35 Nɑ wunɛn swɑɑ kĩ. A mɑn sureo ye sɔɔ.
36 A de nɛn bwɛ̃rɑ yu wurɑ ye sɔɔ. A ku de nɛn kĩru tu wurɑ ɡobi ɡiɑ.
37 A nɛn binɛ wunɔ ɡɑ̃ɑ kɑnkɑm di, kpɑ ɑ de nɑ n wɑ̃ɑ wunɛn swɛɛ sɔɔ.
38 A wunɛn nɔɔ mwɛɛru yibio nɛ, wunɛn sɔm kowon sɔ̃, tɑ wɑ̃ɑwɑ be bɑ nun nɑsien sɔ̃.
39 A mɑn yɑro seku te nɑ nɑsien di, wunɛn siribu bu rɑ n wɑ̃.
40 Nɑ kĩwɑ n wunɛn woodɑbɑ mɛm nɔɔwɑ too. A de nɑ n wɑ̃ɑ wɑ̃ɑru sɔɔ wunɛn ɡem sɔ̃.
41 Yinni Gusunɔ, ɑ de ɑ nɛn wɔnwɔndu wɑ, kpɑ ɑ mɑn fɑɑbɑ ko nɔɔ mwɛɛ te ɑ mɑn kuɑn sɔ̃.
42 Sɑɑ ye sɔɔ, kon kpĩ n be bɑ mɑn sekuru dokemɔ ɡɑri wisi. Domi nɑ nɛn nɑɑnɛ doke wunɛn ɡɑri sɔɔ.
43 A ku wunɛn ɡem wunɑ nɛn nɔɔn di, nɑ yĩiyɔbu mɔ wunɛn siribu sɔɔ.
44 Ko nɑ n wunɛn woodɑbɑ nɛniwɑ sɑɑ kpuro. Yɑ ko n wɑ̃ɑ nɛn mi sere kɑ bɑɑdommɑɔ.
45 Kon sĩ kɑ tii mɔru, domi wunɛn woodɑbɑrɑ nɑ kɑsu.
46 Kon ben ɡɑri sinɑmbu sɔ̃. Nɑ ǹ ko nɑ n mɑɑ wɑ̃ɑ sekuru sɔɔ.
47 Nɑ wunɛn woodɑbɑ kĩ. Nɑ rɑ n nuku dobu mɔ ye sɔɔ.
48 Nɑ rɑ nɛn nɔmɑ yiiye wɔllɔ n kɑ kɑnɑru ko wunɛn ɡɑri yi nɑ kĩn sɔ̃. Domi nɑ kĩ nɑ n yi bwisikumɔ nɛn ɡɔ̃ruɔ.
49 Wee ɑ mɑn yĩiyɔbu wɛ̃. A wunɛn nɔɔ mwɛɛru yɑɑyo te ɑ nɛ, wunɛn sɔm kowo kuɑ.
50 Terɑ tɑ rɑ mɑn nukuru yɛmiɑsie nɛn nɔni swɑ̃ɑru sɔɔ, kpɑ tu mɑn wɑ̃ɑru wɛ̃.
51 Wee tii suobu bɑ mɑn yɛ̃ɛsu wɔri. Adɑmɑ kɑ mɛ, nɑ ǹ wunɛn woodɑbɑ deri.
52 Yinni Gusunɔ, nɑ wunɛn yellun siribu yɑɑye. Biyɑ bu mɑn dɑm kɑ̃.
53 Nɑ̀ n wɑ tɔn kɔ̃sobu bɑ wunɛn woodɑbɑ deri, mɔru bɑkɑ nɑ rɑ ko.
54 Wunɛn ɡɑrin sɔ̃nɑ nɑ rɑ womusu ko mi nɑ sɔru dimɔ.
55 Wɔ̃kuru nɑ̀ n wunɛn yĩsiru yɑɑyɑ, nɑ rɑ n wunɛn woodɑbɑ nɛnusiwɑ.
56 Ye yɑ sɑ̃ɑ nɛɡiɑ, yerɑ n wunɛn ɡere mɛm nɔɔwɑ.
57 Nɑ mɑɑ wure nɑ ɡerumɔ, Yinni Gusunɔ, nɛɡiɑ n wunɛn ɡere mɛm nɔɔwɑ.
58 Kɑ nɛn ɡɔ̃ru kpurowɑ nɑ nun sokumɔ. A wunɛn nɔɔ mwɛɛru yɑɑyo kpɑ ɑ nɛn wɔnwɔndu wɑ.
59 Nɑ̀ n nɛn dɑɑ bwisikɑ, nɑ rɑ wurewɑ n sĩ wunɛn swɛɛ sɔɔ.
60 Nɑ rɑ n sɛndewɑ n kɑ dɑ mi ɡiɑ, nɑ kun tɔ̃ru ɡɔsie. Kpɑ n wunɛn woodɑbɑ mɛm nɔɔwɑ.
