ዮሃኒሳ 5:29-46 in Gofa

²⁹ ሎዖ ኦꬂዳይሳቲ ዴዖን ዳናው ቃሲ ኢታ ኦꬂዳይሳቲ ፒርዳ ኤካናው ዱፎፔ ዴንዳና።

³⁰ «ታኒ ታ ማታን ኣይቢባካ ኦꬃናው ዳንዳዒኬ። ፆሳይ ታው ኦዲዳይሳዳ ፒርዳይስ። ታኒ ታና ኪቲዳይሲ ኮያባ ኦꬃይሲፔ ኣቲን ታ ኮያባ ኦꬆና ጊሾ ታ ፒርዳይ ቱማ።

³¹ «ታኒ ታባ ማርካቲኮ ታ ማርካቴꬃይ ቱማ ጊዴና።

³² ታባ ማርካቲያ ሃሪ ዴዔስ፤ ኢ ታባ ማርካቴይሲ ቱማ ጊዴይሳ ታኒ ኤራይስ።

³³ «ሂንቴ ዮሃኒሳኮ ኣሴ ኪቲን ኢ ቱማስ ማርካቲስ።

³⁴ ታኒ ሄሳ ሂንቴው ኦዴይ፥ ሂንቴ ኣታና ሜላ ጋዳፔ ኣቲን ኣሳ ማርካቴꬂ ታው ኮሺን ጊዴና።

³⁵ ዮሃኒሲ ሙቃዳዳ ኤፂሼ ፖዒስ። ሂንቴ ጉꬃ ዎዴ ኢያ ፖዑዋን ኡፋይቲዴታ።

³⁶ «ሺን ታው ዮሃኒሳፔ ኣꬊያ ማርኪ ዴዔስ። ታኒ ኦꬃና ሜላ ታ ኣዋይ ታው ኢሚዳ ኦሶቲ ታባ ማርካቶሶና፤ ኣዋይ ታና ኪቲዳይሳ ቆንጪሶሶና።

³⁷ «ቃሲ ታና ኪቲዳ ኣዋይካ ባ ሁዔን ታባ ማርካቴስ። ሂንቴ ኢያ ቃላ ኡባራካ ሲዒቤኬታ ዎይኮ ኢያ ማላ ቤዒቤኬታ።

³⁸ ኢ ኪቲዳይሳ ሂንቴ ኣማኖና ጊሾ ኢያ ቃላይ ሂንቴ ዎዛናን ባዋ።

³⁹ «ጌሻ ማፃፋታፔ ሜሪና ዴዖ ዴማናባ ሂንቴው ዳኒን ኤንታ ፒልጌታ፤ ኤንቲ ታባ ማርካቶሶና።

⁴⁰ ሺን ሂንቴ ዴዖ ዴማናው ታኮ ያናው ኮዬኬታ።

⁴¹ «ኣሳፔ ታኒ ቦንቾ ኮዪኬ።

⁴² ሺን ታኒ ሂንቴ ዎዛናን ፆሳ ሲቆይ ባይናይሳ ኤራይስ።

⁴³ ታኒ ታ ኣዋ ማታን ያስ፥ ሺን ታና ሞኪቤኬታ። ሃራይ ባ ማታን ያ ዎዴ ኢያ ሞኬታ።

⁴⁴ ሂንቴ ኢሶይ ኢሱዋፌ ቦንቾ ኮዬይሳቲ፥ ኢሲ ፆሳፌ ያ ጋላታ ኤካናው ኮዮናይሳቲ፥ ዋኒዲ ታና ኣማናናው ዳንዳዔቲ?

⁴⁵ «ታኒ ታ ኣዋ ሲንꬃን ሂንቴና ሞቲያባ ሂንቴው ዳኖፖ። ሂንቴና ሞታናይ ሂንቴ ኡፋይሳን ናጊያ ሙሴ።

⁴⁶ ሂንቴ ሙሴ ኣማኒዳባ ጊዲያኮ ኢ ታባ ፃፊዳ ጊሾ ታናካ ኣማናናሺን።

²⁹ Lo77o oothidayssati de7on daanaw qassi iita oothidayssati pirdda ekkanaw duufoppe denddana.

³⁰ “Taani ta maatan aybibaakka oothanaw dandda7ikke. Xoossay taw odidayssada pirddays. Taani tana kiittidayssi koyabaa oothaysippe attin ta koyabaa oothonna gisho ta pirdday tuma.

³¹ “Taani tabaa markkatiko ta markkatethay tuma gidenna.

³² Tabaa markkattiya hari de7ees; I tabaa markkatteyssi tuma gideyssa taani erays.

³³ “Hintte Yohaannisakko ase kiittin I tumaas markkattis.

³⁴ Taani hessa hinttew odey, hintte attana mela gadappe attin asa markkatethi taw koshshin gidenna.

³⁵ Yohaannisi muqaadada eexishe poo7is. Hintte guutha wode iya poo7uwan ufayttideta.

³⁶ “Shin taw Yohaannisappe aadhdhiya markki de7ees. Taani oothana mela ta Aaway taw immida oosoti tabaa markkattosona; Aaway tana kiittidayssa qonccisoosona.

³⁷ “Qassi tana kiittida Aawaykka ba huu7en tabaa markkattees. Hintte iya qaala ubbarakka si7ibeekketa woykko iya malaa be7ibeekketa.

³⁸ I kiittidayssa hintte ammanonna gisho iya qaalay hintte wozanan baawa.

³⁹ “Geeshsha Maxaafatappe merinaa de7o demmanabaa hinttew daanin entta pilggeeta; entti tabaa markkattosona.

⁴⁰ Shin hintte de7o demmanaw taakko yaanaw koyekketa.

⁴¹ “Asappe taani bonchcho koyikke.

⁴² Shin taani hintte wozanan Xoossaa siiqoy baynnayssa erays.

⁴³ Taani ta Aawa maatan yas, shin tana mokkibeekketa. Haray ba maatan yaa wode iya mokkeeta.

⁴⁴ Hintte issoy issuwafe bonchcho koyeyssati, issi Xoossaafe yaa galata ekkanaw koyonnayssati, waanidi tana ammananaw dandda7etii?

⁴⁵ “Taani ta Aawa sinthan hinttena mootiyabaa hinttew daanoppo. Hinttena mootanay hintte ufayssan naagiya Muse.

⁴⁶ Hintte Muse ammanidabaa gidiyakko I tabaa xaafida gisho tanakka ammananashin.