9 Wɑɑtʋ wei pɑ nɩɩ tɔm tǝnɛ ɩlɛnɑ, pɑ́ sʋʋ lɔɔlʋɣʋ kɛ kʋlʋm kʋlʋm. Pǝ kpɑɣɑʋ sɔsɑɑ nɑ pǝ́ polo piyɑ tɔ. Hɑlɩ pǝ́ kɔɔ pǝ́ yele Yesu tike nɑ ɑlʋ ɩnɩ, nɑ ɩ́ sǝŋɑ tǝnɑɣɑ tɑm.
10 Yesu kɔmɑ nɑ ɩ́ kʋlɩ ɩlɛnɑ ɩ́ tɔmɩ-ɩ sɩ: Alʋ nyɑ́, nyɑ́ yǝlɑɑ mpɛ pɑ wele? Ntɔŋ nɔɣɔlʋ tɑ lɑ-ŋ pʋlʋ?
11 Ɩlɛnɑ ɑlʋ cɔ sɩ: Nn Tɑcɑɑ. Yesu cɔ-ɩ sɩ: Tɛɛ, mɑ tɔtɔ mɑ kɑɑ yɔɣɔtɩ sɩ pɑ́ lɑ-ŋ pʋlʋ. Amɑ tɑɑ tɑsɑ ɩsɑɣɑtʋ kɛ́.
12 Ḿpʋ́ɣʋ́ Yesu mǝlɑ ɩ sɛɣɛsʋɣʋ tɑɑ sɩ: Mɑ wɛɛ kɛ́ ɩsɩɩ kɔkɔ ŋkɑ kɑ nɑɑ yǝlɑɑ tɔ. Ye wei ɩ tǝŋǝɣɩ-m, kɔkɔ ŋkɑ kɑ kɔŋnɑ weesuɣu tɔ kɑɑ nɑɑ-ɩ nɑ ɩ́ tɔŋ. Ɩ kɑɑ fɛlɩ sǝkpɛtʋɣʋ tɑɑ kɛ́ nɔɔhǝlɛ kɛ pɑɑ pǝcɔ tǝtɑ.
13 Tǝnɑɣɑ Fɑlisɑnɑɑ tɔmɑ-ɩ sɩ: Ɩsɩɩ n kɛɛsʋɣʋʋ nyɑ́ tɩ tɔm kɛ mpʋ tɔ, pǝ fɛɩnɑ nyʋɣʋ se.
14 Ḿpʋ́ɣʋ́ Yesu cɔ-wɛ sɩ: Pɑɑ mɑ kɛɛsǝɣɩ mɑ tɩ tɔm, tǝ wɛ tɑmpɑnɑ tɔɣɔ. Pǝ tɑɣɑ pʋlʋ, mɑ nyǝmɑ́ timpi mɑ lɩɩnɑɑ tɔ, pǝ́cɔ́ mɑ nyǝmɑ́ timpi mɑ puki tɔ. Amɑ mǝ tɑ nyɩ mɑ tǝlɩɩlɛ, pǝyele ɩ́ tɑ nyɩ mɑ tǝpote.
15 Mǝ hʋʋkɩ yʋlʋhʋʋlɛ kɛ yem kɛ́. Amɑ mɑ ɩlɛ mɑɑ hʋʋkɩ nɔɣɔlʋ tɔm kɛ mɑ tɑɑ.
16 Ɩlɛ pɑɑ mɑ tɩɩ hʋʋwɑ, tɑmpɑnɑ tɔɔ kɛ́. Pǝ tɑɣɑ pʋlʋ, mɑ fɛɩ mɑ tike tɔ se: Amɑ mɑ́ nɑ mɑ Cɑɑ wei ɩ tilɑ-m tɔɣɔ.
