YƐSÃÃ 69:7-31 in Ditammari

⁷ Kuyie Mpɑkɛdɑɑ, ɑ bɑ́ɑ́ yóu kɛ̀ míì nte, kɛ̀ bɛ̀ɛ̀ dɑ búɔ́ kɛ̀ bɛ̀ɛ di ifɛi. Fɔ̃́ nKuyie ntínti Isidɑyɛɛribɛ ti tũ nkù, ɑ bɑ́ɑ́ yóu kɛ̀ míì nte kɛ̀ bɛ̀ɛ̀ dɑ wɑɑ̀ nkɛ̀ bɛ̀ɛ di ifɛi.

⁸ Fɔ̃́ɔ̃̀ kpɛ́í nkɛ bɛ̀ n sɑ̃̀ɑ̃́mmɛ̀, n yo nyifɛi fɔ̃́ɔ̃̀ kpɛ́í.

⁹ N nɑɑ́ nhopɔ̀ɔ̀ nwe n kɔbɛ cuokɛ̀, n yɔ̃ fũ̀ɔ̃̀ kɔbɛ tɛ̃́nkɛ í n yɛ̃́.

¹⁰ Kɛ yɛ̃́ n dɔ́mɛ̀ ɑ cĩ́ɛ̃̀tɛ̀ mɛdiɛ̀ nkɛ̀ dɛ̀ n tùɔ̀, bɛ̀ dɑ sɑ̃́ɑ̃́ nyɛ̀ɛ̀ sɑ̃́ɑ̃̀mbɛ̀ duò n yuu ĩ́nkɛ̀ nkɛ.

¹¹ M boú dinùù ndi kɛ kuɔ̀, nɛ̀ dɛ kpɛ́í nkɛ̀ bɛ̀ n dɑú.

¹² N dɑ̀ɑ́tí kufɔ̀ɔ̀tɔ̃̀nkù nku, kɛ̀ bɛ̀ nɑ́ɑntɛ n kpɛ́í kɛ n dɑú,

¹³ Bɛ̀ kɑ̀tìnɛ̀ mí nwe yɛteyɔ, míì nɑɑ́ nfɛnɑɑyɑ̃̀ɑ̃̀yɛ̀nfɛ̀.

¹⁴ Mí nyie n kuɔ̀nnɛ̀ fɔ̃́ nwe n Yiɛ̀ nKuyie, dɛ̀ tùɔ̀kɛmu ɑ bo n tee ndɛ̀. Áú Kuyie! A sɑ̀ɑ̀ ndɛumu, n kéntɛ́, n yɛ̃́mu nweti weti kɛ dò nhɑ yó n dɛɛtɛ́.

¹⁵ Nh uutɛ́ disɑ̃̀ũ̀, kɛ̀ n tɛ̃́nkɛ bɑ́ nfṹṹkú n dennɛní dibinni, n dɛɛtɛ́nɛ̀ bɛ̀ɛ̀ ǹ nìí.

¹⁶ Bɑ́ɑ́ yóu kɛ̀ mɛniɛ nni mpɔ̃ntɛ́nɛ̀, bɑ́ɑ́ yóu kɛ̀ n do kudúókù, bɑ́ɑ́ yóu kɛ̀ tɛbintɛ n yɑ̃kɛ!

¹⁷ Kuyie nhɑ n kéntɛ́ kɛ yɛ̃́ ɑ sɑ̀mɛ̀mu kɛ dɔɔri mɛsɑ̀ɑ̀, wɛ̃ɛ̃tɛní m bíɛ́kɛ̀ ɑ sémmɛ̀ dɛu mɛ̀ɛ̀ kpɛ́í.

¹⁸ Bɑ́ m bútínnɛ́ mí nhɑ kóo tɔ̃ntì, nh ɑ́ɑ̀rìmu, cɑ̃rikɛní.

¹⁹ Kɔtɛní kɛ́dontɛ́ nh ɔ̃nnì, n dɛɛtɛ́nɛ̀ n dootitɔbɛ̀.

²⁰ A wúómmu bɛ̀ n sɑ̃̀ɑ̃́mmɛ̀, kɛ yɛ̃́ n yo nyìì fɛi kɛ kɛ̃kɛ, n dootitɔbɛ̀ í dɑ sɔrìnɛ̀.

²¹ Yɛsɑ̃́ɑ̃̀mbɛ̀ yɛɛ̀ kɔ̀ùrì n yɛ̀mmɛ̀ kɛ̀ m mɔ, n wɑnti wèè bo n kuɔ́ nwè nwe mɛsémmɛ̀ bɑ́ sɑ́m̀pɔ́ kɛ mɔ̀ńtɛ́, wèè bo m bɑ́ntɛ̀ ò í bo.

²² Bɛ̀ ɑ̃ɑ̃̀ mutie mùù kɔ̀ù mùmmu n diì miɛkɛ, kɛ̀ sinɛ́yɛ̃ĩ m pĩ́ nkɛ̀ bɛ̀ n duɔ́ mmɛnɛ́yɑ̃ɑ̃ mmɛ̀ɛ̀ kɔkɛ́nɛ̀ dɛtiirɛ.

²³ Bɛ bɑndiitìi nɑɑ́ ntimɑ́tì kɛ́ bɛ̀ tùɔ̀ti, kɛ̀ bɛ kpɑ̀tìi nɑɑ́ nkuyɑú.

²⁴ Bɛ nuɔ nhṹṹ nkɛ̀ bɛ̀ tɛ̃́nkɛ bɑ́ nwúó, pṹtínnɛ́ bɛ sɑ̃́ɑ̃̀ kɛ̀ bɛ̀ɛ nɑɑ́ nsihùù yɛmbɛ̀.

²⁵ A miɛkɛɛ bɛ̀ pɛikɛ kɑ̀ɑ bɛ̀ potɛ́, ɑ miɛkɛ diɛkɛ̀ɛ do bɛ ĩ́nkɛ̀ kɛ́ bɛ̀ cɔ̀útɛ́.

²⁶ Kɛ̀ bɛ cɛ̃kɑ̀rɛ̀ nɑɑ́ ntidobontì, òmɔù bɑ́ nkpɑɑ́ bɛ cɛ̃́ĩ miɛkɛ.

²⁷ Bɛ̀ bɛ̀tì ɑ potɛ́ bɛ̀mbɛ, kɛ nɑ́ɑntɛ ɑ kɔ̀utɛ bɛ̀ kó mɛfɛ̃́ṹtímɛ̀.

²⁸ Yietí bɛ bɛ yɛi mmɛmɔu, bɑ́ bɛ̀ bɑ́ɑ́ yɑ̀ ɑ kó mɛsɑ̀ɑ̀ mbìtì.

²⁹ Ũtɛ́ bɛ yètɛ̀ mufòmmu pɑ́tíri miɛkɛ, Bɑ́ mbɛ̀ wùónko kɛ dò mbɛ̀ í cɑ̀ɑ̀rɛ̀ mùmɑmù.

³⁰ Áú Kuyie, n tú osénnìwè nwe kɛ fɛ̃́ũ̀rì, n dɛɛtɛ́ kɛ́ nni nkɑ̃nkɛ́.

³¹ M bo ndiè nkɛ sɑ̃ntí Kuyie, m bo ndɛ́úkùnko ku yètìrì nɛ̀ yɛsɑ̃ɑ̃.