22 Bɛ̀ í yie mmɛ̀ɛ̀ kpɛ́í nku kpɛti, bɛ̀ í tɑ̃́mɛ̀ kɛ dò nkù bo bɛ̀ dɛɛtɛ́.
23 Mɛmmɛ kù pɛ́immɛ̀ yɛwɛtɛ̀, kɛ́kpetɛ́ yɛwɛtibòrɛ̀,
24 kɛ́cṹũnní mɑ́nnì, kɛĩ́nkɛ̀ kó mudiì mmu kù do bɛ̀ duɔnnímɛ̀.
25 Bɛmbɛ bɛnìtìbɛ̀ kɛ̀ bɛ̀ɛ di bɛnitidiɛbɛ̀ kó mudiì, kɛ̀ kù mbɛ̀ duɔ̀ mudiì bɛ̀ dɔ́ mɛ̀ɛ̀ botí.
26 Kɛ̀ Kuyie nduɔ́ nkɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkùu fuutɛ, nɛ̀ ku kó tikpetì miɛkɛ kɛ̀ kùu duɔ́ nkɛ̀ kubɑkù cɑ̃̀nku kó kuyɑɑkùu fuutɛ.
27 Kɛ̀ kùu cṹũnní imɑɑ mbɛ cuokɛ̀ kɛ̀ ì nsũ kɛ dò mmubirímú, kɛ́tɔní yɛpɛ̀pɛ́rɛ̀ kɛ̀ yɛ̀ nsũ dɑ̀mɛ́ɛ̀rì kó mubirímú dòmmɛ̀.
28 Kɛ̀ Kuyie nduɔ́ nkɛ̀ yɛ̀ nduò bɛ kɑrì kɛ ncóú cóú kɛ́fitɛ́ bɛ touti.
29 Kɛ̀ bɛ̀ɛ di bɛ̀ dɔ́mɛ̀ kɛ́nsɑ̀nnɛ̀, kɛ̀ kùu bɛ̀ duɔ́ mbɛ yɛ̀mmɛ̀ kó mudiì.
30 Kɛ̀ bɛ̀ nkpɑɑ́ kɛ mu nyí mù dɛ, kɛ̀ dɛ kó tidiitì nkpɑɑ́ bo bɛ nɔ̀ miɛkɛ,
31 Kɛ̀ Kuyie mmiɛkɛɛ bɛ yɛ̀, kɛ̀ kùu kuɔ yɛdɑkperɛ̀, nɛ̀ bɛdɑpɑ̀mbɛ̀ Isidɑyɛɛribɛ cuokɛ̀.
32 Bɑ́ nɛ̀ mɛmmɛ kɛ̀ bɛ̀ nsɔkɛ́ kɛ cɑɑri, bɛ̀ í nyie nkɛ́ntɑ̃́ Kuyie ndɔ̀ɔ̀ tìì diɛtì.
33 Mɛmmɛ kɛ̀ Kuyie mbɛ̀ fùùtɛ muyɑɑ́ nkɛ̀ bɛ̀ɛ kú, kɛ̀ mɛyɛi mbɛ̀ do kɛ kṹntɛ́ bɛ fòmmu.
34 Kɛ̀ Kuyie mbɛ̀ potɛ́ dìì mɔ̀nnì bɛ̀ɛ kù wɑmmú, kɛ́wɛ̃ɛ̃tɛní ku bíɛ́kɛ̀, kɛ́cokɛ́ní ku borɛ̀,
35 kɛ́dentɛní Kuyie nkuù do túmɛ̀ bɛ kó dipèrì, kunku kùù bɑkɛ́ kɛĩ́nkɛ̀ nɛ̀ kɛtenkɛ̀ kuù tumɛ̀ bɛ kóo donti.
36 Kɛ nɛ́ nku cií, kɛ kù nɑ̀ɑ́ nsiyɑ́ɑ̀bìsí mɑ́ɑ̀.
37 Bɛ yɛ̀mmɛ̀ do í fííkú ku ĩ́nkɛ̀, bɛ̀ í mpĩ́ nkù bɛ̀ dɔ̀ɔ̀nɛ̀ mɛ̀ɛ̀ tɑummɛ̀.
38 Nɛ̀ ku sémmɛ̀ diɛmɛ̀ kpɛ́í nkɛ̀ kù mbɛ̀ cĩ́ɛ̃́mmu, bɑ́ kù í mbɛ̀ kùɔ kɛ́deè, kucɛ mɛ̀pɛ́u kɛ́ mbɛ̀ mɔ̀kɛnɛ̀ mɛminnímɛ̀ bɑ́ kù í nyóu kɛ̀ ku miɛkɛɛ bɛ̀ yɛ̀ mɛdiɛ̀.