17 Pɑ ŋmɑɑwɑ mǝ kʋsǝsɩɩtʋ tɑkǝlɑsɩ tɑɑ sɩ: Ye yǝlɑɑ nɑɑlɛ lǝsɑ ɑseetɑ kʋlʋm, pɑ ɑseetɑ ɩnɩ ɩ wɛ tɑmpɑnɑ.
18 Mɑ, mɑ yɔɣɔtǝɣɩ mɑ tɩ tɔm nɑ mɑ Cɑɑ wei ɩ tilɑ-m tɔ, ɩ́lɛ́ ɩ yɔɣɔtǝɣɩ mɑ tɔm kɛ mpʋ tɔtɔ.
19 Ḿpʋ́ɣʋ́ Fɑlisɑnɑɑ pɔɔsɑ Yesu sɩ: Leɣe nyɑ́ Cɑɑ ɩnɩ ɩ wɛɛ? Tǝnɑɣɑ Yesu cɔ Fɑlisɑnɑɑ sɩ: Ɩ́ tɑ nyɩ mɑ́, pǝyele ɩ tɑ nyɩ mɑ Cɑɑ. Ye ɩ́ kɑ nyǝmɑ-m, ɩ́ kɑ nyǝmɑ́ mɑ Cɑɑ tɔtɔ.
20 Yesu yɔɣɔtɑ tɔm tǝnɛɣɛ ɩ sɛɣɛsʋɣʋ tɑɑ kɛ́ Ɩsɔ tǝsɛɛlɛ tɑɑ kɛ́ kʋcɔɔŋ tǝtʋlɛ cɔlɔ. Nɑ nɔɣɔlʋ tɑ kpɑ-ɩ, ɩ wʋlɛ tɑ tɑtɑ tɔ pǝ tɔɔ.
21 Ḿpʋ́ɣʋ́ Yesu tɑsɑ-wɛɣɛ heeluɣu sɩ: Mɑ tɛɛkɩ nɑ ɩ́ kɑ́ pɛɛkɩ-m. Amɑ ɩ́ kɑ́ sɩ mǝ ɩsɑɣɑtʋ tɑɑ. Mpi tɔ, ɩ́ kɑɑ pǝsɩ nɑ ɩ́ polo timpi mɑ puki tɔ.
22 Tǝnɑɣɑ Yutɑ nyǝ́mɑ tɔmɑ sɩ: Ɩ kɑ́ kʋ ɩ tɩ, yɑɑ ɩsǝnɑɣɑlɛ ɩ tɔŋ sɩ tɑ́ kɑɑ pǝsɩ nɑ tǝ́ polo timpi ɩ puki tɔ?
23 Ḿpʋ́ɣʋ́ Yesu tɔmɑ Yutɑ nyǝ́mɑ sɩ: Mǝ kɛ́ ɑtɛ nyǝ́mɑ kɛ́. Amɑ mɑ́, mɑ kɛ́ ɩsɔtɑɑ tʋ. Mǝ kɛ́ ɑntulinyɑ ɩnɛ ɩ nyǝ́mɑ. Amɑ mɑ́ tɑ́ kɛ́ ɑntulinyɑ ɩnɛ ɩ nyǝŋ.
24 Pǝ tɔɔ ɩnǝɣɩ mɑ heeliɣi-mɛ sɩ, ɩ́ kɑ sɩ mǝ ɩsɑɣɑtʋ tɑɑ. Ye ɩ tɑ tisi sɩ tɑmpɑm mɑ wɛɛ, ɩ́ kɑ́ sɩ mǝ ɩsɑɣɑtʋ tɑɑ.
25 Ɩlɛnɑ pɑ́ pɔɔsɩ-ɩ sɩ: Ɩlɛ n tɩɩ kɛ́ ɑweɣe tǝkpem ye? Tǝnɑɣɑ Yesu cɔ Yutɑ nyǝ́mɑ sɩ: Mɑ kɛ́ wei ɩ tɔm mɑɑ heelɑ-mɛɣɛ hɑtoo kɑncɑɑlɑɣɑ tɔ.
