YƐSÃÃ 68:11-31 in Ditammari

¹¹ Dɛndɛ ɑ nìtìbɛ̀ bomɛ̀, Ti Yiɛ̀ nKuyie nfɔ̃́ɔ̃̀ dɛ̀ mbɛ̀ kɑ̀nnɛ ɑ sɑ̀ɑ̀ nkpɛ́í, fɔ̃́ɔ̃̀ tũ̀ntɛ dɛ kó dikɑ̀rì bɛsénnìbɛ̀ kpɛ́í.

¹² Ti Yiɛ̀ nKuyie nkuù duɔ́ ndinùù ku nɑ́ɑǹtì kpɛ́í, bɛ̀ɛ̀ tì pitírí kɛ̀ bɛ tĩ̀nnì sũ.

¹³ Ti dootitɔbɛ̀ bɛkpɑ̀ɑ̀tìbɛ̀ nɛ̀ bɛ kó bɛhɑ̃ɑ̃pɔ̀mbɛ̀ bɛ̀ u yɛtɑ̀rɛ̀ nyɛ, kɛ̀ bɛnitipòbɛ̀ ɛí dɛ̀ɛ̀ bo bɛ cɛ̃́ĩ kɛ totí.

¹⁴ Di yó mbo di kɑrɛ̀ nyɛɑ̀? Dikpɛtìnɔ́nkperi fìɛ̀ti dɑ̀ri mɛsɔɔ mpɛímɛ̀ mmɛ, kɛ̀ di cìtì dɑ̀ri mɛsɔɔ nwũɔ̃mɛ̀.

¹⁵ Ti Yiɛ̀ nKuyie Mpɑkɛdɑɑ yóó cíɛ ndìì mɔ̀nnì bɛkpɑ̀ɑ̀tìbɛ̀, kɛ̀ mupɑ̃̀ɑ̃ mboomu muù dɑ̀ɑ́tí ditɑ̃rì Sɑdimɔɔ.

¹⁶ Fɔ̃́ nKuyie nkó ditɑ̃rì, fɔ̃́ mBɑsɑ̃ɑ̃ tɑ̃rì, fɔ̃́ nditɑ̃rì dìì yómmɛ̀ sũ, fɔ̃́ mBɑsɑ̃ɑ̃ tɑ̃rì.

¹⁷ Yɛtɑ̃rɛ̀ yɛ̀ɛ̀ yómmɛ̀ sũ, bɑ nte kɛ̀ dɛ̀ di yóu Kuyie ntɑ̃ɑ̃tɛ́ dìì tɑ̃rì kpɛ́í, kù bomu di ĩ́nkɛ̀ kɛ yó mbo sɑ̃́ɑ̃̀, kù yó ndɛ̀ bomu sɑ̃́ɑ̃̀.

¹⁸ Kuyie nkpɑ̀rìsɛ̃ĩ́ bo sikɔupí sikɔupí nsi, kù do si nkɔ̀tɛnɛ̀ní Sinɑii ditɑ̃sɑ̀ɑ̀rì.

¹⁹ A dèkɛ kɛĩ́nkɛ̀ nkɛ, kɛ nɛínɛ̀ní tidɑɑtì, kɛ̀ bɛnìtìbɛ̀ dɑ pɑ̃mmú yɛpɑ̃rɛ̀, bɑ́ bɛ̀ɛ̀ do yetírí ɑ kpɛti kɛ̀ bɛ̀ dɑ bɔ̀útɛ́, kɛ dò nkɛ́ mbo ɑ borɛ̀ fɔ̃́ nti Yiɛ̀ nKuyie.

²⁰ Ti nsɑ̃ntí Kuyie nyɛwe yɛmɔu, kuù dɑ̀kɛ ti kpɛ́í, kuù tu ti dɛɛtíwè.

²¹ Kuyie nkuù tu ti dɛɛtíwè, kuù yɛ̃́ kù bo yĩmɛ̀ kɛ́ tí dɛɛtɛ́nɛ̀ mukṹṹ.