61 Tɔn kɔ̃sobun yini mɑn sikerenɛ. Adɑmɑ kɑ mɛ, nɑ ǹ wunɛn ɡɑri deri.
62 Wɔ̃ku suunu nɑ rɑ sewɑ n nun siɑrɑ wunɛn siri bi ɑ rɑ ko dee deen sɔ̃.
63 Nɑ sɑ̃ɑwɑ be bɑ nun nɑsie kpuro kɑ be bɑ wunɛn woodɑbɑ mɛm nɔɔwɑmmɛn bɔrɔ.
64 Yinni Gusunɔ, wunɛn durom yibɑ hɑnduniɑ kpuro sɔɔ. A mɑn wunɛn woodɑbɑ kpuro sɔ̃ɔsio.
65 Yinni Gusunɔ, ɑ rɑ wunɛn sɔm kowo ɡeɑ kue nɡe mɛ ɑ nɔɔ mwɛɛru kuɑ.
66 A mɑn lɑɑkɑri kɑ bwisi kɛ̃ɛyɔ domi nɑ wunɛn woodɑbɑ nɑɑnɛ sɑ̃ɑ.
67 N sere sekuru wɑ, nɑ rɑɑ kɔ̃ɔrewɑ. Adɑmɑ tɛ̃, nɑ wunɛn ɡɑri nɛni.
68 A sɑ̃ɑwɑ tɔn ɡeo. A mɑn wunɛn woodɑbɑ sɔ̃ɔsio.
69 Tii suobu bɑ mɑn weesu koosimɔ. Adɑmɑ nɛ, nɑ wunɛn yiirebu nɛni kɑ nɛn ɡɔ̃ru kpuro.
70 Ben ɡɔ̃ru ɡɑ bɔɔbu, ɡɑ̃ɑnu ku rɑ bu yeeri. Adɑmɑ nɛ, wunɛn ɡɑri yi rɑ mɑn nuku dobu wɛ̃.
71 N burɑm bo n sekuru wɑ kpɑ n kɑ kpĩ n wunɛn woodɑbɑ ɡiɑ.
72 Nɑ wunɛn nɔɔn ɡere kĩ n kere ɡɑ̃ɑnu nɔrɔbu (1.000) ye bɑ kuɑ kɑ wurɑ kɑ sii ɡeesu.
73 Wunɛn nɔmɑ yɑ mɑn mɔmɑ. Yerɑ yɑ mɑn tɑ̃sisiɑ. A mɑn bwisi kɛ̃ɛyɔ n kɑ wunɛn woodɑbɑ ɡiɑ.
74 Be bɑ nun nɑsie, bɑ̀ n mɑn wɑ, bɑ rɑ nuku dobu kowɑ. Domi nɑ wunɛn nɔɔ mwɛɛru nɑɑnɛ sɑ̃ɑ.
75 Yinni Gusunɔ, nɑ yɛ̃ mɑ wunɛn siribu bu sɑ̃ɑwɑ dee dee. Wunɛn bɔrɔkinirun sɔ̃nɑ ɑ mɑn sekuru doke.
76 A de wunɛn durom mu mɑn nukuru yɛmiɑsiɑ nɡe mɛ ɑ nɛ wunɛn sɔm kowo nɔɔ mwɛɛru kuɑ.
77 A mɑn wɔnwɔndu kuo kpɑ n wɑ nɑ n wɑ̃ɑ. Domi wunɛn sɔ̃ɔsiru tɑ rɑ mɑn nuku dobu wɛ̃.
78 A be bɑ tii sue sekuru dokeo, wee bɑ mɑn dɑm dɔremɔ kɑm sɔɔ. Adɑmɑ nɛ, wunɛn woodɑbɑrɑ nɑ rɑ n bwisikumɔ.
79 Be bɑ nun nɑsie ɑ de bu wurɑmɑ nɛn mi. Be bɑ wunɛn woodɑbɑ yɛ̃ ɑ de bu wurɑmɑ nɛn mi.
80 A de nɑ n wunɛn yiirebu mɛm nɔɔwɑmmɛ mɑm mɑm, kpɑ n ku rɑ sekuru wɑ.
81 Nɑ kɑsu ɑ mɑn fɑɑbɑ ko. Nɑ wunɛn nɔɔ mwɛɛru nɑɑnɛ sɑ̃ɑ.
82 Nɑ kɑsu n wunɛn nɔɔ mwɛɛru ɡiɑ sere nɛn nɔni dɑm dwiiyɑ. Mɑ nɑ tii sɔ̃ɔmɔ nɑ mɔ̀, sere sɑɑ yerɑ̀ kɑɑ mɑn nukuru yɛmiɑsiɑ.
