ዮሃኒሳ 5:5-44 in Gofa

⁵ ሄ ቤሳን ሃስታማኔ ሆስፑን ላይꬂ ሃርጌቲዳ ኢሲ ኣዴይ ዴዔስ።

⁶ ዬሱሲ ያን ዚንዒዳ ኣዲያ ቤዒዲ፥ ቃሲ ዳሮ ዎዴ ሃርጌቲዳይሳ ኤሪዲ ኣዲያኮ፥ «ፓፃናው ኮያይ?» ያጊስ።

⁷ ሃርጋንቾይ ዛሪዲ፥ «ጎዳው፥ ሃꬃይ ቃፂያ ዎዴ ታና ሃꬃን ዬጊያ ኣሲ ባዋ። ታኒ ጌላና ሃኒያ ዎዴ ሃራይ ታፔ ሲንꬃቲዲ ጌሊ ኪቼስ» ያጊስ።

⁸ ዬሱሲ ኢያኮ፥ «ዴንዳ ኤቃ፤ ኔ ኣልጋ ቶካዳ ባ» ያጊስ።

⁹ ኣዴይ ሶሁዋራካ ፓፂስ፤ ባ ኣልጋ ቶኪዲ ቢስ። ሄሲ ሳምባታ ጋላሳን ሃኒስ።

¹⁰ ሄሳ ጊሾ፥ ኣይሁዴቲ ፓፂዳ ኣዲያኮ፥ «ሃቺ ሳዓይ ሳምባታ፤ ኔኒ ኔ ኣልጋ ቶኬይሲ ዎጋ ጊዴና» ያጊዶሶና።

¹¹ ሺን ኣዴይ፥ «ታና ፓꬂዳይሲ፥ ኔ ኣልጋ ቶካዳ ባ ጊስ» ያጊዲ ዛሪስ።

¹² ኤንቲ ኢያኮ፥ «ኔና፥ ኔ ኣልጋ ቶካዳ ባ ጊዳይ ኢ ኦኔ?» ያጊዲ ኦይቺዶሶና።

¹³ ሺን ዬሱሲ ሄ ቤሳን ዳሮ ኣሳ ጊዶራ ኤሪሶና ካንꬂዲ ቢዳ ጊሾ ኣዴይ ባና ፓꬂዳይ ኦኔኮ ኤሬና።

¹⁴ ዬሱሲ ጉዬፔ ሄ ኣዲያ ፆሳ ኬꬃን ዴሚዲ፥ «ሄኮ፥ ኔኒ ፓፃዳሳ፤ ሃይሳፌ ኢታባይ ኔና ጋኮና ሜላ ዛራዳ ናጋራ ኦꬆፋ» ያጊስ።

¹⁵ ሄሳፌ ጉዬ፥ ኣዴይ ቢዲ ባና ፓꬂዳይሲ ዬሱሳ ጊዲዳይሳ ኣይሁዴታስ ኦዲስ።

¹⁶ ዬሱሲ ሄሳ ሳምባታ ጋላስ ኦꬂዳ ጊሾ ኣይሁዴቲ ዬሱሳ ጎዳ ኦይኪዶሶና።

¹⁷ ዬሱሲ ዛሪዲ፥ «ታ ኣዋይ ኡባ ዎዴ ኦꬄስ፤ ታካ ኦꬃናው ቤሴስ» ያጊስ።

¹⁸ ዬሱሲ ሳምባታ ቦንቾና ጊሾ ፃላላስ ጊዶናሺን ፆሳይ ባ ኣዋ ጊዲ ባና ፆሳራ ጊጊሲዳ ጊሾ ኣይሁዴቲ ኢያ ዎꬋናው ካሴፔ ሚንꬂዲ ኮዪዶሶና።

¹⁹ ዬሱሲ ዛሪዲ፥ «ታኒ ሂንቴው ቱማ ኦዳይስ፤ ናዓይ ባርካ ኣይኮካ ኦꬃናው ዳንዳዔና። ኢ ባ ኣዋይ ኦꬂሺን ቤዖይሳ ፃላላ ኦꬄስ። ኣዋይ ኦꬄይሳ ናዓይካ ኦꬄስ።