26 Mɑ wɛnɑ tɔm pɑɣɑlɛ nti mɑɑ yɔɣɔtɩ mǝ tɔɔ nɑ nti mɑɑ hʋʋnɑ-mɛ tɔ. Ɩlɛ wei ɩ tilɑ-m tɔ ɩ kɛ́ tɑmpɑnɑ tʋ, nɑ nti mɑ nɩɩ ɩ kiŋ tɔ, tǝ tike kɛ mɑ heeliɣi ɑntulinyɑ tɑɑ.
27 Pɑ tɑ cɛkǝnɑ sɩ Tɑcɑɑ Ɩsɔ tɔm kɛ ɩ heeliɣi-wɛ.
28 Tǝnɑɣɑ Yesu tɔmɑ-wɛ sɩ: Wɑɑtʋ wei ɩ́ kɑ́ kpɑɑsɩ Yʋlʋ Pǝyɑɣɑ mɑ́ ɩlɛ, wɑɑtʋ ɩnǝɣɩ ɩ́ kɑ́ nyɩ sɩ, mɑɣɑlɛ wei ɩnɩ tɔ. Nɑ ɩ́ kɑ́ nyɩ tɔtɔ sɩ, mɑɑ lɑkɩ pʋlʋ nɑ mɑ mɑɣɑmɑɣɑ mɑ kɑŋkɑntɛ. Amɑ nti Tɑcɑɑ Ɩsɔ sɛɣɛsɑ-m tɔɣɔ mɑ lɑkɩ.
29 Wei ɩ tilɑ-m tɔ ɩ wɛ mɑ wɑɑlɩ, ɩ tɑ yele-m mɑ tike. Mpi tɔ, ɩ luɣu tɛɛ nyǝntʋ kɛ mɑ lɑkɩ.
30 Yesu yɔɣɔtɑ mpʋ ɩlɛnɑ pɑɣɑlɛ mʋ-ɩ.
31 Ḿpʋ́ɣʋ́ Yesu heelɑ Yutɑ nyǝ́mɑ mpɑ pɑ mʋ-ɩ tɔ sɩ: Ye ɩ́ tǝŋǝɣɩ mɑ tɔm kɛ teu, ɩ́ kɑ́ pǝsɩ mɑ ɩfɑlɑɑ nɑ tɑmpɑnɑ.
32 Nɑ ɩ́ kɑ́ nyɩ tɑmpɑnɑ, nɑ tɑmpɑnɑ ɑnɩ ɑ kɑ́ cɛnɑ-mɛɣɛ mǝ yomle tɑɑ.
33 Ḿpʋ́ɣʋ́ pɛlɛ pɑ cɔ-ɩ sɩ: Tǝ kɛ́ Apǝlɑhɑm lʋlʋɣʋ kɛ́, nɔɣɔlʋ tɑɑ kpɑ-tʋɣʋ yomle kɛ pɑɑ pǝcɔ. Ɩlɛ pepe cɛpʋ kɛ n tɔŋ sɩ pɩɩ cɛ-tʋ?
34 Tǝnɑɣɑ Yesu cɔ-wɛ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, wei ɩ lɑkɩ ɩsɑɣɑtʋ tɔ, pʋntʋ pǝsɑ tǝ yom kɛ́.
35 Nɑ yom nɑ́ wɛ sɑŋɑ kɛ́, ɩ fɛɩ cele. Amɑ tǝyɑɣɑ pǝyɑɣɑ nɑ́ wɛ tɑm.
36 Ɩlɛ ye Pǝyɑɣɑ mɑ́ mɑ hɛtɑ-mɛ, mǝ yomle tɛmɑ tɑmpɑnɑ tɛm kɛ́.
