18 Da varkul ma ra tena varpiam ure ra tena takodo, Ma ra tena vavagu na kia vue ra dovot na tutana.
19 A kini ta ra bil i boina, Ma pa i boina tuna ra kini varurung ma ra vavina, a tena varngangar ma ra tena varvakankan.
20 A ngatngat na tabarikik ma ra dangi dir ki ta ra kuba i ra tena kabinana, Ma ra lunga i vole dir par.
21 Nina i mur ra mangamangana takodo ma ra varmari, Na tikan tadav ra nilaun ma ra variru.
22 A tena kabinana i ko rikai ta ra pia na pal kai ra umana lebe, Ma i vue pukue vue ra dekdekina nina di nurnur tana.
23 Nina i tur bat ra ngiene ma ra karameana, I balaure bat kana nilaun kan ra kini na malari.
24 Nina ba i kolakolo ra nuknukina ma i malamala luluai, di vatang ia ba ra tena varkulumai, I papalum ma ra ngala na nuknukina ure mule, ma pa i ruva.
25 A tabauma i mat ma ra mamainga upi ta magit. Tago ra limana i ole ra papalum.
26 Tikai go i manga puruai ra balana upi ra magit a bungbung parika, Ma ra tena takodo i varvartabar ma pa i muie.
27 A tinabar kai ra tena varpiam a magit na milmilikuan; Maia pa, a magit na milmilikuan tuna ba i tul tar ia ma ra bilak na nuknukina.
28 A tena varvai vavaongo na virua ka, Ma ga ra tinata kai nina i valavalongor na tur tukum.