39 Kù do yɛ̃́mu bɛ̀ tumɛ̀ bɛnìtìbɛ̀ mbɛ, kɛ do mmuyɑɑ́ kɛ yóó pɛ̃ɛ̃tɛ́ kɛ̀ dɛ̀ɛ deè.
40 Kɛ̀ bɛ̀ɛ yetɛ ku kpɛti kucɛ mɛ̀pɛ́u dikpɑ́ɑ̀ miɛkɛ, kɛ́mpɛ́íkùnko ku miɛkɛ kucɛ mɛ̀pɛ́u tɛdɔnkpetɛ̀ ĩ́nkɛ̀.
41 Kɛ̀ bɛ̀ nsɔkɛ́ kɛ beú Kuyie, kɛ íinko ku miɛkɛ kunku kùù bɛ̀ te bɛmbɛ Isidɑyɛɛribɛ.
42 Bɛ̀ í ndenniní Kuyie nwɛ̃rímú kpɛ́í, bɛ̀ í nkpɑɑ́ yɛ̃́ kù bɛ̀ dɛɛtɛ́ dìì yiè nɛ̀ bɛ dootitɔbɛ̀.
43 Bɛ̀ í kpɑɑ́ yɛ̃́ kuù do dɔ̀ɔ̀mɛ̀ tidiɛtì Esibiti, nɛ̀ kù do dɔ̀ɔ̀ mɛ̀ɛ̀ bɛnkùmɛ̀ Soɑ̃ɑ̃ tempɛ̃.
44 Bɛ̀ í kpɑɑ́ yɛ̃́ kù do cèètɛmɛ̀ ikó nkó mɛniɛ kɛ̀ mɛ̀ɛ nɑɑ́ mmɛyĩ̀ĩ̀, kɛ̀ Esibiti kɔbɛɛ mɛ yĩɛ̃kɛ muyɑ̃̀ɑ̃̀.
45 Kù do duɔ́mmɛ̀ kɛ̀ sikonsɑpoo yɛ̀nní kɛ́ mbɛ̀ dɔmmù, kɛ̀ yɛcɛdɑkɛ̀ɛ píɛ nkɛ cɑkɛ dihɛì.
46 Kɛ̀ fɛcofɛɛ cɑ́ɑ́kɛ́ bɛ diitì, kɛ̀ yɛcɑ́dúɔ̀ ndɛ́útóo bɛ ɔ̀ùtì kó mucɔ̃́ntimu.
47 Kɛ̀ fɛtɑɑfɛ̀ mɑ́tɑ̃́rɛ̀ɛ cɑkɛ bɛ tie mbɛ̀ tu dɛ̀ fínyĩ̀, kɛ̀ fɛtɑdiɛ̀fɛ̀ɛ kuɔ dɛtie mbɛ̀ tu dɛ̀ Sìkòmɔ́ɔ̀.
48 Kɛ̀ fɛtɑɑfɛ̀ mɑ́tɑ̃́rɛ̀ɛ kuɔ bɛ wũɔ̃, kɛ̀ fɛtɑpíɛ̀fɛ̀ɛ kuɔ bɛ nɑɑcɛ̃nti.
49 Kɛ̀ ku miɛkɛɛ bɛ̀ pɛikɛ mɛsɑ̀ɑ̀, kɛ́fɑ̃ntɛ kɛ́ bɛ̀ tùɔ nkɛ̀ dɛ̀ nyóù mɛdiɛ̀, kɛ̀ kùu bɛ̀ duɔnní ku tɔ̃rɛ̀ yɛ̀ɛ̀ kɔ̀ù kucɛ̃nku.
50 Ku miɛkɛ do bɛ̀ yɛ̀mu kɛ́tontɛ́, bɑ́ kù í mbɛ̀ coo, kɛ́ bɛ̀ bɔntɛ́ mutenkṹṹ nyɛimu,
51 kɛ́potɛ́ bɛ̀ɛ̀ kó dimɑ̀ɑ̀ tu Mpo bɛmɔu Esibiti, bɛ̀ɛ̀ kó dimɑ̀ɑ̀ do tú bɛketibɛ̀ Kɑmmu kó kuwuɔ mmiɛkɛ.
52 Kɛ̀ kùu dennɛ ku nìtìbɛ̀ onìtì ɔ̃ɔ̃ dennɛmɛ̀ o pe, kɛ́ mbɛ̀ cɛ̃mmú onìtì ɔ̃ ncɛ̃mmúmɛ̀ o wũɔ̃ dikpɑ́ɑ̀ miɛkɛ.
53 Kɛ̀ kù mbɛ̀ cɛ̃mmú bɛ́ù bɑ́ bɛ̀ í nyĩɛ̃̀kù, kɛ̀ mɛniɛ mpɔ̃ntɛ́nɛ̀ bɛ dootitɔbɛ̀.
54 Kɛ̀ kùu bɛ̀ tɑnnɛ́ bɛ ɛì kù cɑ̃̀ńnɛ́ dì bɛ kpɛ́í, ku tɑ̃sɑ̀ɑ̀rì kù fìètɛ dì nɛ̀ ku wɛ̃rímú.
55 Kɛ̀ kùu bɛti yɛbotɛ̀ yɛ̀ɛ̀ do dɛ̀ bo, kɛ́berí kɛtenkɛ̀ kɛ́ bɛ̀ totí, kɛ̀ Isidɑyɛɛribɛ tiekɛ bɛ cɛ̃́ĩ kɛ́mbo.
56 Nɛ̀ mɛmmɛ kɛ̀ bɛ̀ nyíinko Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku miɛkɛ, kɛ́yetɛ ku kpɛti, bɛ̀ í ndɑkɛ ku kuɔ́ kpɛti.