83 Nɑ sɑ̃ɑre nɡe ɡɔnɑn bɔɔru te bɑ bwɛ̃ wiisu sɔɔ. Nɑ ǹ wunɛn woodɑbɑ duɑri.
84 Sere sɑɑ yerɑ̀ kɑɑ de nɛ, wunɛn sɔm kowo nɑ n wɑ̃ɑru dii. Dommɑ kɑɑ be bɑ mɑn nɔni sɔ̃ɔmɔ siri.
85 Tii suobu bɑ suurɑ ɡbemɔ nɛn wuswɑɑɔ. Bɑ ǹ wunɛn woodɑbɑ swĩi.
86 Wunɛn ɡɑri kpuro yi nɑɑnɛ mɔ. Wee yibɛrɛbɑ bɑ mɑn nɔni sɔ̃ɔmɔ kɑm sɔɔ. A mɑn fɑɑbɑ koowo.
87 N tiewɑ fiiko bu kɑ mɑn surɑ bu ɡo. Adɑmɑ kɑ mɛ, nɛ, nɑ ǹ wunɛn woodɑbɑ derimɔ.
88 A mɑn nɛn wɑ̃ɑru wesio wunɛn durom sɔ̃, kpɑ n kpĩ n wunɛn ɡere mɛm nɔɔwɑ.
89 Yinni Gusunɔ, wunɛn ɡɑri yi ko n wɑ̃ɑwɑ wɔllɔ sere kɑ bɑɑdommɑɔ.
90 Wunɛn bɔrɔkiniru tɑ ko n mɑɑ wɑ̃ɑwɑ sere kɑ bɑɑdommɑɔ. Wunɑ ɑ tem swĩi mɑ ɑ mu sire dim dim.
91 Wunɛn woodɑbɑn sɔ̃nɑ ɡɑ̃ɑnu kpuro kɑ wɑ̃ɑ ɡisɔ. Ni kpurowɑ nu mɑɑ wɑ̃ɑ wunɛn sɔ̃.
92 Nɑ̀ kun dɑɑ nuku dobu wɑ wunɛn woodɑ be sɔɔ, nɑ n dɑɑ ɡu nɛn nɔni swɑ̃ɑru sɔɔ.
93 Nɑ ǹ wunɛn ɡere duɑrimɔ pɑi, domi yerɑ yɑ mɑn wɑ̃ɑru wɛ̃ɛmɔ.
94 Nɑ sɑ̃ɑwɑ wunɛɡii, ɑ mɑn fɑɑbɑ koowo. Wunɛn woodɑbɑrɑ nɑ kĩ n swĩi.
95 Tɔn kɔ̃sobu bɑ mɑn mɑrɑ bu ɡo. Adɑmɑ nɛ, wunɛn ɡɑriyɑ nɑ bwisikumɔ.
96 Ye yɑ yibɑ kpuro, yɑ mɑɑ nɔru mɔ. Adɑmɑ wunɛn woodɑbɑ bɑ ǹ kpeeru mɔ.
97 Nɑ wunɛn woodɑbɑ kĩ too. Bɑ rɑ n wɑ̃ɑwɑ nɛn bwisikunu sɔɔ tɔ̃ɔ ɡiriru bɑɑdommɑ.
98 Wunɛn woodɑbɑ bɑ rɑ mɑn bwisi kɛ̃ n kere nɛn yibɛrɛbɑ. Domi nɑ rɑ n bu nɛniwɑ bɑɑdommɑ.
99 Nɑ nɛn yinnibu kpuro yɛ̃ru kerɑ. Domi wunɛn woodɑbɑ bɑ rɑ n wɑ̃ɑwɑ nɛn bwisikunu sɔɔ.
100 Nɑ durɔ tɔkɔnu bwisi kere, domi nɑ wunɛn ɡere mɛm nɔɔwɑmmɛ.
101 Nɑ ku rɑ swɑɑ kɔ̃sɑ mwɛ, kpɑ n wɑ n kɑ wunɛn ɡɑri nɛnɛ.
102 Nɑ ku rɑ de wunɛn woodɑbɑ bu kɑ mɑn tondɑ. Domi wunɑ ɑ mɑn keu sɔ̃ɔsimɔ.
103 Wunɛn ɡɑri yi tim dobu kere nɛn nɔɔwɔ.
