8 “Eme ŋoŋe sabata jara hombaŋ iŋucne 7 guru 7 irec sâc wosekupie jara 49 ezejec.
9 Eme jara 50 irec mosa 7 â ʒoaŋ gie bapa 10 ira ine qeŋ lama ʒuŋezi bakicne i qâsokapie fânâŋ‐ticne mâreŋ sâc rafârezejec. Ine kiwiric roro dameŋ ira hâcne qeŋ qapie fânâŋ‐ticnezi mâreŋ‐ŋeŋic sâcke‐fârezejec.
10 Ŋoŋe iŋuc ehuc jara 50 i furu munʒepieŋ, ehuc hae mâreŋ sâc irec ŋic ŋokac jaŋe wama faio rambaŋ juniŋte jazanʒepieŋ. Ehuc ŋoŋe fic hae‐ŋeŋic sâc me wiacfâc‐ŋeŋic jaŋerao risiehuc manapie ʒeri bubiaŋ sâkohec ezejec.
11 Jara 50 izi hâcne ʒeri bubiaŋ dameŋ‐ŋeŋic ezejec. Ŋoŋe dameŋ ira hesarac gie me wiac bâtirikicnezi fârine fuaekac i qa roro mi enʒepieŋ, me waiŋ bâtâcne emasaŋ mi ekicnao fârine fuame wâc ro nusec mi enʒepieŋ.
12 Dameŋ i bubiaŋ dameŋ, irec manapie tirine ezejec. Ehame mâreŋzi gume hesiwiŋ ecneocmu izi nânâ‐ŋeŋic ezejec.
13 “Ŋoŋe ʒeri bubiaŋ dameŋ ira ru sâc hae mâreŋ‐ŋeŋicko risie‐fârenʒepieŋ.
14 Ŋoŋe ŋic âgofâc‐ŋeŋic jaŋehec âbârâ gie bahuc nareŋ gareŋ sâcti qâtiric mi enʒepieŋ.
15 Ʒeri hombaŋ juwicnao fuŋkerâ jara wezimuc juwefumbiŋ irec sâc manasuhuc ŋic âgofâc‐ŋeŋic jaŋeraonec wiac furine banʒepieŋ, erâ jara wezimuc qa roro gie baniŋmu irec manasuhuc moneŋte erâ mâreŋ mutara‐ŋarenʒepieŋ.
16 Jara ʒoricne fome furine bafenʒepieŋ, me bembeŋne fome furine bawahanʒepieŋ. Jara wezimuc irec maŋnao he sara nâc eniŋmu irec manasuhuc mâreŋ qikiŋne‐ŋarenʒepieŋ hâcne.
17 Ŋoŋe nareŋ gareŋ sâcti qâtiric mi ehuc Anutu‐ŋeŋic araŋ bacnenʒepieŋ. No hâcne Wofuŋ Anutu‐ŋeŋic jukopac.
18 “Ŋoŋe irec hâcne dâŋsanaŋ‐nane bajuhuc mumutâc dâŋnane mana rereŋ enʒepieŋ. Iŋuc ehuc mâreŋko wama faio ŋec juc eniŋimu.
19 Ehame mâreŋ‐ŋeŋicko nânâ mâriri sâko fuame nâ gapec ehuc wama faio juniŋmu.
20 Ŋoŋe ʒiŋuc muniŋmu mecne: ‘Nâŋe jara namba 7 ira he sarac â qa roro mi ehuc wemo wiac moc nâ bac enaŋmu?’
21 Ŋoŋe iŋuc mupie ʒiŋuc ŋazapemu: No jara namba 6 ira jambuŋ‐ŋopape mâreŋ‐ŋeŋicko jara 3 irec sâc mâriri sâko fuarâ foocmu.
22 Irec jara 8 ira he sarac ehuc nânâ raŋɋane nânʒepieŋ, ehame jara 9 ira nânâ gie raŋɋanaonec jaha nâhuc juhapie ɋâricnezi fuazejec.
23 Ŋoŋe mâreŋ‐ŋeŋic i moneŋte erâ mi qikiŋne sanaŋkenʒepieŋ, ŋoŋe nohec juhuc ŋic furune â jabane sawa eŋgopieŋte mâreŋ i nore biŋe ekac hâcne.
24 Irec ŋoŋe mâreŋ ro rauc embiŋ i mâreŋ runezi mocwâc furine bazo mume mana uruecnenʒepieŋ.
25 “Âgo qomâge moczi hapetac juhuc mâreŋ‐ticne gâcne moneŋte erâ qikiŋneocmuo fisirâ âgo‐ticnezi mâreŋ qikiŋnewec i moneŋ râeme kitâcneme mocwâc bârisiecnezejec.
26 Me ŋic ere tuctofa moc mi juhuc mâreŋ bârisiecneocmuo, me e jahac juku moneŋ bâfuarâ mocwâc furine bazo muocmuo
27 ine ŋic moczi mâreŋ‐ticne furine barâ jara wezimuc bajuwec i manasuhuc moneŋ tofane sawa bârisiecnezejec, ehuc mâreŋ‐ticnao risiezejec.
28 Me mâreŋ i mocwâc e jahacne biŋe furine baocte moneŋ basarâ beheme ŋic furine bawec eki bajuhame ʒeri bubiaŋ jara hombaŋ sâko maickezejec. Eme hombaŋ dameŋ ira ine mâreŋ bajukac ŋic eki beheme runezi mocwâc fuarâ rauckezejec.
29 “Ŋic moc e hae sâko qânâsac‐ticnehec ira ficticne moc moneŋte erâ qikiŋneocmu mecne. Erâ jufehuc jara moc mi taraha fic izi mocwâc e jahacne biŋe eocte furine bazo murâ sâcne furine baocmu. E jara ŋondeŋ irec maŋnao iŋuc ezo mume manacnezo.
30 Me jara ŋondeŋ irec maŋnao runezi mocwâc furine bazo mi ecneme ine ŋic qanaŋ furine bawec e jahacne â ɋâricfâc‐ticne jaŋere biŋe erâ ŋefehuc juzejec. Ʒeri bubiaŋ jara hombaŋko ine fic i behepie runere biŋe mocwâc mi ezejec.