37 Mɑ nyǝmɑ́ sɩ ɩ́ kɛ́ Apǝlɑhɑm lʋlʋɣʋ nyǝ́mɑ te. Pɑɑ nɑ mpʋ, ɩ́ pɛɛkǝɣɩ mɑ kʋɣʋ. Pǝ tɑɣɑ pʋlʋ, ɩ́ kisiɣi mɑ kʋsɛɣɛsǝtʋ.
38 Nti mɑ Cɑɑ nɑ́ hʋlɑ-m tɔɣɔ mɑ yɔɣɔtǝɣɩ, nɑ mɩɩ lɑkɩ nti mǝ cɑɑ nɑ́ heelɑ-mɛ tɔ.
39 Ḿpʋ́ɣʋ́ Yutɑ nyǝ́mɑ cɔ-ɩ sɩ: Aɑɩ tɑ́ cɑɑ kɛlɛ Apǝlɑhɑm. Tǝnɑɣɑ Yesu cɔ-wɛ sɩ: Ye tɑmpɑnɑ ɩ́ kɑ kɛ́ Apǝlɑhɑm piyɑ, ɩsǝntɔ ɩ́ kɑ lɑkɑɣɑ Apǝlɑhɑm kʋlɑpʋtʋ mɛɛ.
40 Anɩ tɑmpɑnɑ nnɑ mɑ nɩɩ Ɩsɔ kiŋ tɔ, ɑ tike kɛ mɑ heelɑ-mɛ, pǝ́cɔ́ pɑɑ nɑ mpʋ ɩ́ cɑɑ ɩ́ kʋ-m tǝkpem. Ɩlɛ Apǝlɑhɑm nɑ́ tɑɑ lɑ mpʋ.
41 Mǝ cɑɑ kʋlɑpʋtʋ kɛ ɩ́ lɑkɩ. Tǝnɑɣɑ Fɑlisɑnɑɑ cɔ Yesu sɩ: Tǝ tɑ kɛ ɑpɑlɑɑ nɑɑlɛ piyɑ se. Amɑ tɑ Cɑɑ kɛ kʋlʋm kɛ́, ɩnǝɣǝlɛ Ɩsɔ.
42 Ɩlɛnɑ Yesu tɔ Fɑlisɑnɑɑ sɩ: Ye tɑmpɑnɑ, Ɩsɔ kɑ kɛ́ mǝ Cɑɑ, ɩ́ kɑ sɔɔlɑ-m. Mpi tɔ, ɩ kiŋ kɛ mɑ lɩɩnɑɑ, nɑ ɩ kɔntɛ kɛ mɑ kɔmɑ. Mɑ tɑ kɔɔ mɑ mɑɣɑmɑɣɑ mɑ kɔntɛ. Amɑ ɩnɩ ɩ tilinɑ-m.
43 Pǝ tɑɣɑ pʋlʋ tɔɔ kɛ́ ɩɩ cɛkǝɣǝnɑ mɑ kʋyɔɣɔtʋtʋ, ɩɩ cɑɑ tǝ nɩɩʋ kɛ pɑɑ pǝcɔ tɔɣɔ.
44 Mǝ Cɑɑ kɛlɛ Ɩlɔɣɔʋ, nɑ ɩ luɣu nyǝntʋ kɛ mǝ sɔɔlɑ lɑpʋ. Hɑtoo kɑncɑɑlɑɣɑ ɩ́lɛ́ ɩ kɛ́ yʋlʋkʋlʋ kɛ́, ɩɩ cɑɑ tɑmpɑnɑ tǝŋʋɣʋ kɛ pɑɑ pǝcɔ. Pǝ tɑɣɑ pʋlʋ, ɩ mɑɣɑmɑɣɑ ɩ tɑ kɛ tɑmpɑnɑ tʋ tɔ pǝ tɔɔ. Wɑɑtʋ wei ɩ yɔɣɔtǝɣɩ pɔpɔtʋ tɔ, ɩ tǝnɑɣɑlɛ tǝnɑ. Mpi tɔ, ɩ mɑɣɑmɑɣɑ ɩ kɛ́ pɔpɔtʋ, nɑ pɔpɔtʋ tǝnɑ cɑɑ kɛ́.