²⁰ ኣዋይ ባ ናዓ ዶሲያ ጊሾ ኢ ኦꬂያ ኦሶ ኡባ ባ ናዓ ቤሴስ። ሂንቴ ማላሌታና ሜላ ኢ ሃይሳፌ ኣꬊያ ኦሶ ባ ናዓ ቤሳና።

²¹ ኣዋይ ሃይቂዳይሳታ ሃይቆፔ ዴንꬂዲ ኤንታው ዴዖ ኢሜይሳዳ ናዓይካ ባ ኮዬይሳታስ ዴዖ ኢሜስ።

²² ኣዋይ ናዓስ ፒርዳ ማታ ኡባ ኢሚስፔ ኣቲን ኢ ኦናካ ፒርዴና።

²³ ኣሳይ ኡባይ ኣዋ ቦንቼይሳዳ ናዓካ ቦንቻና። ናዓ ቦንቾና ኦኒካ ናዓ ኪቲዳ ኣዋካ ቦንቼና።

²⁴ «ታኒ ሂንቴው ቱማ ኦዳይስ፤ ታ ቃላ ሲዔይሳሲኔ ታና ኪቲዳይሳ ኣማኔይሳስ ሜሪና ዴዖይ ዴዔስ። ኢ ሃይቆፔ ዴዖን ፒኒዳ ጊሾ ፒርዴቴና።

²⁵ ታኒ ሂንቴው ቱማ ኦዳይስ፤ ሃይቂዳ ኣሳይ ፆሳ ናዓ ቃላ ሲዒያ ዎዴይ ያና፤ ሄሲካ ሃዒ። ሄ ቃላ ሲዔይ ዴዖን ዳና።

²⁶ ኣዋይ ዴዖስ ፑልቶ ጊዲዳይሳዳ ናዓካ ዴዖስ ፑልቶ ኦꬂስ።

²⁷ ናዓይ ኣሳ ናዓ ጊዲያ ጊሾ ኣዋይ ናዓስ ፒርዳ ማታ ኢሚስ።

²⁸ «ዱፎን ዴዔይሳቲ ኢያ ቃላ ሲዒዲ ዴንዲያ ዎዴይ ያና ጊሾ ሃይሳን ማላሌቶፊቴ።

²⁹ ሎዖ ኦꬂዳይሳቲ ዴዖን ዳናው ቃሲ ኢታ ኦꬂዳይሳቲ ፒርዳ ኤካናው ዱፎፔ ዴንዳና።

³⁰ «ታኒ ታ ማታን ኣይቢባካ ኦꬃናው ዳንዳዒኬ። ፆሳይ ታው ኦዲዳይሳዳ ፒርዳይስ። ታኒ ታና ኪቲዳይሲ ኮያባ ኦꬃይሲፔ ኣቲን ታ ኮያባ ኦꬆና ጊሾ ታ ፒርዳይ ቱማ።

³¹ «ታኒ ታባ ማርካቲኮ ታ ማርካቴꬃይ ቱማ ጊዴና።

³² ታባ ማርካቲያ ሃሪ ዴዔስ፤ ኢ ታባ ማርካቴይሲ ቱማ ጊዴይሳ ታኒ ኤራይስ።

³³ «ሂንቴ ዮሃኒሳኮ ኣሴ ኪቲን ኢ ቱማስ ማርካቲስ።

³⁴ ታኒ ሄሳ ሂንቴው ኦዴይ፥ ሂንቴ ኣታና ሜላ ጋዳፔ ኣቲን ኣሳ ማርካቴꬂ ታው ኮሺን ጊዴና።

³⁵ ዮሃኒሲ ሙቃዳዳ ኤፂሼ ፖዒስ። ሂንቴ ጉꬃ ዎዴ ኢያ ፖዑዋን ኡፋይቲዴታ።

³⁶ «ሺን ታው ዮሃኒሳፔ ኣꬊያ ማርኪ ዴዔስ። ታኒ ኦꬃና ሜላ ታ ኣዋይ ታው ኢሚዳ ኦሶቲ ታባ ማርካቶሶና፤ ኣዋይ ታና ኪቲዳይሳ ቆንጪሶሶና።