104 Nɑ kuɑ bwisiɡii wunɛn woodɑbɑn sɔ̃. Yen sɔ̃nɑ nɑ weesun swɛɛ kpuro tusɑ.
105 Wunɛn ɡɑri yi sɑ̃ɑwɑ nɡe fitilɑ ye yɑ mɑn swɑɑ sɔ̃ɔsimɔ.
106 Nɑ bɔ̃ruɑ nɑ sire nɑ nɛɛ, kon wunɛn sɔ̃ɔsiru mɛm nɔɔwɑ, domi tɑ sɑ̃ɑwɑ dee dee.
107 Nɑ nɔni sɔ̃ɔre ɡem ɡem. Yinni Gusunɔ, ɑ mɑn dɑm kɛ̃ nɡe mɛ ɑ nɔɔ mwɛɛru kuɑ.
108 Yinni Gusunɔ, ɑ nɛn siɑrɑbu wuro, kpɑ ɑ mɑn wunɛn sɔ̃ɔsiru ɡiɑsiɑ.
109 Nɛn wɑ̃ɑrɑ wɑ̃ɑwɑ kɑri sɔɔ bɑɑdommɑ, ɑdɑmɑ nɑ ǹ wunɛn woodɑbɑ duɑrimɔ pɑi!
110 Tɔn kɔ̃sobu bɑ mɑn yɛ̃ri bɛrie. Kɑ mɛ, nɑ wunɛn ɡere swĩi.
111 Wunɛn ɡɑri sɑ̃ɑwɑ nɛn tubi kɑ bɑɑdommɑɔ, domi yi sɔɔrɑ nɛn ɡɔ̃ru dobu wɑ̃ɑ.
112 Nɛn ɡɔ̃ru ɡɑ kĩ ɡu wunɛn woodɑbɑ mɛm nɔɔwɑ bɑɑdommɑ sere kɑ nɔrɔ.
113 Nɑ ɡɔ̃rusu yiruɡibu tusɑ, ɑdɑmɑ nɑ wunɛn woodɑbɑ kĩ.
114 Wunɑ ɑ sɑ̃ɑ nɛn kuku yeru kɑ nɛn tɛrɛru. Wunɛn nɔɔ mwɛɛru sɔɔrɑ nɛn yĩiyɔbu wɑ̃ɑ.
115 Tɔn kɔ̃sobu, i kɑ mɑn tondo, kpɑ n wɑ n Gusunɔ nɛn Yinnin woodɑbɑ swĩi.
116 Yinni Gusunɔ, ɑ mɑn kɔ̃suo nɑ n kɑ wɑ̃ɑ nɡe mɛ ɑ nɔɔ mwɛɛru kuɑ. A ku mɑn sekuru doke nɛn yĩiyɔbu sɔɔ.
117 A de ɑ n sɑ̃ɑ nɛn tɑ̃si yeru kpɑ n fɑɑbɑ wɑ. Kpɑ nɑ n wunɛn woodɑbɑ lɑɑkɑri sɑ̃ɑ bɑɑdommɑ.
118 A rɑ be bɑ rɑ wunɛn woodɑbɑ deri ɡɛmwɑ. Domi ben nɔni wɔ̃kubu bu ǹ ɑrufɑɑni mɔ.
119 A rɑ tɔn kɔ̃sobu ɡɛriewɑ tem mɛn di nɡe nim yɑkɑ. Yen sɔ̃nɑ nɑ wunɛn woodɑbɑ swĩi.
120 Wunɛn nɑnum mu derɑ nɛn wɑsi diirimɔ. Nɑ wunɛn siribu nɑsie.
121 Nɑ wunɛn woodɑbɑ kɑ wunɛn ɡem mɛm nɔɔwɑmmɛ. A ku mɑn be bɑ mɑn dɑm dɔremɔ nɔmu sɔndiɑ.
122 A nɛ, wunɛn sɔm kowo nɔɔ mwɛɛru kuo mɑ kɑɑ mɑn somi. A ku de tii suobu bu mɑn dɑm dɔre.
123 Nɛn nɔni dɑm dwiiyɑ ye nɑ wunɛn fɑɑbɑ kɑ wunɛn ɡem mɛ̀n nɔɔ mwɛɛru ɑ kuɑ mɑrɑ.
124 A nɛ, wunɛn sɔm kowo kuo nɡe mɛ wunɛn tɔn ɡeerɑ nɛ. A mɑn wunɛn woodɑbɑn keu sɔ̃ɔsio.
