ዮሃኒሳ 5:31-47 in Dawro

³¹ «ታኒ ታ ሁጴው ታባ ማርካቶፔ፥ ታ ማርካቴꬃይ ቱማ ጊዴና።

³² ታባ ማርካቲያዌ ሃራይ ዴዔ፤ ኢ ታባ ማርካቲያዌ ቱማ ጊዲያዋ ታኒ ኤራይ።

³³ «ሂንቴንቱ ዮሃኒሳኮ ኣሳ ኪቲና፥ ኢ ኡንቱንቶ ቱሙዋ ማርካቴዳ።

³⁴ ታኒ ሄዋ ሂንቴንታ ኣቲኖ ጋዴ ጊያዋፔ ኣቲን፥ ኣሳ ማርካቴꬃይ ታው ኮሺና ጊዴና።

³⁵ ዮሃኒሲ ሙቃዳዳን፥ ኤፄዳኔ ፖዒሴዳ፤ ሂንቴንቱካ ኣማሬዳ ዎዲያ ኣ ፖዑዋን ናሼታናው ኮዬዲታ።

³⁶ «ሺን ታው ዮሃኒሳዋፔ ኣꬊያ ማርካቴꬃይ ዴዔ፤ ኣዪሲ ጎፔ፥ ታኒ ዉርሳናው ታ ኣቡ ታው ኢሜዳ ኪታይ፥ ሃ ታኒ ኦꬂያዌ፥ ኢ ታና ኪቴዳዋ ጊዲያዋ ማርካቴ።

³⁷ «ቃሲ ታና ኪቴዳ ታ ኣቡ ባሬ ሁጴው ታባ ማርካቴ። ሂንቴንቱ ኣ ኮሻ ኣይኔ ሲሲቤይኪታ፤ ኣ ማላካ ቤዒቤይኪታ።

³⁸ ኢ ኪቴዳዋ ኣማኔና ዲራው፥ ኣ ቃላይ ሂንቴንቱ ዎዛናን ባዋ።

³⁹ «ፆሳ ማፃፋቱዋፔ ሜꬊና ዴዑዋ ዴሚያዋ ሂንቴው ማላቲና፥ ኡንቱንታ ቢዲታ፤ ኡንቱንቱካ ታባ ማርካቲያዋንታ።

⁴⁰ ሺን ዴዑዋ ዴማናው ታኮ ዪያዋ ሂንቴንቱ ኮዪኪታ።

⁴¹ «ታኒ ኣሳፔ ቦንቹዋ ኮዪኬ።

⁴² ሺን ታኒ ሂንቴንቱ ዎዛናን ፆሳ ሲቁ ባይናዋ ኤራይ።

⁴³ ታኒ ታ ኣቡ ሱንꬃን ያዲ፤ ሺን ታና ኣኪቤይኪታ። ሺን ሃራ ኣሳይ ባሬ ሱንꬃን ዪያ ዎዴ፥ ኣ ኣኪታ።

⁴⁴ ሂንቴንቱ ኢቱ ኢቱዋ ቦንቺታ፤ ሺን ኢቲ ፆሳፔ ዪያ ቦንቹዋ ኮዪኪታ። ያቲና፥ ዋኒዴ ኣማናናው ዳንዳዪቴ?

⁴⁵ «ታኒ ታ ኣቡ ሲንꬃን ሂንቴንታ ሞቲያዋ ሂንቴው ማላቶፖ፤ ሂንቴንታ ሞቲያዌ፥ ሂንቴ ሂዶታ ዎꬂያ ሙሳ።

⁴⁶ ሂንቴንቱ ሙሳ ኣማኔዳባ ጊዲንቶ፥ ታናካ ኣማናኒታ፤ ኣዪሲ ጎፔ፥ ታባ ፃፌዳዌ ኣ።

⁴⁷ ሺን ሂንቴንቱ ኢ ፃፌዳዋ ኣማኔናን ኢፆፔ፥ ታኒ ጊያዋ ዎቲ ኣማናኒቴ?» ያጌዳ።

³¹ “Taani ta huuphew tabaa markkattooppe, ta markkatethay tuma gidenna.

³² Tabaa markkattiyaawe haray de7ee; I tabaa markkattiyaawe tuma gidiyaawaa taani eray.

³³ “Hinttenttu Yohaannisakko asaa kiittina, I unttunttoo tumuwaa markkatteedda.

³⁴ Taani hewaa hinttentta attino gaade giyaawaappe attin, asaa markkatethay taw koshshina gidenna.

³⁵ Yohaannisi muqaaddaadan, eexxeeddanne poo7isseedda; hinttenttukka amareedda wodiyaa A poo7uwan nashettanaw koyyeeddita.

³⁶ “Shin taw Yohaannisawaappe aadhdhiyaa markkatethay de7ee; ayissi gooppe, taani wurssanaw Ta Aabbu taw immeedda kiitay, ha taani oothiyaawe, I taana kiitteeddawaa gidiyaawaa markkattee.

³⁷ “Qassi taana kiitteedda Ta Aabbu bare huuphew tabaa markkattee. Hinttenttu A kooshshaa aynne sisibeykkita; A malaakka be7ibeykkita.

³⁸ I kiitteeddawaa ammanenna diraw, A qaalay hinttenttu wozanaan baawa.

³⁹ “Xoossaa Maxaafatuwaappe medhinaa de7uwaa demmiyaawaa hinttew malatina, unttuntta biddiita; unttunttukka tabaa markkattiyaawantta.

⁴⁰ Shin de7uwaa demmanaw taakko yiyaawaa hinttenttu koyyikkita.

⁴¹ “Taani asaappe bonchchuwaa koyyikke.

⁴² Shin taani hinttenttu wozanaan Xoossaa siiquu baynnawaa eray.

⁴³ Taani ta Aabbu sunthan yaaddi; shin taana akkibeykkita. Shin hara asay bare sunthan yiyaa wode, A akkiita.

⁴⁴ Hinttenttu ittu ittuwaa bonchchiita; shin itti Xoossaappe yiyaa bonchchuwaa koyyikkita. Yaatina, waaniide ammananaw danddayiite?

⁴⁵ “Taani Ta Aabbu sinthan hinttentta mootiyaawaa hinttew malatoppo; hinttentta mootiyaawe, hintte hidootaa wothiyaa Musa.

⁴⁶ Hinttenttu Musa ammaneeddabaa gidintto, taanakka ammananita; ayissi gooppe, tabaa xaafeeddawe A.

⁴⁷ Shin hinttenttu I xaafeeddawaa ammanennaan ixxooppe, taani giyaawaa wooti ammananitee?” yaageedda.