26 Pǝ tɔɔ kɛ́ mɑ lɑɑkɑlɩ cɑɣɑ tǝntǝmlɛ kɛ teu, nɑ lɑŋhɛɛlɛ kʋɣʋ-m mɑ yɔɣɔtɑɣɑ tɑɑ. Pɑɑ mɑ kɛ́ yʋlʋ nɑ mɑɑ sɩ tɔ, mɑ cɑɣɑnɑ tɛɛlʋɣʋ.
27 Pǝ tɑɣɑ pʋlʋ tɔɔ, Ɩsɔ nyɑ́ n kɑɑ lɔ-m yem kɛ́ ɑtɛtǝlɛ tɑɑ. N kɑɑ yele sɩ nyɑ́ yʋlʋ mɑ́ mɑ́ tɩɩ sɔŋ pɑɑ pǝcɔ mɑɣɑmɑɣɑ.
28 N hʋlɑ-m weesuɣu mpɑɑŋ. N kɑ́ wɛɛ mɑ kiŋ nɑ ń hʋlǝsǝɣɩ mɑ lɑŋlɛ kɛ teu.
29 Apɑlɑɑ mɛ, ɩ́ yele mɑ́ tʋlǝsɩ-mɛɣɛ tɑ́ lɔŋcɛ Tɑfiiti tɔm tǝcɛɩcɛɩ sɩ, ɩ sǝpɑ nɑ pɑ́ pimi-ɩ, nɑ ɩ pǝlɑɑʋ wɛ tɑ́ hɛkʋ kɛ hɑlǝnɑ sɑŋɑ.
30 Tɑfiiti ɩnɩ ɩ kɑ kɛ́ Ɩsɔ kʋyɔɣɔtʋtʋ tɛlǝsʋlʋ kɛ́ nɑ ɩ́ nyǝmɑ́ teu sɩ, Ɩsɔ kɑ tɔmɑ nti nɑ tuunɑʋ sɩ ɩ kɑ́ lɑpɩ-ɩ tɔ pɩɩ lɑ. Sǝsɩ Tɑfiiti lʋlʋɣʋ tɑɑ tʋ nɔɣɔlʋ kɑ́ tɔɣɔnɑ kɑwulɑɣɑ ŋkɑ Tɑfiiti ɩnɩ ɩ kɑ tɔɣɑɑ tɔ.
31 Hɑtoo lɔŋ Tɑfiiti nɑwɑ mpi pɩɩ tɛ nɑ pǝ́ lɑ tɔ. Pǝ tɔɔ kɛ́ ɩ yɔɣɔtɑ Mesii sǝpʋ nɑ ɩ́ fe tɔ pǝ tɔm sɩ: Pɑ tɑ lɔ-ɩ yem kɛ́ ɑtɛtǝlɛ tɑɑ. Ɩ tɑ tɩɩ sɔŋ pɑɑ pǝcɔ mɑɣɑmɑɣɑ.
32 Yesu wei ɩnɩ ɩ tɔm mɑ yɔɣɔtǝɣɩ ɩsǝntɔ tɔ, Ɩsɔ feesɑ-ɩ, nɑ tɑ́ tǝnɑ tǝ nɑnɑ tɑ́ ɩsǝpee tǝkelekele.
33 Ɩsɔ kʋsɑ ɩ nyʋɣʋ nɑ ɩ́ cɑɣɑsɩ-ɩ ɩ kɔŋkɔŋ tɑɑ. Ɩlɛnɑ ɩ́ kpɑɣɑ Feesuɣu Nɑŋŋtʋ, wei ɩ kɑ tɔmɑ sɩ ɩ kɑ́ hɑ tɔ, nɑ ɩ́ cɛlɛ-ɩ. Nɑ Feesuɣu Nɑŋŋtʋ ɩnǝɣɩ Yesu tisɑ tɑ́ tǝnɑ tɑ́ tɔɔ, nɑ ɩ́ tɔŋnɑ nɑʋ nɑ nɩɩʋ kɛ ɩsǝntɔ.
34 Pǝ tɑɣɑ ɩsɩɩ Tɑfiiti mɑɣɑmɑɣɑ nɑ́ kpɑ ɩsɔ se. Amɑ pɑɑ nɑ mpʋ ɩ yɔɣɔtɑɑ sɩ: Tɑcɑɑ Ɩsɔ heelɑ mɑ Sɔsɔ sɩ: Cɑɣɑ mɑ kɔŋkɔŋ tɑɑ.