125 Nɑ sɑ̃ɑwɑ wunɛn sɔm kowo. A mɑn bwisi kɛ̃ɛyɔ n kɑ wunɛn sɔ̃ɔsiru ɡiɑ.
126 Yinni Gusunɔ, sɑɑ yɑ den turɑ ɑ kɑ se domi wee bɑ wunɛn woodɑ sɑrɑmɔ.
127 Adɑmɑ nɛ, nɑ ye kĩ n kere wurɑ ɡeɑn tii.
128 Nɑ ye kpuro ɡɑrisiwɑ dee dee. Nɑ swɛɛ yi yi ǹ dɛnde kpuro tusɑ.
129 Wunɛn yiirebu bu rɑ n wɑ̃, yen sɔ̃nɑ nɑ bu nɛni.
130 Wunɛn ɡɑrin ɡiɑbu bu rɑ tɔnu yɑm bururɑsiewɑ, kpɑ yi bwisi sɑribɑ bwisi kɛ̃.
131 Nɑ kɑsu ɡem kɑ tiɑ n wɑ n wunɛn woodɑbɑ ɡiɑ.
132 Yinni Gusunɔ ɑ mɑn mɛɛrimɑ, kpɑ ɑ mɑn durom kuɑ nɡe mɛ ɑ rɑ be bɑ nun kĩ kue.
133 A de nɑ n tɑ̃sɑ wunɛn ɡɑri sɔɔ. A ku de torɑru ɡɑru tɑ n mɑn wɑ̃ɑsi.
134 A mɑn wɔro tɔmbun dɑm dɔrebun di, kpɑ n kpĩ n wunɛn sɔ̃ɔsiru mɛm nɔɔwɑ.
135 A kɑ mɑn nɔnu ɡeu mɛɛrio, kpɑ ɑ mɑn wunɛn yiirebu sɔ̃ɔsi.
136 Wee nɑ nɔni yĩresu kokumɔ nɡe dɑɑru, domi tɔmbɑ kun wunɛn woodɑbɑ mɛm nɔɔwɛ.
137 Yinni Gusunɔ, ɑ sɑ̃ɑwɑ ɡemɡii. Wunɛn siribu bu rɑ n sɑ̃ɑwɑ dee dee.
138 A wunɛn woodɑ yiiwɑ ɡem sɔɔ. Yɑ mɑɑ nɑɑnɛ mɔ.
139 Nɑ̀ n nɛn yibɛrɛbɑ wɑ be bɑ wunɛn ɡɑri duɑri, nɛn mɔru rɑ sewɑ.
140 Wunɛn ɡɑri yi nɑɑnɛ mɔ. Nɛ, wunɛn sɔm kowo nɑ yi kĩ.
141 Wee nɑ ǹ kpɑ̃, mɑ bɑ mɑn ɡɛmɑ. Kɑ mɛ, nɑ ǹ wunɛn woodɑbɑ duɑri.
142 Wunɛn ɡem mu ku rɑ kpe. Mɛyɑ wunɛn ɡɑri yi sɑ̃ɑwɑ ɡem.
143 Nuku sɑnkirɑnu kɑ nɔni swɑ̃ɑrɑ mɑn wɔrimɔ, ɑdɑmɑ wunɛn woodɑbɑ bɑ rɑ mɑn nuku dobu wɛ̃.
144 Wunɛn yiirebu bu sɑ̃ɑwɑ dee dee sere kɑ bɑɑdommɑɔ. A mɑn bwisi kɛ̃ɛyɔ yi yi koo de nɑ n wɑ̃ɑ.
145 Yinni Gusunɔ, nɑ nun sokumɔwɑ kɑ nɛn ɡɔ̃ru kpuro. A mɑn wurɑrio, kpɑ n kpĩ n wunɛn sɔ̃ɔsiru nɛnɛ.
146 Nɑ nun kɑnɑmɔ, ɑ mɑn fɑɑbɑ koowo, kpɑ n kpĩ n wunɛn woodɑbɑ mɛm nɔɔwɑ.
147 Nɑ rɑ kɑnɑru kowɑ yɑm mu sere sɑ̃rɑ, kpɑ nɑ n wunɛn nɔɔ mwɛɛnu nɑɑnɛ sɑ̃ɑ.