³⁷ «ቃሲ ታና ኪቲዳ ኣዋይካ ባ ሁዔን ታባ ማርካቴስ። ሂንቴ ኢያ ቃላ ኡባራካ ሲዒቤኬታ ዎይኮ ኢያ ማላ ቤዒቤኬታ።

³⁸ ኢ ኪቲዳይሳ ሂንቴ ኣማኖና ጊሾ ኢያ ቃላይ ሂንቴ ዎዛናን ባዋ።

³⁹ «ጌሻ ማፃፋታፔ ሜሪና ዴዖ ዴማናባ ሂንቴው ዳኒን ኤንታ ፒልጌታ፤ ኤንቲ ታባ ማርካቶሶና።

⁴⁰ ሺን ሂንቴ ዴዖ ዴማናው ታኮ ያናው ኮዬኬታ።

⁴¹ «ኣሳፔ ታኒ ቦንቾ ኮዪኬ።

⁴² ሺን ታኒ ሂንቴ ዎዛናን ፆሳ ሲቆይ ባይናይሳ ኤራይስ።

⁴³ ታኒ ታ ኣዋ ማታን ያስ፥ ሺን ታና ሞኪቤኬታ። ሃራይ ባ ማታን ያ ዎዴ ኢያ ሞኬታ።

⁴⁴ ሂንቴ ኢሶይ ኢሱዋፌ ቦንቾ ኮዬይሳቲ፥ ኢሲ ፆሳፌ ያ ጋላታ ኤካናው ኮዮናይሳቲ፥ ዋኒዲ ታና ኣማናናው ዳንዳዔቲ?

⁵ He bessan hasttamanne hosppun laythi harggettida issi addey de7ees.

⁶ Yesuusi yan zin77ida addiya be7idi, qassi daro wode harggettidayssa eridi addiyako, “Paxanaw koyay?” yaagis.

⁷ Hargganchoy zaaridi, “Godaw, haathay qaaxxiya wode tana haathan yeggiya asi baawa. Taani gelana haniya wode haray taappe sinthattidi geli kichchees” yaagis.

⁸ Yesuusi iyaakko, “Dendda eqqa; ne alggaa tookkada ba” yaagis.

⁹ Addey sohuwarakka paxis; ba alggaa tookkidi bis. Hessi Sambbaata gallasan hanis.

¹⁰ Hessa gisho, Ayhudeti paxida addiyako, “Hachchi sa7ay Sambbaata; neeni ne alggaa tookkeyssi woga gidenna” yaagidosona.

¹¹ Shin addey, “Tana pathidayssi, ne alggaa tookkada ba gis” yaagidi zaaris.

¹² Entti iyaakko, “Nena, ne alggaa tookkada ba giday I oonee?” yaagidi oychchidosona.

¹³ Shin Yesuusi he bessan daro asaa giddora erisonna kanthidi bida gisho addey bana pathiday ooneekko erenna.

¹⁴ Yesuusi guyeppe he addiya Xoossa Keethan demmidi, “Hekko, neeni paxadasa; hayssafe iitabay nena gakkonna mela zaarada nagara oothofa” yaagis.

¹⁵ Hessafe guye, addey bidi bana pathidayssi Yesuusa gididayssa Ayhudetas odis.

¹⁶ Yesuusi hessa Sambbaata gallas oothida gisho Ayhudeti Yesuusa gooda oykkidosona.

¹⁷ Yesuusi zaaridi, “Ta Aaway ubba wode oothees; takka oothanaw bessees” yaagis.

