ዮሃኒሳ 6:33-61 in Gofa

³³ ሂዛ፥ ፆሳይ ኢሚያ ኡይꬃይ ሳሎፔ ዎꬊዳይሲ ኣላሚያስ ዴዖ ኢሜይሳ» ያጊስ።

³⁴ ኤንቲ ዛሪዲ፥ «ጎዳው፥ ኑስ ሄ ኡይꬃ ኡባ ዎዴ ኢማ» ያጊዶሶና።

³⁵ ዬሱሲ፥ «ታኒ ዴዖ ኢሚያ ኡይꬃ፤ ታኮ ያ ኦኒካ ኡባራካ ኮሻቴና። ቃሲ ታና ኣማኒያ ኡራይ ኡባራካ ሳሞቴና።

³⁶ ሺን ታኒ ሂንቴው ኦዳስ፤ ሂንቴ ታና ቤዒዴታ፥ ሺን ኣማኔኬታ።

³⁷ ታ ኣዋይ ታው ኢሚያ ኡባይ ታኮ ያና፤ ቃሲ ታኮ ያ ኦናካ ካሬ ዬዲኬ።

³⁸ ታኒ ታ ኮያባ ኦꬃናው ጊዶናሺን ታና ኪቲዳይሲ ኮያባ ኦꬃናው ሳሎፔ ያስ።

³⁹ ታና ኪቲዳይሲ ኮዬይ ሃይሳ፡ ታኒ ኢ ታው ኢሚዳ ኡባታካ ዉርሴꬃ ጋላስ ሃይቆፔ ዴንꬃና ሜላፔ ኣቲን ኢሱዋካ ꬋይሳና ሜላ ኮዬና።

⁴⁰ ሂዛ፥ ታ ኣዋይ ኮዬይ ሄሳ፡ ናዓ ቤዒዲ ኣማኒያ ኡባይ ሜሪና ዴዑዋ ኤካና፤ ታኒ ሄ ኡባ ዉርሴꬃ ጋላስ ሜሪና ዴዖስ ሃይቆፔ ዴንꬃና» ያጊስ።

⁴¹ ዬሱሲ፥ «ታኒ ሳሎፔ ዎꬊዳ ኡይꬃ» ጊዳ ጊሾ ኣይሁዴቲ ኢያ ቦላ ዙዙሚዶሶና።

⁴² ኤንቲ፥ «ሃይሲ ኑኒ ኢያ ኣዋኔ ኢያ ኣዪው ኤሪያ ዮሴፋ ናዓ ዬሱሳ ጊዴኔ? ያቲን፥ ኢ ዋኒዲ፥ ‹ታኒ ሳሎፔ ዎꬋስ› ጋናው ዳንዳዒ?» ያጊዶሶና።

⁴³ ዬሱሲ ዛሪዲ፥ «ኢሶይ ኢሱዋራ ዙዙሜይሳ ኣጊቴ።

⁴⁴ ታና ኪቲዳ ታ ኣዋይ ታኮ ኤሂያ ኣሳፔ ኣቲን ታኮ ያናው ዳንዳዒያ ኦኒካ ባዋ። ታኒ ዉርሴꬃ ጋላስ ኢያ ሜሪና ዴዖስ ሃይቆፔ ዴንꬃና።

