9 Pibi disrɛ kɔ Pol ɔsɔtɔ kənəŋk kəyɛfɛ ka dareŋc. Ti disrɛ, wəka Masedon pəcəmɛ kɔ kəsək pəc-lɛtsɛnɛ kɔ: «Məder Masedon, məmar su!»
10 Pol ɛnadesɔtɔ kənəŋk kaŋkɔ, kɔ səntɛn katina kəkɔ ka atɔf ŋa Masedon, səc-boc ti a Kanu kəwe su kəkɔ-cam di toloku tɔtɔt ta Yesu.
11 Kɔ səyɛfɛ Torowas kɔ səyekti abɛla kɔ səntɛfərnɛ kəkɔ ka Samotiras, dɔckɔsɔk kɔ səmbɛrɛ Neyapoli.
12 Kɔ səyɛfɛ dəndo, kɔ səŋkɔ Filipi, dare dɔpɔŋ da atɔf ŋa Masedon dɔlɔma ndɛ aka Rom alarəm ŋanandɛ mɔ. Kɔ sənacepərɛnɛ mataka mɔlɔma dare dadɔkɔ.
13 Dɔsɔk da kəŋesəm kɔ səwur dare dəkusu kəŋgbɔkɔ kəsək, nde sənacɛm-cɛmnɛ kəfo nkɛ səntam kətola Kanu mɔ. Kɔ səndɛ kəlok-lokər aran aŋɛ ŋanaloŋkanɛ di mɔ.
14 Wəran wəlɔma ɛnayi ŋa dacɔ pac-we kɔ Ludy, pəc-caməs cəloto ca karɛ. Pakom kɔ dare da Tiyatir. Wəyek-yekəs Kanu ɛnayi. Pəc-cəŋkəl su, kɔ Wəbɛ eŋgbiti kɔ abəkəc, ntɛ tɔŋsɔŋɛ kɔ kəc-ne bel-bel moloku mmɛ Pol oŋc-loku mɔ.
15 Ntɛ anagbət kɔ dəromun teta Kanu mɔ, Ludy kɔ aka kəlɔ kɔn disrɛ mɔ, k’ewe su kəyi nde ndɔrɔn mataka mɔlɔma, pəc-tola: «Kɔ nəŋcɛm-cɛmnɛ fɔ ilaŋ Wəbɛ bel-bel-ɛ, nəder nnɔ nderem, nəyi nnɔ kɔ səna.» K’ɛlɛtsɛnɛ su kəyi di.
16 Dɔsɔk dɔlɔma səc-kɔ dəkətola Kanu da aSuyif, kɔ wəyecəra wəcar wəlɔma ender pəbəp su, pəyɔ ŋɔŋk nŋɛ ŋɔŋsɔŋɛ kɔ kəloku ntɛ tender mɔ. Wəyecəra nwɛ ɔŋc-sɔtɔnɛ ti abɛ ɔn pəsam pɛlarəm teta kəloku kɔn mes mmɛ mender mɔ.
17 Kɔ wəyecəra nwɛ ɛŋcɛpsɛ su darəŋ Pol kɔ səna, pəc-kulɛ-kulɛ: «Afum akaŋɛ acar a Kanu nkɛ kəyi dareŋc mɔ ŋɔ! Dɔpɔ da kəyac dɔ ŋayi kəmentər un!»
18 Ntɛ wəyecəra ɔyɔ mes mamɔkɔ mata mɛlarəm mɔ, kɔ tɔlɔləs Pol dis. K’ɛŋkafəlɛ, k’oloku ŋɔŋk: «Tewe ta Yesu Krist ilok’ əm, məwur wəyecəra wəkawɛ dəris!» Gbəŋcana babɔkɔ kɔ ŋɔŋk ŋaŋɔkɔ ŋowur kɔ dəris.
19 Ntɛ abɛ ɔn ŋanəŋk fɔ tɔsɔtɔnɛ taŋan pəsam tɔsɔlər ŋa mɔ, kɔ ŋasumpər Pol kɔ Silas, kɔ ŋaŋkekərɛ ŋa nde abaŋka ŋa dare dacɔ abɛ a dare fɔr kiriŋ.
20 Kɔ ŋaŋkɔ ŋamentər ŋa aboc kiti, ŋac-loku: «Afum akaŋɛ pəyama-yama pɔ ŋayi kəbɛrsɛnɛ dare dosu. ASuyif ŋɔ ŋayɔnɛ,
21 aŋɛ ŋayi kəcam mɔyɔ maŋan mmɛ pəmar fɛ su kəwosɛ kəyɔ ka mi, səna aŋɛ səyɔnɛ aka Rom mɔ.»
