YƐSÃÃ 31:4-24 in Ditammari

⁴ Fɔ̃́ɔ̃̀ tu n kó dipèrì, n kó tɛcɛ̃kpetɛ̀. A nni nni kɛ n cɛ̃mmú, ɑ yètìrì bo dɛukɛ mɛ̀ɛ̀ kpɛ́í

⁵ Fɔ̃́ɔ̃̀ yó n dennɛ bɛ̀ n dìí ntìì cùɔ̀tì, kɛ yɛ̃́ fɔ̃́ɔ̃̀ n kɑ̃nkɛ́mɛ̀.

⁶ N Yiɛ̀ nKuyie nh ɑ̃nnɛ́ m mɑ́ɑ̀ ɑ nɔu miɛkɛ nkɛ, ɑ tú Kuyie nku timɔ́mmɔnti yiɛ̀, fɔ̃́ɔ̃̀ n dɛɛtɛ́.

⁷ A í dɔ́ bɛbɔɔféúbɛ̀, n duɔ́ nfɔ̃́ nwe m mɑ́ɑ̀.

⁸ N yóó nyɑ̃nku nɛ̀ diwɛ̀ì ndi ɑ sɑ̀ɑ̀ nkpɛ́í, ɑ yɑ̀mɛ̀ n sémmɛ̀ kɛ bɑntɛ́ n yɛǹcɑɑ̀rìmɛ̀.

⁹ A í yóu kɛ̀ n do n dootitɔbɛ̀ nɔu miɛkɛ, ɑ n dɛɛtɛ́mu kɛ̀ n kèrí kɛ í yĩɛ̃̀kù.

¹⁰ N kuɔ́ mmɛsémmɛ̀ mɛyɛǹcɑɑ̀rìmɛ̀ mɛɛ̀ n dɛutɛ́ n kɔ̃̀ntì tiì bɛ̀ìtɛ̀ kɛ̀ n yɛ̀mmɛ̀ yɛ̀, kɛ̀ n nuɔ nhòńtɛ́.

¹¹ N yóó kú mɛyɛǹcɑɑ̀rìmɛ̀ miɛkɛ nkɛ, n yóó deè m bie iyɛntotí miɛkɛ nkɛ. Mɛyɛi n dɔ̀ɔ̀ mɛ̀ mɛɛ̀ dɛ̀ìtɛ n wɛ̃rímú, n wɛ̃rímú sɔmmu muù dèè.

¹² N kpɑntídɛ̀ntɔbɛ̀ bɛɛ̀ te kɛ̀ m pɛɛtitɔbɛ̀ n sɑ̃̀ɑ̃́ n dootitɔbɛ̀ bɛɛ̀ te bɛ̀ɛ̀ n yɛ̃́ kɛ̀ bɛ̀ n yɔ̀tɛ, bɛ̀ɛ̀ n yɑ̀u kɛ̀ bɛ̀ n yɔ̀tɛ kɛ cokù n nɑɑ́ kukṹmbocíríkù nku.

¹³ Bɛ̀ n yɛ̃̀ nhocíì kɔ̃mɛ mmɛ, n nɑɑ́ nkukṹntɑɑcíríkù nku.

¹⁴ N yo bɛ̀ nɑ́ɑ́ntɛmɛ̀ mmɛ n kpɛ́í kɛ̀ kufɔ̃wɑɑ́ nni nhɑutɛ́, bɛ̀ wɛ̃nnɛ́ bɛmɔu ndi kɛ n dɔ́nɛ̀ mɛyɛi, bɛ̀ dɑ̀kɛmu kɛ bo n kuɔ.

¹⁵ N Yiɛ̀ nKuyie, n duɔ́ nfɔ̃́ nwe m mɑ́ɑ̀, fɔ̃́ɔ̃̀ tu Kuyie kɛ n te.

¹⁶ N kpɛti timɔu ɑ̃ fɔ̃́ɔ̃̀ nɔu miɛkɛ, n dɛɛtɛ́nɛ̀ n kpɑntídɛ̀ntɔbɛ̀ nɛ̀ bɛ̀ɛ̀ ǹ fɛ̃́ũnko.

¹⁷ N cɔutɛ́nɛ̀ diwɛ̀ì mí nhɑ kóo tɔ̃ntì, nɛ̀ ɑ sɑ̀ɑ̀ nkpɛ́í n dɛɛtɛ́.

¹⁸ N Yiɛ̀ nKuyie m bɑ́ɑ́ dɑ yú kɛ́di ifɛi, bɛnitiyɛibɛ bɛɛ̀ dò nkɛ́ ì di kɛ dɔ̀ yúó kɛ́kú.

¹⁹ Duɔ́ nkɛ̀ bɛ̀ɛ̀ nɑ̀ɑ́ nsiyɑ́ɑ̀bìsí osɑ̀ɑ̀wè kpɛ́í kɛ̀ bɛ̀ dɔ̀ yúóó, sipɔɔ yɛmbɛ̀ nɛ̀ mɛsenkùmɛ̀ yɛmbɛ̀ nɛ̀ sifeí yɛmbɛ̀ kɛ̀ bɛ̀ɛ cĩ́ɛ̃́kɛ́.

²⁰ A sɑ̀ɑ̀ ndɛu mɛdiɛ̀ mmɛ, bɛnìtìbɛ̀ bɛmɔu wùómmu ɑ dɔɔrimɛ̀ bɛ̀ɛ̀ dɑ dé, bɛ̀ yɛ̃́mu ɑ ɑ̃ɑ̃̀ dɛ̀ bɛ̀ɛ̀ sɔ̀ri ɑ borɛ̀.

²¹ A bɛ̀ sɔ̀ri ɑ borɛ̀ ndɛ kɛ bɛ̀ kɑ̃nkɛ́ bɛyɛibɛ kó mɛdíímmɛ̀, kɛ̀ bɛ̀ bo ɑ cĩ́ɛ̃̀tɛ̀, kɛ dɛ́tirinɛ̀ iwɑ́tìi.

²² N Yiɛ̀ nKuyie nnɛ̀ mutɔ̃mmú ɑ n dɔ̀ɔ̀mɛ̀ mɛsɑ̀ɑ̀, mí n dootitɔbɛ̀ do cɛ̃̀ɛ̃̀tɛ wè bɛ̀ ɔ̃ɔ̃ pi mɛ̀ɛ̀ botí dihɛì.

²³ Dɛ̀ do n dimu kɛ̀ n yɛ̀mmɛ̀ ndo n dɑ dɛ́tɛ́nɛ̀, kɑ̀ɑ mɛ nkèè n kuɔ̀mmɛ̀ kɛ dɑ yu.

²⁴ Ndɔ́nɛ̀ ti Yiɛ̀ nKuyie, díndi ku kó bɛsɑ̀ɑ̀bɛ̀, ti Yiɛ̀ nKuyie nkɑ̃nkɛ́mu bɛ̀ɛ̀ kù tũ, kɛ fɛ̃́ũnko mɛdiɛ̀ nsifeí yɛmbɛ̀.