45 Ye mɑ, tɑmpɑnɑ kɛ mɑ yɔɣɔtǝɣɩ. Pǝ mɑɣɑmɑɣɑ pǝ tɔɔ kɛ́ ɩɩ mʋɣɩ mɑ tɔm.
46 Mǝ tɑɑ ɑwe pǝsǝɣɩ nɑ ɩ́ hʋ́lɩ́ mɑ tǝpǝntǝlɛ? Tɔʋ, nɑ mɑ tɩɩ yɔɣɔtǝɣɩ tɑmpɑnɑ tɔ, pepe tɔɔ kɛ́ ɩɩ sɑŋ mʋɣʋ?
47 Wei ɩ kɛ́ Ɩsɔ nyǝŋ tɔ, pʋntʋ nɩɩkɩ Ɩsɔ Tɔm kɛ́. Amɑ mǝ tɑ́ kɛ́ Ɩsɔ yǝlɑɑ nɑpǝlɩ, nɑ pǝ tɔɔ ɩnǝɣɩ ɩɩ tɩɩ nɩɩkɩ.
48 Tǝnɑɣɑ Yutɑ nyǝ́mɑ cɔ-ɩ sɩ: Pǝ tɑɣɑ ɩsǝntɔ tɔɔ kɛ́ tɩɩ tɔmɑ sɩ n kɛ́ Sɑmɑlii tʋ, pǝ́cɔ́ n hii ɑlɔɣɑɑ?
49 Ḿpʋ́ɣʋ́ Yesu cɔ-wɛ sɩ: Mɑ tɑ hii ɑlɔɣɑɑ kɛ pɑɑ pǝcɔ. Amɑ mɑ Cɑɑ kɛ mɑ seeki. Nɑ mɛ, mɩɩ nyǝnǝɣɩ-m yem tǝkpɑtɑɑ.
50 Pǝ tɑɣɑ ɩsɩɩ mɑ́ pɛɛkǝɣǝnɑ mɑ mɑɣɑmɑɣɑ mɑ teeli kɛ mɑ tɩ. Nɔɣɔlʋ tʋɣʋnɑ-m teeli nɑ ɩ́ hɑɑkɩ-m tɑmpɑnɑ.
51 Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, ye wei ɩ tɔkǝɣɩ mɑ tɔm, pʋntʋ kɑɑ sɩ.
52 Tǝnɑɣɑ Yutɑ nyǝ́mɑ tɔmɑ Yesu sɩ: Pǝnɛɣɛlɛ tǝ nyǝmɑ́ tǝkpɑtɑɑ sɩ n kɛ́ ɩlɔɣɔhilu. Apǝlɑhɑm sǝpɑ, nɑ Ɩsɔ kʋyɔɣɔtʋtʋ tɛlǝsǝlɑɑ nɑ́ɑ́ sɩ tɔtɔ, ɩlɛnɑ nɑ́ɑ́ tɔŋ sɩ, wei ɩ́ tɔkɑ nyɑ́ tɔm pʋntʋ kɑɑ sɩ?
53 Tɑ cɑɑ Apǝlɑhɑm nɑ́ sǝpɑ, ye mpʋ nyɑ́ hʋʋ sɩ n kǝlɑ ɩlɛɣɛlɛ? Ɩsɔ kʋyɔɣɔtʋtʋ tɛlǝsǝlɑɑ mɑɣɑmɑɣɑ nɑ́ sǝpɑ tɔtɔ. Ɩlɛ n nyǝnǝɣɩ nyɑ́ tǝɣɩ we?
54 Ḿpʋ́ɣʋ́ Yesu cɔwɑ sɩ: Ye mɑɑ tʋkɑɣɑnɑ mɑ tǝɣɩ teeli, ɩlɛ mɑ teeli ɩnɩ ɩ tɑɑ kɛ́ pʋlʋ se. Amɑ mɑ teeli tʋlʋ ntɛ́ mɑ Cɑɑ, wei mǝ tɔŋ sɩ ɩ kɛ́ mǝ Ɩsɔ tɔ.
