10 Quichi tahan yo ñuhun Frigia, ñuhun Panfilia, ñuhun Egipto, ta sava ñuhun Libia cha iyo cuenda ñuhun Cirene. Ndihi ñuhun can quichi yo, ta iyo ñivi tahan yo quichi ñi ñuun Roma, ta iyo ñi ihya.
11 Iin cuhva yo cuu ñivi judío, vati tata judío vachi cuahnu yo, ta inga cuhva yo sacuaha yo, ta ni quihvi yo cuenda ñivi judío. Iyo tahan yo quichi yo ñuhun Creta chi ñuhun Arabia. Chini soho yo tuhun cha cahan ñivi Ndioo can, vati cahan ñi tuhun cahan maan yo, ta cati ñi ti cahnu xaan cha ni savaha ra Ndioo ―cati ñi chi tahan ñi.
12 Iyo xaan cuni ndihi ñivi can, ta ña nihin ñi cuhva ñaan cha cuu chi. Iyo ñi cati ñi chi tahan ñi ti: ―¿Ñaan cha cuu chehe? ―cati ñi.
13 Inga ñi sacateni ñi, ta cati ñi ti: ―Chini xaan ra, vati cha chihi ra ndixi ―cati ñi.
14 Tacan cuu, ta ni chacuinda ra Pedro chi ndihi ra tatun Jesuu, ta quechaha cati tuhun ra Pedro chi ñican cha iyo ñuun Jerusalén can. Cati ra ti: ―Ndioho yani xaa, na cua tasoho ndo tuhun cua cati tuhin chihin ndo, vati tacan cua coto ndo ñaan cuenda cha cahan ndi inga tuhun.
15 Ña chini ndi cuhva saxini maan ndo, vati caa iin cha nahan cuu chi, ta ña ta queta hora cha chica cuu ra chini.
16 Ni chacoo iin rai cha cunani Joel iti chata. Ra cahan cuenda ra Ndioo cuu ra, ta cati ra ti:
17 Cha cati ra Ndioo ti: nu cuahan quivi cua tachi yu Tati Ii yu, ta cua coo ra chi ndihi ñivi. Sehe ndo cua cahan tuhin. Cua ndehe ra tivaa cha cua sanahin chi ra, ta cua cahan ñumahna chi ra chanihin.
18 Nu cuahan quivi cua tachi yu Tati Ii yu, ta cua coo ra chi ñivi cuu musu yu, ta cua cahan ñi tuhin.
19 Iti siqui cua savahi iin cuhva, ta cua nduiyo ñivi. Iti nu ñuhun cua savahi inga cuhva, ta cua ndehe ñi yoso cuhva iye. Cua coo tu ndoho, vati cua cuvi xaan ñivi, ta cahnu xaan ñuhun cua cayu, ta cuaha xaan yuhma cua coo.
20 Cua ndahva ñuhun ri nicandi, ta cua nducuaha ri yoo. Cuaha ri cua cuu sava ta cua iyo niñi. Tacan cuu, ta cua queta quivi cahnu quivi cua quichi ndico ra chahnu, ta cua tachi tuni ra chi ndihi ñivi.
21 Tu cua cahan ndahvi ñivi chihin yu, cua cacu ñi chi tu ndoho can. Tacan ni cati ra Ndioo ―cati ra Joel can.
22 ’Ndioho yani xaa, tasoho ndo tuhun cua cati tuhin chi ndo. Chahi cuenda chi ndo yoo rai cuu ra Jesuu ra ñuun Nazaret. Chito ndo ti tiso ra Ndioo tiñu chi ra Jesuu, vati savaha ra Jesuu iin cuhva inga cuhva. Chacan cuu cha chito ndo ti cha iyo tu ndee ini chihin ra Jesuu, ta chito ndo cha nduiyo ñivi ndehe ñi cha savaha ra, ta chito ndo yoso cuhva iyo ra Ndioo. Ndehe maan ndo ndihi cha savaha ra Jesuu, vati chaha ra Ndioo tu ndee ini chi ra chacoo nu iyo ndo.
23 Iti chata nu quichi quivi chito ra Ndioo yoso cuhva cua savaha ndo chi ra Jesuu, ta vitin chaha ra cha savaha ndo cuhva cuni maan ndo. Chacan cuu cha chaha ndo cha taa ra savaha ndavaha ni chi ra Jesuu nu cruu. Tacan ni chahni ndo chi ra,
24 soco chaha ra Ndioo tu ndee ini chi ra, ta natacu ndico ra. Tava ra Ndioo chi ra Jesuu nu iyo ñivi ndii, vati ña cuu ndoo ra tican.
25 Iti chata ni cati ra David cuenda ra Jesuu ti: Chite vati iyo ra chahnu chihin yu. Iyo ra ndihi ni hora, vati ndoo cuii ra chihin yu. Chacan cuu cha ña cua saxini yu.
26 Chacan cuu cha cusii ini yu, ta chahi cuenda vati sii cuni yu. Chito vahi cha cua nandoto ndico ndiche.
27 Ña tichahi, vati ña cua nacoo ihni cun chihin yu nuun iyo ñivi ndii, ta ni ña cua cuhvon cha cua tahyu iquin cuñu yu.
