ ኢቱ ኢቱ፥ «ኡንቱንቱ ዎꬋናው ኮዪያ ቢታኒ ሃዋ ጊዴኔ?

²⁶ ቤዒቴ፥ ቆንጪያን ኢ ሃሳዬ፤ ኡንቱንቱ ኣ ኣይኔ ጊኪኖ። ሃዌ ኪሪስቶሳ ጊዲያዋ ኑ ካፓቱ ቱሙ ኤሪኖሻ?

²⁷ ሺን ኑኒ ኣ ሃቃፔ ዬዴንቶ ኤሮይቴ፤ ኪሪስቶሲ ዪያ ዎዴ፥ ኢ ሃቃፔ ዪንቶኔ ኦኒኔ ኤሬና» ያጌዲኖ።

²⁸ ሄዋፔ ጉዪያን፥ ዬሱሲ ጌሻ ጎሊያን ታማሪሲዴ፥ ባሬ ቃላ ꬎቁ ኡዲዴ፥ «ሂንቴንቱ ታና ኤሪታ፤ ቃሲ ታኒ ሃቃፔ ዬዴንቶካ ኤሪታ። ታኒ ታ ሼኒያን ያቤይኬ፤ ሺን ታና ኪቴዳዌ ቱማንቻ፤ ሂንቴንቱ ኣ ኤሪኪታ።

²⁹ ሺን ታኒ ኣ ኤራይ፤ ኣዪሲ ጎፔ፥ ኢ ታና ኪቲና፥ ታኒ ኣ ማታፔ ያዲ» ያጌዳ።

³⁰ ሄዋ ዲራው፥ ኡንቱንቱ ኣ ኦይቃናው ኮዬዲኖ፤ ሺን ኣ ዎዲ ቢሮ ጋኪቤና ዲራው፥ ኦኒኔ ኣ ቦላ ኩሺያ ዎꬂቤና።

³¹ ሺን ዳሮ ኣሳይ ዬሱሳ ኣማኒዴ፥ «ኪሪስቶሲ ዪያ ዎዴ፥ ሃ ቢታኒ ኦꬄዳ ማላታፔ ዳሪያዋ ኦꬃኔዬ?» ያጌዲኖ።

³² ፓሪሳዋቱ ዳሮ ኣሳይ ዬሱሳባ ዙዙሚያዋ ሲሴዲኖ፤ ቄሳቱዋ ካፓቱኔ ፓሪሳዋቱ ኣ ኦይቂ ቃሺሳናው ኣማሬዳ ዎታዳራቱዋ ኪቴዲኖ።

³³ ዬሱሲ፥ «ታኒ ሂንቴናና ላፋ ጋሚዓና፤ ሄዋፔ ጉዪያን፥ ታና ኪቴዳዋኮ ባና።

³⁴ ሂንቴንቱ ታና ኮያና፤ ሺን ዴሚኪታ፤ ኣዪሲ ጎፔ፥ ታኒ ዴዒያ ሳዓ ሂንቴንቱ ባናው ዳንዳዪኪታ» ያጌዳ።

³⁵ ኣዪሁዳቱ ኢቱ ኢቱዋና፥ «ሃዌ ኑኒ ኣ ዴሜናሳ ሃቃ ባና ሃኒ? ኣዪሁዳቱ ዴዒያ ጊሪኬ ካታማ ቢዴ፥ ጊሪኬ ኣሳቱዋ ታማሪሳና ሃኒ?

³⁶ ኢ፥ ‹ሂንቴ ታና ኮያና፤ ሺን ዴሚኪታ› ቃሲ፥ ‹ታኒ ዴዒያሳ ሂንቴንቱ ባናው ዳንዳዪኪታ› ያጌ፤ ሄዋ ጊያዌ ዋጊያዌ?» ያጌዲኖ።

³⁷ ሄ ባላ ጋላሳ ቦንቺያ ጋላሳፔ ዋናቲያ ዉርሴꬃ ጋላሳኒ ዬሱሲ ዴንዲ ኤቂዴ፥ ባሬ ቃላ ꬎቁ ኡዲዴ፥ «ሳሜቴዳ ኡራይ ኦኒኔ ታኮ ዪዴ ኡሾ።

³⁸ ታናን ኣማኒያዎ፥ ፆሳ ማፃፋይ ጊያዋዳን፥ ኣ ኡሉዋፔ ዴዑዋ ኢሚያ ሃꬃ ፑልቱ ጎጋናዋ» ያጌዳ።

³⁹ ኢ ሄዋ ኣ ኣማኔዳዋንቱ ኣካና ጌሻ ኣያናባ ሃሳዬዳ። ዬሱሲ ቢሮ ባሬ ቦንቹዋኮ ኬሲቤና ዲራው፥ ሄ ዎዴ ጌሻ ኣያናይ ኡንቱንቶ ኢሜቲቤና።

