7 I Yinni Gusunɔ siɑrɑbun womusu kuo. I Gusunɔ bɛsɛn Yinni siɑro kɑ mɔrɔku.
8 U rɑ de ɡuru wiru tu wɔllu wukiri, kpɑ u ɡurɑ sɔɔru kuɑ yu kɑ nɛ tem sɔɔ, kpɑ u yɑkɑsu kpiisiɑ ɡuunu wɔllɔ.
9 Wiyɑ u rɑ yɑɑ sɑbenu dĩɑnu wɛ̃, kpɑ u ɡunɔ binu dĩɑnu wɛ̃ sɑnɑm mɛ nu kuuki mɔ̀.
10 Win nɑɑnɛ kun wɑ̃ɑ dumin dɑm sɔɔ. Win yĩiyɔbu kun mɑɑ wɑ̃ɑ tɔnun dukɑn dɑm sɔɔ.
11 Be bɑ nùn nɑsie kɑ be bɑ win durom yĩiyɔ, beyɑ u kĩ.
12 Yerusɑlɛmu, ɑ Yinni Gusunɔ siɑro. Siɔni, ɑ Gusunɔ wunɛn Yinni bɛɛrɛ wɛ̃ɛyɔ.
13 Domi wiyɑ u rɑ wunɛn kɔnnɔn ɡɑmbon sɛ̃retii dɑm sire, kpɑ u wunɛn tɔmbu domɑru kuɑ.
14 U rɑ de bɔri yɛndu tɑ n wɑ̃ɑ wunɛn temɔ. Kpɑ u de ɑlikɑmɑ yɑ n yibɑ wunɛ sɔɔ.
15 U rɑ win woodɑbɑ nɔɔsie hɑnduniɑ sɔɔ. Win ɡɑri yi rɑ dukɑ dewɑ fuuku fuuku.
16 U rɑ de nim kperuɡim mu nɛ, kpɑ mu n buriri nɡe yɑ̃ɑ sɑnsu. U rɑ de ɡuru kpenu nu nɛ kpɑ nu n sɑ̃ɑ nɡe torom.
17 U rɑ n ɡuru kpee ni kɑsi mɔ̀wɑ tiɑ tiɑ. Wɑrɑ koo kpĩ u yɔ̃rɑ u yen wooru mɑ.
18 Ù n ɡɑri ɡeruɑ, nim kperuɡim mɛ, mu rɑ yɑndewɑ. Ù n mɑɑ derɑ woo ɡɑ mu swee, mu rɑ kokuwɑ mu doonɑ.