⁴⁵ ናቤቲ፥ ‹ፆሳይ ኣሳ ኡባ ታማርሳና› ያጊዲ ፃፊዶሶና። ኣዋ ሲዔይሲኔ ኢያፔ ታማሪያ ኦኒካ ታኮ ዬስ።

⁴⁶ ፆሳ ማታፔ ዪዳይሳፌ ኣቲን ኣዋ ቤዒዳይ ኦኒካ ባዋ፤ ኢያ ፃላሊ ኣዋ ቤዒስ።

⁴⁷ «ታኒ ሂንቴው ቱማ ኦዳይስ፤ ታና ኣማኒያ ኦዴስካ ሜሪና ዴዖይ ዴዔስ።

⁴⁸ ታኒ ዴዖ ኢሚያ ኡይꬃ።

⁴⁹ ሂንቴ ኣዋቲ ባዞን ማና ሚዶሶና፥ ሺን ሃይቂዶሶና።

⁵⁰ ሳሎፔ ያ ኡይꬃይ ሃይሳ፤ ሄ ኡይꬃ ሚያ ኦኒካ ሃይቄና።

⁵¹ ሳሎፔ ዪዳ ዴዖ ኡይꬃይ ታና። ኦኒካ ሃ ኡይꬃ ሚኮ ሜሪናው ዳና። ቃሲ ሃ ኣላሜይ ዴዖን ዳና ሜላ ታኒ ሂንቴው ኢማና ኡይꬃይ ታ ኣሹዋ» ያጊስ።

⁵² ኣይሁዴቲ፥ «ሃ ኣዴይ ባ ኣሹዋ ኑ ማና ሜላ ኑስ ዋቲዲ ኢማናው ዳንዳዒ?» ያጊዲ ባንታ ጊዶን ፓላሚዶሶና።

⁵³ ሄሳ ጊሾ፥ ዬሱሲ ኤንታኮ፥ «ታኒ ሂንቴው ቱማ ኦዳይስ፤ ኣሳ ናዓ ኣሹዋ፥ ሂንቴ ሞና ኢፂኮ፥ ቃሲ ኢያ ሱꬃ ሂንቴ ኡዮና ኢፂኮ፥ ሂንቴው ዴዖይ ባዋ።

⁵⁴ ታ ኣሹዋ ሚያ ኡራሲኔ ታ ሱꬃ ኡያ ኡራስ ሜሪና ዴዖይ ዴዔስ። ታኒ ዉርሴꬃ ጋላስ ኢያ ሃይቆፔ ዴንꬃና።

⁵⁵ ታ ኣሾይ ቱማ ካꬂ፤ ታ ሱꬃይካ ቱማ ኡሹ።

⁵⁶ ታ ኣሹዋ ሚያ ኡራይኔ ታ ሱꬃ ኡያ ኡራይ ታናን ዴዔስ፤ ታካ ኢያን ዴዓይስ።

⁵⁷ ዴዖ ኣዋይ ታና ኪቲን፥ ታኒ ኢያ ባጋራ ዴዖን ዴዔይሳዳ፥ ታና ሚያ ኡራይካ ታ ጋሶን ዴዖን ዳና።

⁵⁸ ሳሎፔ ዎꬊዳ ኡይꬃይ ሃይሳ፡ ሂንቴ ኣዋቲ ሚዲ ሃይቂዳ ማና ሜላ ጊዴና፤ ሃ ኡይꬃ ሚያ ኡራይ ሜሪናው ዳና» ያጊስ።

⁵⁹ ዬሱሲ ቂፊርናሆሜ ካታማን ኣይሁዴ ዎሳ ኬꬃን ሃይሳ ታማርሲስ።

⁶⁰ ዬሱሳ ታማሬታፔ ዳሪያ ባጋይ ሄሳ ሲዒዳ ዎዴ «ሃይሲ ጌሎና ቲሚርቴ፤ ሃይሲ ኦዴስ ጌሊ?» ያጊዶሶና።

⁶¹ ዬሱሲ ባ ታማሬቲ ሄሳስ ዙዙሚዳይሳ ኤሪዲ፥ «ሃይሲ ሂንቴና ꬉቢ?

³³ Hiza, Xoossay immiya uythay saloppe wodhdhidayssi alamiyas de7o immeyssa” yaagis.

³⁴ Entti zaaridi, “Godaw, nuus he uythaa ubba wode imma” yaagidosona.

³⁵ Yesuusi, “Taani de7o immiya uythaa; taakko yaa oonikka ubbaraka koshattenna. Qassi tana ammaniyaa uray ubbarakka saamottenna.

³⁶ Shin taani hinttew odas; hintte tana be7ideta, shin ammanekketa.

