ዮሃኒሳ 11:1-23 in Gofa

¹ ቢታኒያ ጉታን ኣላዛራ ጊያ ኢሲ ኣዴይ ሃርጌቲስ። ቢታኔይ ማይራማኔ ኢ ሚቺያ ማርታ ዴዒያ ጉታ።

² ማይራማ ጎዳ ቶሁዋ ሺቶ ቲያዳ ባ ቢናናን ኢያ ቶሁዋ ቁቺዳሮ። ሃርጌቲዳይ ኢ ኢሻ ኣላዛራ።

³ ሄሳ ጊሾ፥ ሚቼቲ፥ «ጎዳው፥ ኔ ዶሴይሲ ሃርጌቲስ» ጊዲ ዬሱሳኮ ኪቲዶሶና።

⁴ ዬሱሲ ሄሳ ሲዒዳ ዎዴ «ሃ ሃርጌይ፥ ፆሳይኔ ኢያ ናዓይ ቦንቼታና ሜላፔ ኣቲን ሃይቆስ ጋꬂያ ሃርጌ ጊዴና» ያጊስ።

⁵ ዬሱሲ ማርታ፥ ኢ ሚቺዉኔ ኣላዛራ ዶሴስ።

⁶ ሺን ኣላዛሪ ሃርጊዳይሳ ዬሱሲ ሲዒዲ ባ ዴዒያ ቤሳን ናምዑ ጋላስ ጋምዒስ።

⁷ ሄሳፌ ጉዬ፥ ዬሱሲ ባ ታማሬታኮ፥ «ዛሪዲ ዪሁዳ ቢታ ቦስ» ያጊስ።

⁸ ኢያ ታማሬቲ ዛሪዲ፥ «ኣስታማሪያው፥ ጉꬃ ዎዴፔ ካሴ ኣይሁዴቲ ኔና ሹቻን ጫዲዲ ዎꬋናው ኮዪዶሶና፤ ሃዒካ ያ ባኔ?» ያጊዶሶና።