²² Kuyie mmɛ̀nkɛ yóó pɔntɛmu ku dootitɔbɛ̀ yɔ, kɛ́pɔntɛ onitikɔ̀ùtì yuu nɛ̀ tiyùtì.

²³ Kuyie mbɛ́immu kɛ tú kù bo cṹũnní ɑ dootitɔbɛ̀ bɛ̀ɛ̀ bo Bɑsɑ̃ɑ̃ tɑ̃rì, kɛ́dennɛní bɛ̀ɛ̀ bo dɑ̀mɛ́ɛ̀rì fũ̀ɔ̃̀.

²⁴ Kɛ̀ dɛ̀ bo yie nkɑ̀ɑ nɑɑ̀cɛ̀i mbonti bɛ yĩ̀ĩ̀, kɑ̀ɑ kó simɔɔ́ bɛ̀ pɛ̀tɛ́ kɛ́cɑ́ɑ́kɛ́.

²⁵ Kuyie nhɑ ɔ̃ɔ̃ kpɑ nkɛ́nɑ kɛ́nkũntiní, kɛ̀ bɛnìtìbɛ̀ wùómmu ɑ kpɑ̀rìnɑfɛ ɑ cɛ̃sɑ̀ɑ̀tɛ̀ miɛkɛ, fɔ̃́ nKuyie nkùù n te, fɔ̃́ n kóo kpɑ̀ɑ̀tì.

²⁶ Kɛ̀ bɛdèmbɛ̀ ni dɛyììkɛ̀ kɛ̀ bɛsɑpɑ̀mbɛ̀ sokɛ́ dɛcuokɛ̀ kɛ bie nsibéí, bɛ̀ɛ̀ bie ntikùtìdùùtì kɛ̀ bɛ̀ tũ.

²⁷ Nsɑ̃ntínɛ̀ Kuyie nditĩ̀nnì cuokɛ̀, nsɑ̃ntínɛ̀ ti Yiɛ̀ nKuyie ndíndi Isidɑyɛɛri yɑɑ̀bí.

²⁸ Bɛnsɑmɛɛ tɛbíyɑ̃ɑ̃tɛ̀ tɛɛ̀ di ni, kɛ̀ Sudɑɑ kó bɛkpɑ̀ɑ̀tìbɛ̀ nɛ̀ bɛ kó yɛtĩ̀rɛ̀ nɛ̀ Sɑbunɔɔ kɔbɛ nɛ̀ Nɛfutɑdii kɔbɛ kɛ̀ bɛ̀ tũ̀nní.

²⁹ Kuyie nkùù di te díndi Isidɑyɛɛribɛ kuù yɛ̃ ndí nkpeńnì. Kuyie ndɔɔ̀ kɛ́fíí nhɑ dɔ̀ɔ̀ dɛ̀ ti kpɛ́í.

³⁰ A bo ɑ cĩ́ɛ̃̀tɛ̀ ntɛ, kɛ bɑkɛ́ Sedisɑdɛmmu, kɛ̀ bɛkpɑ̀ɑ̀tìbɛ̀ dɑ pɑ̃ɑ̃ nyɛpɑ̃rɛ̀.

³¹ Kpɑnnɛ̀ musĩ̀mmù tipèntì kɔ̃mu, kɛ́kpɑnnɛ̀ yɛbotɛ̀ yɛ̀ɛ̀ dònnɛ̀ yɛnɑɑdɑkɛ̀ nɛ̀ tinɑɑbiiti, kɛ̀ dɛ̀ɛ nínkú ɑ ììkɛ̀ kɛ́ ndɑ pɑ̃ɑ̃ ntimɑ́tì pɛ́ítì. Cíɛ nyɛbotɛ̀ yɛ̀ɛ̀ nɔnnɛ̀ yɛkpɑ̀rɛ̀.