3 Nɛn yibɛrɛ u mɑn nɑɑ swĩi. U nɛn wɑ̃ɑru tem tɑɑre. U derɑ nɑ wɑ̃ɑ yɑm wɔ̃kurɔ nɡe be bɑ ɡu n tɛ.
4 Yen sɔ̃nɑ nɛn hunde yɑ dɑm dwiiyɑ, mɑ nɑ nuki sɑnkire too.
5 Nɑ ɡɑsɔn wɑ̃ɑru yɑɑye. Nɑ wunɛn sɔmɑ kpuro lɑsɑbu mɔ̀, mɑ nɑ wunɛn nɔmɑn sɔmburu bwisikumɔ.
6 Wunɑ nɑ nɔmɑ tĩi. Nɛn ɡɔ̃ru ɡɑ wunɛn bɛkɛ bɑrɔ nɡe mɛ tem ɡbebɑ rɑ n nim kĩ.
7 Yinni Gusunɔ, nɑ mwiɑ kpɑnɑ. A mɑn wisio kpɑɑkɑ. A ku mɑn biru kisi kpɑ n ku ko nɡe be bɑ wɑ̃ɑ ɡɔriɔ.
8 A mɑn wunɛn tɔn ɡeeru sɔ̃ɔsio bururu kɑ yokɑ, wunɑ nɑ nɑɑnɛ sɑ̃ɑ. A mɑn swɑɑ sɔ̃ɔsio ye kon swĩi, wunɑ nɑ nɛn hunde nɔmu sɔndiɑ.
9 Yinni Gusunɔ, ɑ mɑn wɔro sɑɑ nɛn yibɛrɛbɑn nɔmɑn di, wunɛn miyɑ nɑ kuku yeru kɑsu.
10 Wunɑ sɑ̃ɑ nɛn Yinni. A mɑn sɔ̃ɔsio mɛ ko nɑ n dɑ wunɛn kĩru ko. A de wunɛn Hunde ɡeo wi, u mɑn kpɑrɑ swɑɑ ye yɑ nɔɔ nɛ sɔɔ.
11 Yinni Gusunɔ, ɑ mɑn wɔro nɡe mɛ ɑ nɔɔ mwɛɛru kuɑ. A nɛn hunde wunɔ wɑhɑlɑn di wunɛn ɡem sɔ̃.
12 A nɛn yibɛrɛbɑ kɑm koosio, kpɑ ɑ nɛn wɛrɔbu kpuro kpeerɑsiɑ yèn sɔ̃ ɑ mɑn kĩ. Nɑ sɑ̃ɑwɑ wunɛn sɔm kowo.