³⁷ Ta Aaway taw immiya ubbay taakko yaana; qassi taakko yaa oonakka kare yeddike.

³⁸ Taani ta koyabaa oothanaw gidonnashin tana kiittidayssi koyabaa oothanaw saloppe yas.

³⁹ Tana kiittidayssi koyey hayssa: taani I taw immida ubbatakka wurssetha gallas hayqoppe denthana melappe attin issuwaka dhayssana mela koyenna.

⁴⁰ Hiza, ta Aaway koyey hessa: Na7aa be7idi ammaniyaa ubbay merinaa de7uwa ekkana; taani he ubbaa wurssetha gallas merinaa de7os hayqoppe denthana” yaagis.

⁴¹ Yesuusi, “Taani saloppe wodhdhida uythaa” gida gisho Ayhudeti iya bolla zuuzummidosona.

⁴² Entti, “Hayssi nuuni iya aawanne iya aayiw eriya Yoosefa Na7aa Yesuusa gidennee? Yaatin, I waanidi, ‘Taani saloppe wodhdhas’ gaanaw dandda7ii?” yaagidosona.

⁴³ Yesuusi zaaridi, “Issoy issuwara zuuzummeyssa aggite.

⁴⁴ Tana kiittida ta Aaway taakko ehiya asappe attin taakko yaanaw dandda7iya oonikka baawa. Taani wurssetha gallas iya merinaa de7os hayqoppe denthana.

⁴⁵ Nabeti, ‘Xoossay asa ubbaa tamaarssana’ yaagidi xaafidosona. Aawa si7eyssinne iyappe tamaariya oonikka taakko yees.

⁴⁶ Xoossaa matappe yidayssafe attin Aawa be7iday oonikka baawa; iya xalaali Aawa be7is.

⁴⁷ “Taani hinttew tuma odays; tana ammaniyaa ooddeskka merinaa de7oy de7ees.

⁴⁸ Taani de7o immiya uythaa.

⁴⁹ Hintte aawati bazzon manna midosona, shin hayqqidosona.

⁵⁰ Saloppe yaa uythay hayssa; he uythaa miya oonikka hayqqenna.

⁵¹ Saloppe yida de7o uythay tana. Oonikka ha uythaa miikko merinaw daana. Qassi ha alamey de7on daana mela taani hinttew immana uythay ta ashuwa” yaagis.

⁵² Ayhudeti, “Ha addey ba ashuwa nu maana mela nuus waattidi immanaw dandda7ii?” yaagidi bantta giddon palamidosona.

⁵³ Hessa gisho, Yesuusi enttako, “Taani hinttew tuma odays; Asa Na7aa ashuwa, hintte moonna ixxiko, qassi iya suuthaa hintte uyonna ixxiko, hinttew de7oy baawa.

⁵⁴ Ta ashuwa miya uraasinne ta suuthaa uyaa uraas merinaa de7oy de7ees. Taani wurssetha gallas iya hayqoppe denthana.

⁵⁵ Ta ashoy tuma kathi; ta suuthaykka tuma ushshu.

⁵⁶ Ta ashuwa miya uraynne ta suuthaa uyaa uray tanan de7ees; takka iyan de7ays.

⁵⁷ De7o Aaway tana kiittin, taani iya baggara de7on de7eyssada, tana miya uraykka ta gaason de7on daana.

⁵⁸ Saloppe wodhdhida uythay hayssa: hintte aawati midi hayqqida manna mela gidenna; ha uythaa miya uray merinaw daana” yaagis.

⁵⁹ Yesuusi Qifirnahoome kataman Ayhude Woosa Keethan hayssa tamaarssis.

⁶⁰ Yesuusa tamaaretappe dariya baggay hessa si7ida wode “Hayssi gelonna timirtte; hayssi ooddes gelii?” yaagidosona.

⁶¹ Yesuusi ba tamaareti hessas zuuzummidayssa eridi, “Hayssi hinttena dhubbi?