57 Kɛ̀ bɛ̀ɛ dɛ́tɛ́nɛ̀ Kuyie mbɛ yɛmbɛ̀ kɔ̃mɛ, kɛ́ nkù soú kɛ í ndò nhɑ́ nɑ kɛ́ mbɛ̀ tɑ̃́, mutɑ̃mmù mùù í fĩ mmɛsɑ̀ɑ̀ mu kɔ̃mɛ.
58 Kɛ̀ bɛ̀ nfeu yɛtɔ̀rɛ̀ kɛ íinkoo Kuyie mmiɛkɛ, kɛ feu yɛbɔkɛ̀ kɛ̀ dɛ̀ kù yóù.
59 Kɛ̀ Kuyie ndɛ̀ yɑ̀ kɛ̀ kù miɛkɛɛ pɛikɛ, kɛ̀ kùu pɛ̃ nyIsidɑyɛɛribɛ pɑ́íí.
60 Kɛ̀ dɛɛ̀ nte kɛ̀ kùu ítɛ́ ku kɑ̀rì Sidoo, di tou kù do bo dì bɛnìtìbɛ̀ cuokɛ̀.
61 Kɛ̀ kùu yóu kɛ̀ ibotí tɛì kònnɛ̀ ku tɑummɛ̀ tɔu, dìì bɛnkú ku diɛtì nɛ̀ ku wɛ̃rímú kɛ̀ dìi tɑ bɛ dootitɔbɛ̀ nɔu miɛkɛ.
62 Kɛ̀ kùu yóu kɛ̀ bɛ̀ nkɔù ku nìtìbɛ̀, ku miɛkɛ kɛɛ̀ do yɛ̀ ku kó bɛnìtìbɛ̀ kù te bɛ̀.
63 Kɛ̀ muhɑ̃ɑ̃́ ncɔ́útɛ́ bɛdɑcɛ̃mbɛ̀, kɛ̀ bɛporicɛ̃mbɛ̀ɛ pɑɑ̀ bɛ dɑɑbɛ̀.
64 Kɛ̀ ikuɔ́ nìùbɛ̀ɛ kú mudoò miɛkɛ, bɑ́ bɛkúpobɛ̀ í nkuɔ́.
65 Kɛ̀ ti Yiɛ̀ nKuyie nyítɛ́ kɛ́ndò nkù do yɛ̃̀ nkɛ duɔ́, okpɑ̀rìnuɔnti ɔ̃ɔ̃ yɑ̃̀ mɛnɑɑ̀ nkɛ́muɔ́ kɛ̀ mɛ̀ɛ̀ íimmɛ̀ o kɔ̃̀ntì.
66 Kɛ̀ bɛ̀ ncooti kɛ̀ kù tũ nkɛ poti, kɛ̀ bɛ̀ɛ dì ifɛi sɑ̃́ɑ̃̀.
67 Kɛ̀ kùu dootóo Sosɛfu kó tɛcĩ́ɛ̃̀tɛ̀, kɛ́yetɛ kù bo tɑ̃ɑ̃tɛ́mɛ̀ Efɑdɑimmu kó kuwuɔ.
68 Kɛ nɛ́ tɑ̃ɑ̃tɛ́ Sudɑɑ kó kuwuɔ, Siyɔ̃ɔ̃ tɑ̃rì kù dɔ́ dì.
69 Kù dɛ nfìí nku cĩ́ɛ̃̀tɛ̀ kɛ̀ tɛ okùmɛ̀ mmɑ̀nnɛ̀ yɛtɑ̃diɛyɛ̀, kɛ́ndò nkɛtenkɛ̀ dòmmɛ̀ kɛ fííkú sɑ̃́ɑ̃̀.
70 Kuù tɑ̃ɑ̃tɛ́ ku kóo tɔ̃ntì Dɑfiti, koò dɛ̀ìtɛní mupecɛ̃mmu miɛkɛ.
71 Ò do cɛ̃mmú ipe nyi kɛ̀ kùu ò dɛ̀ìtɛní, kòò bo ncɛ̃mmú ku nìtìbɛ̀ Sɑkɔbu yɑɑ̀bí, nɛ̀ Isidɑyɛɛribɛ kù te bɛ̀.
72 Kɛ̀ Dɑfiti mbɛ̀ cɛ̃mmù nɛ̀ mɛyɛ̀mmɛ̀ mɛmɔu, kɛ́ mbɛ̀ ni kɛ̀ dɛ̀ dò nsɛ́i.