148 Yɑm mu sere sɑ̃rɑ nɑ rɑ sewɑ n kɑ wunɛn ɡɑri mɛɛri.
149 A nɛn nɔɔ nɔɔwɔ wunɛn durom sɔ̃. A mɑn sirio nɡe mɛ ɑ rɑ siri, kpɑ n wɑ nɑ n wɑ̃ɑ.
150 Be bɑ kɔ̃sɑ bwisikumɔ, be wee bɑ mɑn turuku kuɑ. Bɑ wunɛn woodɑbɑ deri.
151 Wunɛ Yinni Gusunɔ, ɑ wɑ̃ɑwɑ nɛn turuku. Wunɛn ɡɑri yi sɑ̃ɑwɑ ɡem.
152 Nɑ yɛ̃ sɑɑ yee yellun di mɑ ɑ wunɛn woodɑbɑ yiiwɑ bɑ n kɑ wɑ̃ɑ sere kɑ bɑɑdommɑɔ.
153 A nɛn nɔni swɑ̃ɑru mɛɛrio, kpɑ ɑ mɑn wɔrɑ. Nɑ ǹ wunɛn woodɑbɑ duɑrimɔ.
154 A kɑ mɑn yinɔ kpɑ ɑ mɑn yɑkiɑ. A de nɑ n wɑ̃ɑ nɡe mɛ ɑ nɔɔ mwɛɛru kuɑ.
155 Tɔn kɔ̃sobɑ kun fɑɑbɑ wɑsi, domi bɑ ku rɑ wunɛn sɔ̃ɔsiru kɑsu.
156 Yinni Gusunɔ, wunɛn durom mu kpɑ̃. A mɑn sirio nɡe mɛ ɑ rɑ siri, kpɑ n wɑ nɑ n wɑ̃ɑ.
157 Nɛn yibɛrɛ be bɑ mɑn nɔni sɔ̃ɔmɔ bɑ dɑbi. Adɑmɑ kɑ mɛ, nɑ ǹ wunɛn ɡere yinɑmɔ.
158 Nɑ tɔnu kɑmbɑ tusɑ, domi bɑ ku rɑ wunɛn woodɑbɑ swĩi.
159 Yinni Gusunɔ, ɑ n yɛ̃ mɑ nɑ wunɛn woodɑbɑ kĩ. A de nɑ n wɑ̃ɑ wunɛn durom sɔ̃.
160 Gemɑ mu sɑ̃ɑ wunɛn ɡɑrin nuuru. Wunɛn woodɑbɑ kpuro bɑ kon sɑ̃ɑwɑ ɡem sere kɑ bɑɑdommɑɔ.
161 Wee sinɑ bibɑ mɑn nɔni sɔ̃ɔmɔ kɑm sɔɔ. Adɑmɑ wunɛn ɡɑri tɔnɑwɑ nɑ nɑsie.
162 Nɑ rɑ n nuku dobu mɔ wunɛn ɡɑri sɔɔ nɡe wi u dukiɑ bɑkɑ wɑ u ɡurɑ.
163 Nɑ weesu tusɑ. Mɑ nɑ wunɛn woodɑbɑ kĩ.
164 Sɔ̃ɔ teeru, nɔn nɔɔbɑ yiruwɑ nɑ rɑ nun siɑre wunɛn siri bi bu sɑ̃ɑ dee deen sɔ̃.
165 Be bɑ wunɛn woodɑbɑ kĩ, bɑ rɑ n bɔri yɛn bɑkɑru mɔ. Kɔ̃sɑ ku rɑ bu deemɛ.
166 Yinni Gusunɔ, nɑ wunɛn fɑɑbɑ yĩiyɔ. Yen sɔ̃, nɑ wunɛn woodɑbɑ mɛm nɔɔwɛ.
167 Nɑ rɑ wunɛn yiirebu mɛm nɔɔwɛ. Nɑ rɑ bu kɑ̃ too too.
168 Nɑ wunɛn yiirebu kɑ wunɛn woodɑbɑ swĩi, domi nɛn kookoosu kpuro wɑ̃ɑ wunɛn wuswɑɑɔ.
169 A de ɑ nɛn wuri nɔ. A mɑn bwisi kɛ̃ɛyɔ nɡe mɛ ɑ nɔɔ mwɛɛru kuɑ.
