ዮሃኒሳ 5:24-36 in Dawro

²⁴ «ታኒ ሂንቴንቱሲ ቱሙዋ ኦዳይ፤ ታ ቃላ ሲሲያዎኔ ታና ኪቴዳዋን ኣማኒያዎ ሜꬊና ዴዑ ዴዔ። ሃይቁዋፔ ዴዖ ኢ ፒኔዳዋፔ ኣቲን፥ ፒርዴቴና።

²⁵ ታኒ ሂንቴንቱሲ ቱሙዋ ኦዳይ፤ ሃይቄዳ ኣሳይ ፆሳ ናዓ ኮሻ ሲሲያ ዎዲ ያናዋ፤ ሄዌኔካ ሃዓ። ሄ ኮሻ ሲሲያዋንቱ ሼምፑዋና ዴዓና።

²⁶ ኣዪሲ ጎፔ፥ ኣዎ ዴዑዋ ኢሚያ ዎልቃይ ዴዒያዋዳን፥ ዴዑዋ ኢሚያ ሄ ዎልቃ ባሬ ናዓዉካ ኢሜዳ።

²⁷ ፆሳ ኣዉ ባሬ ናዓው ፒርዲያ ማታ ኢሜዳ፤ ኣዪሲ ጎፔ፥ ናዓይ ኣሳ ናዓ።

²⁸ «ሃዋን ማላሌቶፒቴ፤ ኣዪሲ ጎፔ፥ ዱፉዋን ዴዒያዋንቱ ኣ ኮሻ ሲሲያ ዎዲ ዬ።

²⁹ ሲሲዴ ኡንቱንቱ ዱፉዋፔ ጋፃ ኬሳና፤ ሎዖባ ኦꬄዳዋንቱ ዴዑዋን ዴዓናው ዴንዳና፤ ቃሲ ኢታባ ኦꬄዳዋንቱ ፒርዴታናው ዴንዳናዋንታ።

³⁰ «ታኒ ታፔ ኣይኔ ኦꬃናው ዳንዳዪኬ፤ ፆሳይ ታው ኦዴዳዋዳን ፒርዳይ። ታ ፒርዳይ ቱማ፤ ኣዪሲ ጎፔ፥ ታኒ ታና ኪቴዳዋ ሼኒያ ፖሊያዋፔ ኣቲን፥ ታኒ ዶሲያዋ ኦꬂኬ።

³¹ «ታኒ ታ ሁጴው ታባ ማርካቶፔ፥ ታ ማርካቴꬃይ ቱማ ጊዴና።

³² ታባ ማርካቲያዌ ሃራይ ዴዔ፤ ኢ ታባ ማርካቲያዌ ቱማ ጊዲያዋ ታኒ ኤራይ።

³³ «ሂንቴንቱ ዮሃኒሳኮ ኣሳ ኪቲና፥ ኢ ኡንቱንቶ ቱሙዋ ማርካቴዳ።

³⁴ ታኒ ሄዋ ሂንቴንታ ኣቲኖ ጋዴ ጊያዋፔ ኣቲን፥ ኣሳ ማርካቴꬃይ ታው ኮሺና ጊዴና።

³⁵ ዮሃኒሲ ሙቃዳዳን፥ ኤፄዳኔ ፖዒሴዳ፤ ሂንቴንቱካ ኣማሬዳ ዎዲያ ኣ ፖዑዋን ናሼታናው ኮዬዲታ።

³⁶ «ሺን ታው ዮሃኒሳዋፔ ኣꬊያ ማርካቴꬃይ ዴዔ፤ ኣዪሲ ጎፔ፥ ታኒ ዉርሳናው ታ ኣቡ ታው ኢሜዳ ኪታይ፥ ሃ ታኒ ኦꬂያዌ፥ ኢ ታና ኪቴዳዋ ጊዲያዋ ማርካቴ።

²⁴ “Taani hinttenttussi tumuwaa oday; ta qaalaa sisiyaawoonne taana kiitteeddawaan ammaniyaawoo medhinaa de7uu de7ee. Hayquwaappe de7oo I pinneeddawaappe attin, pirddettenna.

²⁵ Taani hinttenttussi tumuwaa oday; hayqqeedda asay Xoossaa Na7aa kooshshaa sisiyaa wodii yaanawaa; hewenneekka ha77a. He kooshshaa sisiyawanttu shemppuwaanna de7ana.

²⁶ Ayissi gooppe, Aawoo de7uwaa immiyaa wolqqay de7iyaawaadan, de7uwaa immiyaa he wolqqaa bare Na7awukka immeedda.

²⁷ Xoossaa Aawuu bare Na7aw pirddiyaa maataa immeedda; ayissi gooppe, Na7ay Asaa Na7aa.

²⁸ “Hawaan malalettoppite; ayissi gooppe, duufuwan de7iyaawanttu A kooshshaa sisiyaa wodii yee.

²⁹ Sisiide unttunttu duufuwaappe gaxaa kesana; lo77obaa ootheeddawanttu de7uwaan de7anaw denddana; qassi iitabaa ootheeddaawanttu pirddettanaw denddanawantta.

³⁰ “Taani taappe aynne oothanaw danddayikke; Xoossay taw odeeddawaadan pirdday. Ta pirdday tuma; ayissi gooppe, taani taana kiitteeddawaa sheniyaa poliyaawaappe attin, taani dosiyaawaa oothikke.

³¹ “Taani ta huuphew tabaa markkattooppe, ta markkatethay tuma gidenna.

³² Tabaa markkattiyaawe haray de7ee; I tabaa markkattiyaawe tuma gidiyaawaa taani eray.

³³ “Hinttenttu Yohaannisakko asaa kiittina, I unttunttoo tumuwaa markkatteedda.

³⁴ Taani hewaa hinttentta attino gaade giyaawaappe attin, asaa markkatethay taw koshshina gidenna.

³⁵ Yohaannisi muqaaddaadan, eexxeeddanne poo7isseedda; hinttenttukka amareedda wodiyaa A poo7uwan nashettanaw koyyeeddita.

³⁶ “Shin taw Yohaannisawaappe aadhdhiyaa markkatethay de7ee; ayissi gooppe, taani wurssanaw Ta Aabbu taw immeedda kiitay, ha taani oothiyaawe, I taana kiitteeddawaa gidiyaawaa markkattee.