35 Hɑlǝnɑ mɑ́ kɔnɑ nyɑ́ kolontunɑɑ, nɑ ń loosi nyɑ́ nɔɔhɛɛ kɛ pɑ tɔɔ.
36 Pǝ wɛɛ sɩ Ɩsɛɣɛlɩ yǝlɑɑ tǝnɑ kɑ́ nyɩ teu tǝkpɑtɑɑ sɩ, Yesu wei ɩ́ kɑmɑ sǝm tesikɑ tɔɔ tɔ, ɩnǝɣɩ Ɩsɔ lɑpɑ Sɔsɔ nɑ Mesii.
37 Ɩsɛɣɛlɩ nyǝ́mɑ nɩɩ tɔm tǝnɛ ɩlɛnɑ pɑ lɑŋɑ pǝsɩ sɔsɔm, nɑ pɑ́ pɔɔsɩ Piyɛɛ nɑ tillɑɑ lɛlɑɑ sɩ: Tɑ tɑɑpɑlɑɑ mɛ, ɩsǝnɑɣɑ pǝ wɛɛ sɩ tǝ́ lɑ ɩlɛ?
38 Tǝnɑɣɑ Piyɛɛ cɔ-wɛ sɩ: Ɩ́ lɔ mǝ ɩsɑɣɑtʋ nɑ ɩ́ lɑɣɑsɩ hʋwɛɛ, nɑ pɑ́ yɑɑ Yesu Kilisiti hǝtɛ nɑ pɑ́ sɔnɑ pɑɑ mǝ tɑɑ wei kɛ́ Ɩsɔ lʋm, nɑ pǝ́ hɩɩsɩ mǝ ɩsɑɣɑtʋ. Ɩlɛnɑ ɩ́ hiki Ɩsɔ kʋcɔɔʋ sɔsɔɔʋ ŋku kʋ kɛ́ Feesuɣu Nɑŋŋtʋ tɔ.
39 Pǝ tɑɣɑ pʋlʋ tɔɔ, mǝ nɑ mǝ piyɑ nɑ hɑtǝlɑɣɑ nyǝ́mɑ kɛ Ɩsɔ tɔmɑ sɩ ɩ kɑ́ hɑ, ɩ́ tɩɩ lɑɑlɑɑ nɑ ɩ́ yɑɑ wei te, ɩ́lɛ́ ɩ hikɑɑ kɛ́.
40 Ḿpʋ́ɣʋ́ Piyɛɛ tɑsɑ Ɩsɛɣɛlɩ nyǝ́mɑ kɛ tɔm pɑɣɑlɛ kɛ heeluɣu tɔtɔ, nti tɩɩ sǝnɑ-wɛ nɑ tǝ sɔɔsɩ-wɛɣɛ ɑpɑlʋtʋ tɔ. Sǝsɩ, ɩ́ lǝsɩ mǝ tǝɣɩ yǝlɑɑ letɑɑ pɑnɛ pɑ tɑɑ nɑ ɩ́ tʋlɩ-tɩ.
41 Ḿpʋ́ɣʋ́ Ɩsɛɣɛlɩ nyǝ́mɑ tɑɑ yǝlɑɑ tuutuumɑ mʋ Piyɛɛ tɔm nɑ pɑ́ sɔ-wɛɣɛ Ɩsɔ lʋm. Kʋyɑŋku, mpɑ pɑ sʋʋ Ɩsɔ sɛɛʋ tɔ, pɑ nyɔɔŋ tɑlɑ ɩsɩɩ iyisi tooso (3000).
42 Pɑ ɩsǝlɛ kɑ sɛɛnɑ tillɑɑ kʋsɛɣɛsǝtʋ kɛ nɩɩʋ, nɑ pɑ tǝŋɑɣɑ tǝmɑ nɑ lɑŋhʋlʋmlɛ kɛ sɔsɔm. Pɑ tɔkɑɣɑ tǝntǝmlɛ kɛ tɑm, nɑ pɑ́ puki Ɩsɔ sǝlǝmʋɣʋ pɩɩ sɔɔ nɔɣɔlʋ.
43 Tillɑɑ lɑkɑɣɑ piti tǝmɑ nɑ Ɩsɔ kɔkɔlɔ nyǝmnɑɑ, nɑ pǝ́ kpɑɑ pɑɑ wei kɛ́ sɔɣɔntʋ.
44 Ɩsɔ sɛɛlɑɑ tǝnɑ kɑ wɛnɑ nɔɣɔ kʋlʋmɑɣɑ, nɑ pɑ kpɛntɑɣɑ mpi mpi pɑ wɛnɑ tɔ.
45 Pɑ pɛɛtɑɣɑ pɑ tɛtʋnɑɑ nɑ pɑ wontunɑɑ nɑ pɑ́ kotiɣi pǝ liɣitee kɛ tǝntǝmlɛ, nɑ pǝ́ cɑɑlɑ pɑ tɑɑ wei pɑ wɑɑsǝnɑ-ɩ.
