7 Ʒoaŋ ira tiri tutumaŋ moc ehuc gie moc mi banʒepieŋ.
8 Erâ Wofuŋ alatao bâzi rikecnehuc juhapie ʒoaŋ gie bapa 7 ira ine mocwâc tiri tutumaŋ ehuc gie moc mi banʒepieŋ.”
9 Wofuŋzi Mose kecʒiŋuc âzâcnewec:
10 “Go Israe ŋic ʒiŋuc jazazemec: Ŋoŋe mâreŋ ŋarepemu ira fisirâ nânâ nânâsu dameŋ maickeme nânâ gieonec fuŋkerâ rohuc taha baparao râenʒepieŋ.
11 Eme sabata hombaŋ ŋerâ irec faicnao Wofuŋte maio fenʒoŋkeme Wofuŋzi mana‐ŋareme biaŋkezejec.
12 Fenʒoŋkeocmu ʒoaŋ ira ŋoŋe lama ŋicne biaŋne moc Wofuŋ bâzi rikecnenʒepieŋ.
13 Ehuc taha bâzire biŋe wiac kecʒiŋuc ʒuhuckerâ Wofuŋ rikecnepie âsu biaŋ fuazejec: Poroŋ uucne wokemaŋhec bâsifuckekicne oto mocjahaonec teŋkonec jajahec â waiŋzi taha bâzi ine fifia râqâckonec nâfocne 4 irec sâc ʒuhuckenʒepieŋ.
14 Erâ ŋoŋe nânâ poroŋ me jacgoŋ hâcbuc me sâŋsâŋ bakicne i mi nânâ mâc juhapie ʒoaŋ i hâcne maickezejec, ŋoŋe qanaŋ Anutu‐ŋeŋic taha bacnenʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.
15 “Ŋoŋe sabata hombaŋ tarame nânâ nânâsu dameŋko taha baparao nânâ wiac râepie fenʒoŋkeocmu, ʒoaŋ gie bapa irecnec fuŋkerâ jufekupie sabata hombaŋ 7 tarazejec.
16 I tarame ʒoaŋ gie bapa 50 eha gie ɋârionec padizi taha bâzi Wofuŋ râcnenʒepieŋ.
17 Ehuc oto mocjahaonec teŋkonec jajahec irec sâc poroŋ uucne rorâ goreŋhec bâsifuckerâ poroŋ jajahec rikepie tarame ficŋeŋickonec taha baparao bafisipie eki fenʒoŋkezejec. Poroŋ izi hâcne Wofuŋtao nânâ bâbâsu tinac ekac.
18 Erâ lama biaŋne 7, jara‐jeŋic wâŋ ekicne, erâ bulimakao motecnezi ŋicne â lama ŋicne jajahec jaŋe poroŋhec tahare biŋe râec‐jopanʒepieŋ. Jaŋe hâcne Wofuŋtao qowi bâzire biŋe enʒepieŋ. Ehame taha bâzi â waiŋzi taha bâzi i ʒuhuckerâ rikepie Wofuŋte maio âsu biaŋ fuazejec.
19 Ehame ŋoŋe sâqocne tâtâmire tahare biŋe noniŋ ŋicne moc, me wama bâzire biŋe lama ŋicne jajahec jara‐jekic wâŋ ekicne, iŋucne râec‐jopanʒepieŋ.
20 Eme taha bapa eki nânâ bâbâsu poroŋ â lama mâmâc jaha Wofuŋte maio fenʒoŋkezejec. Jaŋe Wofuŋte maio bâtiric‐jopakicnezi taha bapare biŋe enʒepieŋ.
21 Ŋoŋe ʒoaŋ ira hâcne ŋic ʒiŋuc jazanʒepieŋ: Ŋoŋe tiri tutumaŋ ehuc gie moc mi banʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.
22 “Ŋoŋe padi wiac qa roro ehuc, gie qaŋeŋnao doma rakac i mi rofârenʒepieŋ â kisecne doma raocmu i wâc mi unucke‐fârenʒepieŋ. Ŋoŋe wiac i ŋic hapetac â jabane jaŋere biŋe behepie fozejec. No Wofuŋ ŋoŋere Anutu hâcne.”
23 Wofuŋzi Mose kecʒiŋuc âzâcnewec:
24 “Go Israe ŋic ʒiŋuc jazazemec: Mosa 7 irec ʒoaŋ gie bapa wâŋ ira hombaŋ moc ŋenʒepieŋ, erâ sawaŋ qaqac ehuc qeŋ qanʒepieŋ, ehuc tirificko tumaŋnenʒepieŋ.
25 Ŋoŋe gie bapao gie baeŋgopieŋ irec sâc hombaŋ ira mi banʒepieŋ, ehuc Wofuŋ taha bâzi rikecnenʒepieŋ.”
26 Eme Wofuŋzi Mose kecʒiŋuc âzâcnewec:
27 “Mosa 7 irec ʒoaŋ gie bapa 10 izi kiwiric roro dameŋ ezejec. Ŋoŋe ira hâcne tirificko tumaŋnenʒepieŋ, erâ sowa juhuc Wofuŋ tiwâ bâzi rikecnenʒepieŋ.
28 Ŋoŋe ʒoaŋ ira gie moc mi bajâmbâŋkenʒepieŋ, ʒoaŋ i kiwiric roro dameŋ hâcne. Taha bapa jaŋe ʒoaŋ ira hâcne Wofuŋ Anutu‐ŋeŋic ere maio kiwiric‐ŋeŋic ronʒepieŋ.
29 Eme ŋic moc e ʒoaŋ ira sowa mi juocmu e ŋic âgofâc‐ticne jaŋere ŋondeŋkonec bâsirowezo.
30 Me moc e ʒoaŋ ira gie baocmu e ŋic âgofâc‐ticne jaŋere ŋondeŋkonec bâsirowepemu.
31 Ŋoŋe ʒoaŋ ira gie moc mi bajâmbâŋkenʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.
32 Hombaŋ izi sabata hombaŋ fârine eha sowa junʒepieŋ. Ŋoŋe sabata‐ŋeŋic ʒoaŋ gie bapa 9 ira hae owâeme fuŋkerâ ŋehapie hae furerâ owâeme ŋetaranʒepieŋ.”
33 Eme Wofuŋzi Mose kecʒiŋuc âzâcnewec:
34 “Go Israe ŋic ʒiŋuc jazazemec: Mosa 7 irec ʒoaŋ gie bapa 15 ira fuŋkerâ Wofuŋte rehac boze hombaŋ ŋehuc juhapie ʒoaŋ gie bapa 7 tarazejec.
35 Ʒoaŋ bâbâni ira tirificko tutumaŋ ehuc gie moc mi banʒepieŋ.
36 Ŋoŋe ʒoaŋne ʒoaŋne Wofuŋ tiwâ bâzi rikecnehuc juhapie ʒoaŋ 7 tarazejec. Ʒoaŋ gie bapa 8 ira ine tirificko mocwâc tumaŋnehuc Wofuŋ tiwâ bâzi rikecnenʒepieŋ wâc; i hombâŋ fârine jaha, irec gie moc mi bajâmbâŋkenʒepieŋ.