⁴⁰ ሄ ኣሳፔ ዳሪያ ባጋይ ኢ ጊያዋ ሲሲዴ፥ «ቱሙ ሃዌ ናጌቲያ ናቢያ» ያጌዲኖ።

⁴¹ ሃራንቱ፥ «ሃዌ ኪሪስቶሳ» ያጌዲኖ። ሺን ሃራንቱ ቃሲ፥ «ኪሪስቶሲ ጋሊላፔ ዬና።

⁴² ፆሳ ማፃፋይ፥ ‹ኪሪስቶሲ ዳዊቴ ዛሪያፔ፥ ዳዊቴ ዴዔዳ ቤቴሊሄሜ ካታማፔ ያና› ጌኔዬ?» ያጌዲኖ።

⁴³ ዬሱሳ ጋሱዋን ኣሳይ ባሬ ጊዱዋን ሻኬቴዳ።

⁴⁴ ሄ ኣሳፔ ኢቱ ኢቱ ኣ ኦይቃናው ኮዬዲኖ፤ ሺን ኩሺያኒኔ ኣ ቦቺቤይኪኖ።

⁴⁵ ጌሻ ጎሊያ ናጊያዋንቱ ቄሳቱዋ ካፓቱዋኮኔ ፓሪሳዋቱዋኮ ሲሚ ዬዳ ዎዴ ኡንቱንቱ ናጊያዋንታ፥ «ኣዪሲ ኣ ኣሂቤይኪቴ?» ያጊዴ ኦቼዲኖ።

⁴⁶ ጌሻ ጎሊያ ናጊያዋንቱ ኡንቱንቱሲ፥ «ሃ ቢታኒ ሃሳዬዳዋዳን፥ ኡባካ ኦኒኔ ሃሳዪቤና!» ያጊዴ ዛሬዲኖ።

⁴⁷ ፓሪሳዋቱ ዛሪዴ፥ «ኢ ሂንቴናካ ባሌꬁዋ?

⁴⁸ ካፓቱዋፔ ዎይ ፓሪሳዋቱዋፔ ኣ ኣማኔዳ ኣሳይ ዴዒ?

⁴⁹ ሺን ሂጊያ ኤሬና ሃ ኣሳይ ሼቄቴዳዋ» ያጌዲኖ።

⁵⁰ ኡንቱንቱፔ ኢቱ ካሴና ዬሱሳኮ ቤዳ ኒቆዲሞሲ ኡንቱንታ፥

⁵¹ «ኢቲ ኡራይ ጊያባ ሲሴናን ዎይ ኢ ኣያ ኦꬄዴንቶ ኤሬናን ዴዒዴ፥ ካሴቲዴ ኣ ቦላ ፒርዲያዌ ኑ ሂጊያን ዴዒ?» ያጌዳ።

⁵² ኡንቱንቱ ዛሪዴ ኣ፥ «ኔኒካ ቃሲ ጋሊላ ጋዲያ ኣሴ? ጋሊላ ጋዲያፔ ናቢ ቤቴናዋ ፆሳ ማፃፋቱዋ ቢዳዴ ኤራ» ያጌዲኖ።

¹⁴ Baalaa bonchchiya gallassaa baggan, Yesuusi Geeshsha Golliyaa biide, tamaarissuwaa doommeedda.

¹⁵ Ayihudatuu maalalelettiide, “Ha bitani aynne tamaarennaan hawaa keena waani ereeddee?” yaageeddino.

¹⁶ Hewaa diraw, Yesuusi zaariide, “Taana tamaarissiyaawe taana kiitteedda Xoossaa matappe yiyaawaappe attin, tawaa gidenna.

¹⁷ Xoossaa sheniyaa oothanaw dosiyaa ooninne ha taani tamaarissiyaawe Xoossaa matappe yintto woy qassi taani taappe haasayayitantto erana.

¹⁸ Barewaa haasayiyaa uray bare huuphiyaassi bonchchuwaa koyyee; shin barena kiitteeddawe bonchchettana mala koyyiyaa uray tumanchchaa; aani worddobay baawa.

¹⁹ Muse hinttenttussi higgiyaa immibeennee? Shin hintteppe ittuunne higgiyaa naagenna. Taana ayissi wodhanaw koyyiitee?” yaageedda.

²⁰ Asay zaariide, “Neenan xalahii de7ee; neena wodhanaw oonee koyyeeddawe?” yaageedda.

²¹ Yesuusi, “Taani itti wolqqaamabaa oothina, hinttenttu ubbay maalaletteeddita.

²² Hinttenttu naanaa hinttenttu dookaalana mala, Muse hinttentta azazeedda. Shin dookaalussay hinttenttu aawatuwanna yeeddawaappe attin, Musenna yibeenna; hewaassi hinttenttu Sambbataan attuma naanaa dookaaliita.

²³ Muse higgii azazeedda diraw, hinttenttu Sambbataan dookaaliyaawaa gidooppe, yaatina taani itti asaw kumentha bollaa patheedda diraw, taana ayissi hanqqettiitee?

²⁴ Tumu pirddaa pirdditeppe attin, asaa deemuwaa xeelliide pirddoppite” yaageedda.

²⁵ Hewaa diraw, Yeerusalaame asaappe ittu ittuu, “Unttunttu wodhanaw koyyiyaa bitani hawaa gidennee?

