15 Afum akaŋɛ ŋaŋcis fɛ pəmɔ tɔkɔ nəcɛm-cɛmnɛ ti mɔ, bawo bət-bət b’ ayi bambɛ.
16 Mba tɔkɔ aŋnabi Yowɛl ɛnaloku mɔ teyi kəcepər:
17 ‹Kɔ Kanu kəloku mata mɛləpəs: «Indesaməsər Amera ŋem nnɔ afum fəp ŋayi mɔ. Awut anu arkun kɔ aran ŋande ŋac-dəŋk cəsayibɛ-e. Indesɔŋ awut atɛmp anu kənəŋk ka mɔyɔ mem, indewɛrəpəs sɔ afum anu atem.›
18 ‹Ɛy,› Kanu kəloku, ‹Indeyerəs Amera Ŋecempi ŋem acar em arkun kɔ aran, mata mamɔkɔ, ŋandedəŋk cəsayibɛ-e.
19 Indementər mes mɛwɛy-wɛy mɛlarəm dəkɔm kɔ mɛgbɛkərɛ ma Kanu nnɔ dəntɔf: Mecir, nɛŋc, kɔ acul ŋa kinimɛ.
20 Dec dendesəkpɛ kubump, kɔ ŋof ŋɛsəkpɛ mecir. Mamɔkɔ mendecepər a dɔsɔk da Wəbɛ dedebəp, dɔsɔk dadɔkɔ dɛmbɛk kɔ dentesɛ.
21 Nwɛ o nwɛ endeboŋc tewe ta Wəbɛ Kanu mɔ endefis.›
22 Afum aka Yisrayel, nəcəŋkəl moloku mamɛ! : Yesu wəka Nasarɛt, fum nwɛ Kanu kəmentərɛ nu debeki dɔn mɔ, dəmes mɛwɛy-wɛy, dəmɔpɔŋ, dəmɛgbɛkərɛ pəmɔ tatɔkɔ nəŋcərɛ ti mɔ,
23 fum wəkawɛ anasɔŋ nu kədif kɔn pəmɔ tɔkɔ Kanu kənawosɛ ti kɔ kəsɔŋ tɔkɔtɛnɛ ta ti mɔ. Nənim kɔ nəŋcaŋ kɔ dəkətɔk kəpandən kəmar ka waca wa acikəra.
24 Kanu kəyekti kɔ kəŋgbintər kɔ pəcuy pa defi, bawo defi dɛnatam fɛ kəmɛŋkərnɛ kɔ.
25 Dawuda ɛnanuŋkɛnɛ kəloku dəyecicəs yecempi teta Yesu: ‹Iŋc-nəŋk Wəbɛ tɛm fəp fɔr yem kiriŋ, ifɔyikcɛ, bawo ey’ im kəca kətɔt.
26 It’ ɔsɔŋɛ ntɛ abəkəc ŋem ŋeyi dəkəsata mɔ, kɔ temer tem tesikəlɛ dəpəbotu. Dis dem yati dendekɔ-ŋesəmɛ kəgbɛkər amera.
27 Bawo məfɔdekɔ-sak im dabiya məfɔdekɔ-sak wəsoku kam pəte.
28 Məsɔŋ’ em kəcərɛ səpɔ sa kəcepərɛnɛ doru, kiyi kam ina kəsək kəndekɔ-las’ im pəbotu.›
29 Awɛŋc im aŋa! Nəwosɛ iloku nu ntɛ kəlaŋ disrɛ teta wətem Dawuda: Ɛnafi, k’awup kɔ, kɔ kufu kɔn kəyi su sɔ mɔkɔ dacɔ.
30 Mba ntɛ Dawuda ɛnayɔnɛ sayibɛ mɔ, ɛŋcərɛ sɔ a Kanu kənadɛrəmɛ kɔ a kəndedəs wan-sɔ kɔn wəlɔma dɔcɔm da dɛbɛ dɔn kəroŋ.
31 Dawuda ɛnanuŋkɛnɛ pənəŋk kəyɛfɛ ka Krist dəkufu , ɛnanəŋk ntɛ tendeder mɔ k’oloku ti: a anasak fɛ Krist dabiya, dis dɔn dɛnate fɛ dəkufu.
32 Yesu wəkakɔ, Kanu kəyekti kɔ, səna fəp səyɔnɛ atəŋnɛ aka ti.
33 Kɔ Kanu kəmpɛnɛ Yesu kəfo kəleli, k’ɛndəs kɔ kəca kɔn kətɔt. Kɔ Yesu ɔsɔtər nkɔn apa Kanu Amera Ŋecempi nŋɛ analoku kədesɔŋ mɔ, k’eyerəs tatɔkɔ nənəŋk kɔ nəne mɔ.
34 Bafɔ Dawuda ɛnapɛ dareŋc, nkɔn yati oloku: ‹Wəbɛ Kanu oloku wəbɛ kem: ‹Məndɛ nnɔ kəfo kəleli, kəca kem kətɔt,
35 haŋ ic-lip kəboc aterɛnɛ am fɔr yam kiriŋ mənas-nas ŋa.›
36 Pəmar aka Yisrayel fəp ŋacərɛ ti bel-bel: Kanu kənasɔŋɛ Yesu kəyɔnɛ wəbɛ wəyɛk-yɛk kɔn, Yesu wəkakɔ nəŋcaŋ dəkətɔk kəpandən mɔ.»
37 Ntɛ afum ŋane moloku mamɔkɔ mɔ, kɔ mosumpər ŋa, kɔ ŋayif Piyɛr kɔ asom a Yesu akɔ: «Awɛŋc su aŋa, cəke cɔ pəmar səyɔ oŋ-ɛ?»
