31 Hae piticko fic sac tâmiric ŋerakac izi ine giegaŋte sâc jaha ekac, irec runezi mocwâc furine bahuc ŋec juc eniŋmu, â ʒeri bubiaŋ jara hombaŋ sâko ira behepie mocwâc runere biŋe ezejec.
32 Lewiŋic jaŋe hae sâko‐jeŋicko fic hae‐jeŋic moneŋte erâ qikiŋneeŋgopieŋ i ʒâhec dameŋ ira me ira mocwâc furine bahuc jaŋacne biŋe eocte mupie mana‐jarezo.
33 Me Lewiŋic moc e hae iŋucnao ficticne moneŋte erâ qikiŋnewec i mocwâc e jahacne biŋe eocte furine mi baocmu ine ʒeri bubiaŋ jara hombaŋko behepie mocwâc runere biŋe ezejec; Lewiŋic jaŋere hae sâkoo fic hae ŋerakac i Lewiŋic Israe ŋic jaŋere ŋondeŋko juraŋgopieŋ jaŋere biŋe hâcne.
34 Mâc giegaŋ‐jeŋic hae sâko orâŋkehuc forakac izi ine furi bapare biŋe mi ekac, i Lewiŋic jaŋere biŋe erâ fosanaŋkeocte mukicne.
35 “Âgo qomâ‐ŋeŋic moczi hapetac juhuc juju‐ticnere dope wiac sâcne mi bâfuaocmuo ine ŋoŋe bafickenʒepieŋ, ehame ŋic furune me jabane iŋucne ŋondeŋ‐ŋeŋicko juzejec.
36 Ŋoŋe moneŋ‐ŋeŋic tofane erao fokac i bafehuc mi jâoc ronʒepieŋ, aricne, ŋoŋe Anutu‐ŋeŋic araŋ bacnehuc juhapie âgo qomâ‐ŋeŋiczi ŋoŋehec juzejec.
37 Ŋoŋe moneŋ me nânâ râcneniŋmu irec furi bafehuc bârisie‐ŋareocte ʒoɋac mi ecnenʒepieŋ.
38 No Wofuŋ Anutu‐ŋeŋic, noni hâcne Kanaaŋ mâreŋ ŋarehuc Anutu‐ŋeŋic jupemurâ Aigita mâreŋkonec jowac‐ŋopa wefupo.
39 “Âgo qomâ‐ŋeŋic moczi hapetac erâ juhuc ŋoŋere kiŋaŋ qaqa erâ juzo mume mi manacnenʒepieŋ.
40 E ŋoŋehec ŋic jabane jaŋere sâc erâ juhuc moneŋ gie bazejec, e ŋoŋere kiŋaŋ qaqa gie iŋuc bahuc juhame ʒeri bubiaŋ jara hombaŋ sâko maickezejec.
41 Hombaŋ ira ine naru motecfâc‐ticne jaŋehec behec‐ŋoparâ wiacfâc‐ticne jaŋerao risiezejec, ehuc mamac ŋosafâc‐ticne jaŋere mâreŋ rauckezejec.
42 Jaŋe nore kiŋaŋŋicfâc, noni hâcne Aigita mâreŋkonec jowac‐jopa wefupo, jaŋe moneŋte erâ kiŋaŋ qaqa mi bacjopazo.
43 Ŋoŋe Anutu‐ŋeŋic araŋ bacnehuc ŋic iŋucne ŋicbomboŋ ejarehuc mi bâʒâic‐jopanʒepieŋ.
44 Ŋoŋe kiŋaŋ ŋic ŋokac rocjopazo murâ ine qâpuc ŋic gurune gurune rârec rârec juraŋgopieŋ jaŋeraonec furi bacjopanʒepieŋ.
45 Me ŋic jabane â wiacfâc‐jeŋic ŋondeŋ‐ŋeŋicko jueŋgopieŋ me mâreŋ‐ŋeŋicko fuambiŋ jaŋeraonec wâc furi bacjopazo murâ furi bacjopapie ŋoŋere biŋe enʒepieŋ.
46 Erâ juku hâmoc dameŋ‐ŋeŋic maickeme ŋic iŋucne jaŋe ŋokâfâc‐ŋeŋic jaŋerao râec‐jopazo murâ râec‐jopapie jaŋere kiŋaŋ qaqa erâ junʒepieŋ. Israe ŋic qomâfâc‐ŋeŋic jaŋe ine ŋicbomboŋ ejarehuc mi bâʒâic‐jopanʒepieŋ.
47 “Ŋic furune me jabane moc moneŋ mafa sâkoheczi ŋoŋehec juhame qomâ‐ŋeŋic moczi hapetac erâ ŋic jabane e jahacne me soctofa‐ticne moc ere kiŋaŋ qaqa erâ juocmuo
48 ine hahac ɋafâc‐ticne jaŋeraonec moczi furi‐ticne râezo murâ râeme rambaŋko juzejec.
49 Me wawa‐ticne me nafe‐ticne me soctofa‐ticne moczi furine bazo murâ bahuc rambaŋko râeme juzejec. Me e jahac moneŋ mafa sâkohec erâ sahac‐ticnere furi râehuc rambaŋko juzejec.
50 E jahacne â ŋic furi‐ticne râewec jahe kiŋaŋ gie fuŋkekicne jara irecnec fuŋkerâ wose rakupire ʒeri bubiaŋ hombaŋko tarazejec. Ehame dameŋ ŋondeŋ ira jara wezimuc foocmu, irec sâcko furi râezejec. Kiŋaŋ qaqa gie dameŋ‐ticnere manapire ine moneŋ gie bapa ŋic ere dameŋ iŋucne ezejec.
51 Jara‐ticne bocjaha foocmuo ine irec sâc manasuhuc furi rowec irecnec sahac‐ticnere furi rorâ râezejec.
52 Me jara‐ticne afecne sawa fome ʒeri bubiaŋ hombaŋ sâko maickeocmuo ine jara irec manasuhuc moneŋ afecne sawa bârisiecneme tarame rambaŋko juzejec.
53 E ŋic furine bawec erao jara sâc moneŋ gie bapa ŋic iŋucne juzejec, ehame bomboŋ‐ticnezi bâʒâickeocte mi manacnenʒepieŋ.
54 Me jaŋe furi‐ticne bahuc rambaŋko mi râeniŋmu ine ʒuhuckerâ juhame ʒeri bubiaŋ jara hombaŋ maickeme bomboŋ‐ticnezi beheme rambaŋko juzejec, e jahacne mecne â naru motecfâcne jaŋe mâmâc iŋuc ejarezejec.