²⁶ Be7ite, qoncciyaan I haasayee; unttunttu A aynne giikkino. Hawe Kiristtoosa gidiyaawaa nu kaappatuu tumu eriinooshsha?

²⁷ Shin nuuni A haqappe yeeddentto eroytte; Kiristtoosi yiyaa wode, I haqappe yinttonne ooninne erenna” yaageeddino.

²⁸ Hewaappe guyyiyan, Yesuusi Geeshsha Golliyan tamaarissiidde, bare qaalaa dhoqqu udiide, “Hinttenttu taana eriita; qassi taani haqappe yeeddenttokka eriita. Taani ta sheniyaan yabeykke; shin taana kiitteeddawe tumanchchaa; hinttenttu A erikkita.

²⁹ Shin taani A eray; ayissi gooppe, I taana kiittina, taani A matappe yaaddi” yaageedda.

³⁰ Hewaa diraw, unttunttu A oyqqanaw koyyeeddino; shin A wodii biro gakkibeenna diraw, ooninne A bolla kushiyaa wothibeenna.

³¹ Shin daro asay Yesuusa ammaniide, “Kiristtoosi yiyaa wode, ha bitani ootheedda malaataappe dariyaawaa oothaneeyee?” yaageeddino.

³² Parisaawatuu daro asay Yesuusabaa zuuzummiyaawaa siseeddino; qeesatuwaa kaappatuunne Parisaawatuu A oyqqi qashissanaw amareedda wottaddaratuwaa kiitteeddino.

³³ Yesuusi, “Taani hinttenanna laafaa gami77ana; hewaappe guyyiyan, taana kiitteeddawaakko baana.

³⁴ Hinttenttu taana koyyana; shin demmikkita; ayissi gooppe, taani de7iyaa sa7aa hinttenttu baanaw danddayikkita” yaageedda.

³⁵ Ayihudatuu ittu ittuwanna, “Hawe nuuni A demmennaassa haqa baana hanii? Ayihudatuu de7iya Giriike katamaa biide, Giriike asatuwaa tamaarissana hanii?

³⁶ I, ‘Hintte taana koyyana; shin demmikkita’ qassi, ‘Taani de7iyaasaa hinttenttu baanaw danddayikkita’ yaagee; hewaa giyaawe waagiyaawee?” yaageeddino.

³⁷ He baalaa gallassaa bonchchiya gallassaappe waannatiyaa wurssetha gallassaani Yesuusi denddi eqqiide, bare qaalaa dhoqqu udiide, “Saametteedda uray ooninne taakko yiide usho.

³⁸ Taanan ammaniyaawoo, Xoossaa Maxaafay giyawaadan, A uluwaappe de7uwaa immiyaa haathaa pulttuu gogganawaa” yaageedda.

³⁹ I hewaa A ammaneeddawanttu akkana Geeshsha Ayyaanaabaa haasayeedda. Yesuusi biro bare bonchchuwaakko kesibeenna diraw, he wode Geeshsha Ayyaanay unttunttoo imettibeenna.

⁴⁰ He asaappe dariya baggay I giyaawaa sisiide, “Tumu hawe naagettiyaa Nabiyaa” yaageeddino.

⁴¹ Haranttu, “Hawe Kiristtoosa” yaageeddino. Shin haranttu qassi, “Kiristtoosi Galiilaappee yeenna.

⁴² Xoossaa Maxaafay, ‘Kiristtoosi Daawite zariyaappe, Daawite de7eedda Beeteliheeme katamaappe yaana’ geenneyee?” yaageeddino.

⁴³ Yesuusa gaasuwan asay bare gidduwan shaaketteedda.

⁴⁴ He asaappe ittu ittu A oyqqanaw koyyeeddino; shin kushiyaaninne A bochchibeykkino.

⁴⁵ Geeshsha Golliyaa naagiyaawanttu qeesatuwaa kaappatuwaakkonne Parisaawatuwaakko simmi yeedda wode unttunttu naagiyaawantta, “Ayissi A ahibeykkitee?” yaagiide oochcheeddino.

⁴⁶ Geeshsha Golliyaa naagiyaawanttu unttunttussi, “Ha bitani haasayeeddawaadan, ubbakka ooninne haasayibeenna!” yaagiide zaareeddino.

⁴⁷ Parisaawatuu zaariide, “I hinttenakka balethuwaa?

⁴⁸ Kaappatuwaappe woy Parisaawatuwaappe A ammaneedda asay de7ii?

⁴⁹ Shin higgiyaa erenna ha asay sheqetteeddawaa” yaageeddino.

⁵⁰ Unttunttuppe ittuu kasenna Yesuusakko beedda Niqoodimoosi unttuntta,

⁵¹ “Itti uray giyaabaa sisennaan woy I ayaa ootheeddentto erennaan de7iidde, kasetiide A bolla pirddiyaawe nu higgiyan de7ii?” yaageedda.

⁵² Unttunttu zaariide A, “Neenikka qassi Galiilaa gadiya asee? Galiilaa gadiyaappe Nabii beettennawaa Xoossaa Maxaafatuwaa biddaade era” yaageeddino.