¹⁸ Yesuusi Sambbaata bonchchonna gisho xalaalas gidonnashin Xoossay ba Aawa gidi bana Xoossara giigisida gisho Ayhudeti iya wodhanaw kaseppe minthidi koyidosona.

¹⁹ Yesuusi zaaridi, “Taani hinttew tuma odays; Na7ay barkka aykkoka oothanaw dandda7enna. I ba Aaway oothishin be7oyssa xalaala oothees. Aaway ootheyssa Na7aykka oothees.

²⁰ Aaway ba Na7aa dosiya gisho I oothiya ooso ubbaa ba Na7aa bessees. Hintte malaalettana mela I hayssafe aadhdhiya ooso ba Na7aa bessana.

²¹ Aaway hayqqidayssata hayqoppe denthidi enttaw de7o immeyssada Na7aykka ba koyeyssatas de7o immees.

²² Aaway Na7aas pirdda maata ubbaa immisppe attin I oonakka pirddenna.

²³ Asay ubbay Aawa bonchcheyssada Na7aakka bonchchana. Na7aa bonchchonna oonikka Na7aa kiittida Aawakka bonchchenna.

²⁴ “Taani hinttew tuma odays; ta qaala si7eyssasinne tana kiittidayssa ammaneyssas merinaa de7oy de7ees. I hayqoppe de7on pinnida gisho pirddettenna.

²⁵ Taani hinttew tuma odays; hayqqida asay Xoossaa Na7aa qaala si7iya wodey yaana; hessika ha77i. He qaalaa si7ey de7on daana.

²⁶ Aaway de7os pultto gididayssada Na7aakka de7os pultto oothis.

²⁷ Na7ay Asa Na7a gidiya gisho Aaway Na7aas pirdda maata immis.

²⁸ “Duufon de7eyssati iya qaala si7idi denddiya wodey yaana gisho hayssan malaalettofite.

²⁹ Lo77o oothidayssati de7on daanaw qassi iita oothidayssati pirdda ekkanaw duufoppe denddana.

³⁰ “Taani ta maatan aybibaakka oothanaw dandda7ikke. Xoossay taw odidayssada pirddays. Taani tana kiittidayssi koyabaa oothaysippe attin ta koyabaa oothonna gisho ta pirdday tuma.

³¹ “Taani tabaa markkatiko ta markkatethay tuma gidenna.

³² Tabaa markkattiya hari de7ees; I tabaa markkatteyssi tuma gideyssa taani erays.

³³ “Hintte Yohaannisakko ase kiittin I tumaas markkattis.

³⁴ Taani hessa hinttew odey, hintte attana mela gadappe attin asa markkatethi taw koshshin gidenna.

³⁵ Yohaannisi muqaadada eexishe poo7is. Hintte guutha wode iya poo7uwan ufayttideta.

³⁶ “Shin taw Yohaannisappe aadhdhiya markki de7ees. Taani oothana mela ta Aaway taw immida oosoti tabaa markkattosona; Aaway tana kiittidayssa qonccisoosona.

³⁷ “Qassi tana kiittida Aawaykka ba huu7en tabaa markkattees. Hintte iya qaala ubbarakka si7ibeekketa woykko iya malaa be7ibeekketa.

³⁸ I kiittidayssa hintte ammanonna gisho iya qaalay hintte wozanan baawa.

³⁹ “Geeshsha Maxaafatappe merinaa de7o demmanabaa hinttew daanin entta pilggeeta; entti tabaa markkattosona.

⁴⁰ Shin hintte de7o demmanaw taakko yaanaw koyekketa.

⁴¹ “Asappe taani bonchcho koyikke.

⁴² Shin taani hintte wozanan Xoossaa siiqoy baynnayssa erays.

⁴³ Taani ta Aawa maatan yas, shin tana mokkibeekketa. Haray ba maatan yaa wode iya mokkeeta.

⁴⁴ Hintte issoy issuwafe bonchcho koyeyssati, issi Xoossaafe yaa galata ekkanaw koyonnayssati, waanidi tana ammananaw dandda7etii?