3 N yɛ̀mmɛ̀ nɑɑtinɛ̀mu n Yiɛ̀ nKuyie, díndi bɛsĩ́ntíbɛ̀ nkémmúnɛ̀ n kù sɑ̃ntímɛ̀ kɛ́nyɑ̃nku.
4 Di n wɛ̃nnɛ́nɛ̀ kɛ̀ tí nsɑ̃ntí ti Yiɛ̀ nKuyie, tí nwɛ̃ nkɛ́dɛ́úkùnko ku yètìrì.
5 N yu Kuyie nku kɛ̀ kù yie, kɛ n dɛɛtɛ́nɛ̀ n kó kukɔ̃m̀bɔ̀doróo.
6 Kɑ̀ɑ bɔ̀útɛ́ Kuyie, nhɑ yɛ̀mmɛ̀ mɛɛ̀ ɔ̃ɔ̃ cɑ́tɛ́, bɑ́ ifɛi tɛ̃́nkɛ bɑ́ ndɑ bo.
7 Kòo sénnìwè kuɔ́ nti Yiɛ̀ nKuyie nhɔ̃ɔ̃ keèmu, kóò dɛɛtɛ́nɛ̀ mɛhɑ́ɑ́rìmɛ̀ mɛmɔu
8 Kuyie ntɔ̃nnì diì bɑ̀ɑ bɛ̀ɛ̀ dé ti Yiɛ̀ nKuyie kɛ bɛ̀ dɛɛrí.
9 Yɑ́ɑ́kɛ́nɛ̀ kɛ́yɑ̀ Kuyie nwennimɛ̀, dɛ̀ nnɑɑti wèè kù duɔ́ nhomɑ́ɑ̀.
10 Díndi Kuyie nkó bɛsɑ̀ɑ̀bɛ̀, nkù dénɛ̀, bɛ̀ɛ̀ kù dé dɛ̀mɑrɛ̀ í bɛ̀ dónnì.
11 Yɛcìrícìrɛ̀ mɔ́nnìmu yɛ̀ dɔ́ dɛ̀ kɛ̀ dikònnì yɛ̀ pĩĩ, dɛ̀mɑrɛ̀ í dónnì wèè bùɔ́ Kuyie.
12 M bí, kɔtɛnɛ̀ní kɛ́ n kéntɛ́, kɛ̀ n di bɛnkɛ di bo ndé mɛ̀ɛ̀ botí Kuyie.
13 Kòò mɔù dɔ́ mufòmmu, kɛ bo nfòù kɛ̀ dɛ̀ nɑɑti,
14 o nɔ́ndɛnfɛ̀ bɑ́ nnɑ́ɑ́ ntinɑ́ɑnyɛiti, ò bɑ́ nsountɛ.
15 Wèe dɛ́tɛ́nɛ̀ mɛyɛi, kɛ́ndɔɔri mɛsɑ̀ɑ̀, kɛ́nwɑɑ̀ nkunɑɑtí kɛ kù bɛ̀tì.
16 Ti Yiɛ̀ nKuyie nwùómmu bɛsɑ̀ɑ̀bɛ̀, kɛ yo bɛ dɑbùò.
17 Ti Yiɛ̀ nKuyie nkpɑ̀nnɛ̀mu bɛyɛibɛ, kɛ bo bɛ̀ dèè kɛtenkɛ̀ ĩ́nkɛ̀ kɛ̀ bɛ̀ɛ yɛ̃̀ mbɛ kpɛ́í.
18 Kɛ̀ bɛsɑ̀ɑ̀bɛ̀ kuɔ́nnɛ̀ ti Yiɛ̀ nKuyie, kù ɔ̃ɔ̃ keèmu kɛ́ bɛ̀ dɛɛtɛ́nɛ̀ mɛhɑ́ɑ́rìmɛ̀ mɛmɔu.
19 Ti Yiɛ̀ nKuyie mbonɛ̀mu bɛ̀ɛ̀ yɛ̀mmɛ̀ cɑ̀ɑ̀rɛ̀, kɛ dɛɛrí dɛ̀ di bɛ̀.
20 Mɛhɑ́ɑ́rìmɛ̀ pɛ́u tuɔ̀kùnímu osɑ̀ɑ̀wè, kɛ̀ ti Yiɛ̀ nKuyie mmɛ nhò dɛɛrínɛ̀ mɛ mɛmɔu.
21 Kɛ dɑkɛ o tùòti imɔu kpɛ́í, kɛ̀ bɛ̀ bɑ́ɑ́ kéétɛ́ o kɔ̃́ũ̀ mɑrì.
22 Mɛyɛi mmɛɛ̀ kɔ̀ù oyɛiwe, Kuyie nyóó kpetínnɛ́mu bɛ̀ɛ̀ nìí mbɛ̀ɛ̀ dɔ̀ɔ̀ri dɛ̀ɛ̀ wenni.