⁹ ዬሱሲ፥ «ኢሲ ጋላሳን ታማኔ ናምዑ ሳቴይ ዴዔስ ጊዴኔዬ? ጋላስ ሃሙቲያ ኣሲ ሃ ኣላሚያ ፖዑዋ ቤዒያ ጊሾ ꬉቤቴና።

¹⁰ ሺን ቃማ ሃሙቲያ ኦኒካ ፖዖይ ባይና ጊሾ ꬉቤቴስ» ያጊስ።

¹¹ ዬሱሲ ሄሳ ጊዳፔ ጉዬ ኤንታኮ፥ «ኑ ዶሲያ ኣላዛሪ ꬊስኪስ፥ ሺን ኢያ ዴንꬃናው ታኒ ባና» ያጊስ።

¹² ኢያ ታማሬቲ ዛሪዲ፥ «ጎዳው፥ ኢ ꬊስኪዳባ ጊዲኮ ኢያው ሎዓና» ያጊዶሶና።

¹³ ዬሱሲ ኣላዛሪ ሃይቂዳይሳ ኦዲስ፥ ሺን ኤንታው ጮ ꬊስኮ ዳኒስ።

¹⁴ ሄሳ ጊሾ፥ ዬሱሲ ጌሺዲ ኤንታኮ፥ «ኣላዛሪ ሃይቂስ።

¹⁵ ሂንቴ ኣማናና ሜላ ታኒ ሄ ቤሳን ዴዖናይሳስ ሂንቴ ጊሾ ኡፋይታይስ። ኣኔ ዬꬊቴ፤ ኢያኮ ቦስ» ያጊስ።

¹⁶ ሄሳፌ ጉዬ፥ ዲዲሞሳ ጌቴቲያ ቶማሲ ባ ላጌ ታማሬታኮ፥ «ኣስታማሪያራ ሃይቃናው ኑካ ቦስ» ያጊስ።

¹⁷ ዬሱሲ ጋኪያ ዎዴ ኣላዛሪ ሞጌቲን ኦይዱ ጋላስ ጊዲስ።

¹⁸ ቢታኔይ ዬሩሳላሜፔ ሄꬑ ኪሎ ሚቲሬ ሜላ ሃኬስ።

¹⁹ ዳሮ ኣይሁዴቲ ማርታኔ ማይራሞ ኤንታ ኢሻይ ሃይቂዳይሳስ ሚንꬄꬃናው ዪዶሶና።

²⁰ ማርታ ዬሱሲ ዪዳይሳ ሲዓዳ ኢያ ሞካናው ኬያሱ፥ ሺን ማይራማ ሶን ኣታሱ።

²¹ ማርታ ዬሱሳኮ፥ «ጎዳው፥ ኔኒ ሃይሳን ዴዒዳባ ጊዲያኮ ታ ኢሻይ ሃይቄና።

²² ሺን ሃዒ ጊዲኮካ ኔኒ ዎሲያባ ፆሳይ ኔው ኢማናይሳ ታኒ ኤራይስ» ያጋሱ።

²³ ዬሱሲ፥ «ኔ ኢሻይ ሃይቆፔ ዴንዳና» ያጊስ።

¹ Bitaaniya gutan Alaazara giya issi addey harggettis. Bitaaney Mayraamanne I michchiya Martta de7iya guta.

² Mayraama Godaa tohuwa shitto tiyada ba binaanan iya tohuwa quchchidaaro. Harggettiday I ishaa Alaazara.

³ Hessa gisho, michcheti, “Godaw, ne doseyssi harggettis” gidi Yesuusakko kiittidosona.

⁴ Yesuusi hessa si7ida wode “Ha harggey, Xoossaynne iya Na7ay bonchchettana melappe attin hayqos gathiya hargge gidenna” yaagis.

⁵ Yesuusi Martta, I michchiwunne Alaazara dosees.

⁶ Shin Alaazari harggidayssa Yesuusi si7idi ba de7iya bessan nam77u gallas gam77is.

⁷ Hessafe guye, Yesuusi ba tamaaretakko, “Zaaridi Yihuda biittaa boos” yaagis.

⁸ Iya tamaareti zaaridi, “Asttamaariyaw, guutha wodeppe kase Ayhudeti nena shuchchan caddidi wodhanaw koyidosona; ha77ika yaa baanee?” yaagidosona.

⁹ Yesuusi, “Issi gallasan tammanne nam77u saatey de7ees gidenneyye? Gallas hamuttiya asi ha alamiya poo7uwa be7iya gisho dhubettenna.

¹⁰ Shin qamma hamuttiya oonikka poo7oy baynna gisho dhubettees” yaagis.

¹¹ Yesuusi hessa gidaappe guye enttako, “Nu dosiya Alaazari dhiskkis, shin iya denthanaw taani baana” yaagis.

¹² Iya tamaareti zaaridi, “Godaw, I dhiskkidabaa gidikko iyaw lo77ana” yaagidosona.

¹³ Yesuusi Alaazari hayqqidayssa odis, shin enttaw coo dhiskko daanis.

¹⁴ Hessa gisho, Yesuusi geeshshidi enttako, “Alaazari hayqqis.

¹⁵ Hintte ammanana mela taani he bessan de7onnayssas hintte gisho ufayttays. Ane yedhdhite; iyaakko boos” yaagis.

¹⁶ Hessafe guye, Didimoosa geetettiya Toomasi ba lagge tamaaretakko, “Asttamaariyara hayqqanaw nukka boos” yaagis.

¹⁷ Yesuusi gakkiya wode Alaazari moogettin oyddu gallas gidis.

¹⁸ Bitaaney Yerusalaameppe heedzu kilo mitire mela haakkees.

¹⁹ Daro Ayhudeti Marttanne Mayraamo entta ishay hayqqidayssas minthethanaw yidosona.

²⁰ Martta Yesuusi yidayssa si7ada iya mokkanaw keyasu, shin Mayraama son attasu.

²¹ Martta Yesuusakko, “Godaw, neeni hayssan de7idabaa gidiyakko ta ishay hayqqenna.

²² Shin ha77i gidikkoka neeni woossiyabaa Xoossay new immanayssa taani erays” yaagasu.

²³ Yesuusi, “Ne ishay hayqoppe denddana” yaagis.