16 Nəri nəha hiamətoni ramesi pen nəɡkiariien i Joel Profet rɨməni fwe kupwən:
17 Kumwesən rɨni mə, ‘Tramevən ipaka tɨ nəpɨn sampam, iou takərhi irapw nənɨmwɨn səiou trevən tɨ nərmama me pam. Nɨpwnətɨmiaha me nərman mɨne nɨpran tuhəni irapw nəɡkiariien sə ruku pen tɨ Nənɨmwɨn səiou. Ntəmaruə me səkɨmiaha me tuhətə vison me. Nərɡharə me səkɨmiaha me tuhəməkrəha.
18 Ia nəpɨn nəha nərmama me səiou kani irəha mə iotukwininari me, nəri auər a mə irəha nərman uə nɨpran, mətə takərhi irapw Nənɨmwɨn səiou trevən tɨ nirəha, nənə irəha tuhəni irapw nəɡkiariien sə ruku pen tɨ Nənɨmwɨn səiou.
19 Tako narimnari me fwe irənhə ia nɨmaɡouaɡou. Nərmama tuhətoni, mhərkərinari irə. Ia təkure tənə tako nɨmtətien me: netə, mɨne napw, mɨne nɨse napw.
20 Meri truvehe mɨpitəv. Məkwə truvehe məruerəv məmwhen ia netə. Kurirə irə nəpɨn səvəi Iərɨmənu truvehe. Nəpɨn nəha trasori mopə ia nəpɨn me pam.
21 Ia nəpɨn nəha nərmama me pam səməme tuhəkwein ia Iərɨmənu in truvehimɨru irəha.’
22 Nəmə Isrel tiho ro mhəreɡi nəɡkiariien me i. Iesu nəha iəmə Nasaret Kumwesən rɨnahatən atukwatukw m kɨmiaha i mə in pərhien rərhi pehe i ruvehe tukumiaha. Nəpɨn Iesu rɨnamavən ia rerɨmiaha fwe kupwən, Kumwesən rauvei pen nɨskaiien min, ramo nɨmtətien me mɨne narimnari asori me hiamətoni hiamərkərinari irə rəmwhen hiəuvəukurən raka.
23 Nəpɨn Kumwesən ruvei pen Iesu ia rəɡɨmiaha, in ro iamɨnhi irə mamesi pen a nətərɨɡien səvənhi mɨne nəfe in ruvəukurən raka fwe kupwən mə tro. Nənə kɨmiaha hiousi əpune Iesu ia noien nəha hiəno irə. Hiəmri pen in ia rəɡi nəmə ərəha me, nənə hərui tərini pen in ia nei kamarkuaui.
24 Mətə Kumwesən rɨfi Iesu ia nəmisəien səvəi nemhəien, mo in rətui mwi. In rɨno iamɨnhi irə tɨ nəri nə mə nemhəien ko rɨpkəkwtəmhiri mhə Iesu.
25 Rəmwhen ia nəɡkiariien i Kiɡ Tevɨt rɨməni irə mɨnuə: ‘Iakamətə ik krau mik Iərɨmənu səiou ia nəpɨn me. Ikamarə ipaka tukw iou. Nari riti riwən tro iou iakətəmnɨmwɨn.
26 Ro iamɨnhi irə rerɨk raɡien pɨk. Tərhuk raməɡnəɡɨni ik Iərɨmənu səiou. Nɨpwrak mwi trarə amasan, məpwəh nehekɨrien,
27 tɨ nəri nə mə nəpɨn takemhə tikəpwəh nəpwəhien iou iakarə Imwei Nəkur Həuvamhə. Tikəpwəh nəseniien nɨpwrai iəmə ikinan səim rɨmərɨr.
28 Ikɨnahatən raka iou ia suatuk me səvəi nɨmɨruien. Tiko iou krau mik krauarə rerɨk ramaɡien.’
29 Piak me, iakuə takɨni pehe tukumiaha i mə Kiɡ Tevɨt, kaha kupwən səkɨtaha, in rɨpkəɡkiari atukw a mhə irə. In ruvamhə. Kuvənɨmwi raka. Səvənhi kref raməmak ihi. Fwe tui meste pehe ipwet mɨne samətoni.
30 Mətə in profet riti. Rukurən amasan mə Kumwesən rɨməuvehi kwəsuahi mɨni pen tukwe in mɨnuə tɨ nəpɨn riti in ro kwənəkwus riti səvənhi ruvehi təmwhekɨn mərɨmənu.
31 Kiɡ Tevɨt rɨməkupwən mətoni Kristo nəha mə trətui mwi ia nemhəien səvənhi. In nəha Kiɡ Tevɨt rəɡkiari irə ia Ol Sam nəpɨn rɨni mɨnuə ‘Kumwesən trəpwəh nəpwəhien in ramarə Imwei Nəkur Həuvamhə. Nɨpwran trɨpkɨmərɨr mhə.’
32 Iesu nəha, Kumwesən rɨnəsuəpwiri in ia nemhəien səvənhi. Kɨmaha i iahənətoni, mamhəni irapw mə ro nɨpərhienien.
33 Kumwesən, tata səvəi Iesu, ruvehi utə in mukurei pen in ia nɨkaren mwatuk. In ruvei pen Nənɨmwɨn Ikinan min rəmwhen rɨno raka promes fwe kupwən mə tro. Iesu ruvehi Nənɨmwɨn nəha, mərhi pehe i. Nəri nəha hiamətə, mamhəreɡi Nənɨmwɨn Ikinan nəha.
34 Kiɡ Tevɨt rəpwəh nutəien fwe ia neiai, mətə in atukwatukw nəha rəɡkiari ia Kristo, mɨni mə, ‘Kumwesən rɨni pen tɨ Iərɨmənu səiou mə, Əkure ia nɨkarek mwatuk
35 meste tako nərmama səməme haməmwəki ik həuvehe, tikərpwi utə tɨpaɡe nɨsum mi ia nirəha.’
36 Ro iamɨnhi irə kɨmiaha pam nəkur Isrel tihaməkeikei mhəukurən mə Iesu nəha hiənərui tərini pen ia nei kamarkuaui, in nəha təkwtəkwuni Kumwesən ro in ruvehe mo Iərɨmənu mɨne Kristo.”
37 Nəpɨn nərmama me nəha həreɡi nəɡkiariien səvəi Pita, rerɨnraha rəpou pɨk. Həres pen Pita mɨne aposol me i mə, “Piak me, təkwtəkwuni nəha tahəfo nəha?”
38 Mɨreɡi Pita rɨni pen tɨ nirəha i mə, “Kɨmiaha tihaməkeikei mhərərɨɡ ia noien ərəha me səkɨmiaha mhəuvehe pwəh iaho paptaes ia kɨmiaha ia nəɡhi Iesu Kristo. Tiho iamɨnhi irə mɨne nənə Kumwesən trəpwəh nərpwɨnien noien ərəha me səkɨmiaha. Kɨmiaha tihəuvehi Nənɨmwɨn Ikinan.
