116 A nni mpĩ́ nhɑ bɛ́i nkɛ yɛ̃ mmù. Kɛ̀ dɛ̀ɛ yie nkɛ̀ nní fòù. A bɑ́ɑ́ yóu kɛ̀ nní ndɑ kémmú kɛ́di ifɛi.
117 Fɔ̃́ɔ̃̀ yó ntú nkó dipĩ̀ńnì kɛ̀ n nɑ kɛ́cootɛ́. Kɛ̀ dɛ̀ɛ yie nkɛ̀ nní ndɑkɛ ɑ kuɔ́ kpɛ́í.
118 A dootóomu bɛ̀ɛ̀ kó dimɑ̀ɑ̀ bùtínnɛ́ ɑ kuɔ́. Kɛ yɛ̃́ bɛ kó mutɔ̃mmú mumɔu túmɛ̀ siyɑ́ɑ̀bìsí kɔ̃mu mmu.
119 A ùtóomu bɛyɛibɛ kó dimɑ̀ɑ̀ tiyontì kɔ̃mɛ. Dɛɛ̀ te kɛ̀ n dɔ́ ɑ tié.
120 N wúó nhɑ kuɔ́ kɛ̀ n kɔ̃̀ntì ɑumu, kɛ̀ n kɔ̃m̀bùɔ̀tì duònɛ̀ ɑ tɑ̃ɑ̃tɛ́ tì.
121 N dɔɔrimu dɛ̀ɛ̀ sìɛ́, kɛ tũ ntimɔ́mmɔnti, bɑ́ɑ́ yóu kɛ̀ n do bɛ̀ɛ̀ n fɛ̃́ũnko bɛ nɔu miɛkɛ.
122 Dɔúnnɛ̀ mí nhɑ kóo tɔ̃ntì dinùù kɛ yĩ: A yó nni ndɔɔri mɛsɑ̀ɑ̀. Bɑ́ɑ́ yóu kɛ̀ sipɔɔ yɛmbɛ̀ nni nfɛ̃́ũnko.
123 M bɔ́ú nhɑ kó mɛdɛɛtímɛ̀ kɛ ɔ̀umu, n kémmú timɔ́mmɔnti ɑ nɑ̀kɛ́ tìì kpɛ́í kɛ̀ dɛ̀ m bimu.
124 Dɔɔ̀ mí nhɑ kóo tɔ̃ntì mɛsɑ̀ɑ̀, ɑ nitimu, m bɛnkɛ kɛ̀ n yĩ́ɛ̃́tɛ́ ɑ kuɔ́.
