34 “Ŋoŋe râsifâc‐ŋeŋic jaŋere mâreŋko juhapie mâreŋ‐ŋeŋiczi niniŋ siarereŋ fuarâ foha sabata jara hombaŋ‐ticne maickeocmu, dameŋ ira hâcne mâreŋ‐ŋeŋiczi qoroc herâ fozejec.
35 Mâreŋ e niniŋ siarereŋ fuarâ foocmu iŋuc jaha qoroc herâ forahuc juzejec hâcne. Ŋoŋe mâreŋ ira juhuc sabata jara hombaŋ mi ŋembiŋte iŋuc mi fojujec.
36 Ʒanʒaŋnefâc‐ŋeŋic râsifâc‐ŋeŋic jaŋere mâreŋko juniŋmu jaŋe ejarepe maŋjeŋic gâckeme jâcrehac hâmocne mâŋâŋzi ficneme fânâŋkeme hâwic‐ŋopame wiseniŋmu, ine ŋic moczi ʒikare hâhâwicte wiseekac irec sâc wiseniŋmu hâcne, ehuc moczi moc jopa jâpec mi ejareha sifu waha jopaocmu.
37 Moczi moc jopa jâpec mi ejareha, ʒikazi jâpec‐nâpokac muhuc wiserâ fâfâc‐jopame waha jopaocmu. Ehame râsifâc‐ŋeŋic sanaŋke‐jareniŋte tâpiri basaniŋmu.
38 Ehuc râsifâc‐ŋeŋic jaŋere ŋondeŋko sipirickepie mâreŋ‐jeŋiczi ɋâcŋopaocmu.
39 Ehame ʒanʒaŋnefâc‐ŋeŋic jaŋe jaŋacne kiŋte me mamac ŋosafâc‐jeŋic jaŋere kiŋte erâ râsifâc‐ŋeŋic jaŋere mâreŋko hâmo miziec eniŋmu.
40 “Jaŋe iŋuc ehuc jaŋe jaŋacne mecne â mamac ŋosafâc‐jeŋic jaŋe mecne ʒâʒâfic hetâcnerâ râsi enarehuc kiŋ bahac bâfuambiŋ i mufuaniŋmu.
41 Erâ dâŋnane qâsuambiŋte no iŋuc jaha dâŋjeŋic qâsuahuc râsifâc‐jeŋic jaŋere mâreŋko râec‐jopapo i ʒâŋitaniŋmu wâc. Jaŋe iŋuc epie maŋrâŋgeŋ‐jeŋiczi urueha okacne fua‐jareme manapie sâckeocmuo
42 ine noni Jakobo â Isaka erâ Abraham jaŋehec ʒâʒâfic epo irec manasuhuc mâreŋ‐jeŋicte wâc mi nikecnuocmu.
43 Jaŋe ine mâreŋ‐jeŋic beherâ rapie mâreŋzi ŋic tâmiric foha sabata hombaŋ‐ticne maickezejec. Jaŋe ine mumutâc dâŋnane qâsuahuc dâŋsanaŋ‐nane qatarambiŋte kiŋjeŋicte okacne fisi‐jareocmu.
44 Eme râsifâc‐jeŋic jaŋere mâreŋko juhapie no sifu wiac irec erâ qâmâtâc mi ejarepemu, erâ bâsuec‐jopahuc mi sipiric‐jopapemu; erâ jaŋehec ʒâʒâfic ekicne i mi hetâcnepemu, no Wofuŋ Anutu‐jeŋic hâcne.
45 No jaŋere erâ mamac ŋosafâc‐jeŋic jaŋehec ʒâʒâfic epo irec manasupemu. No Anutu‐jeŋic jupemurâ mamacfâc‐jeŋic qâpuc gurune gurune jaŋere maio Aigita mâreŋkonec jowac‐jopa wefupo. No Wofuŋ jukopac hâcne.”
