4 Wofuŋte hombaŋ, tiri tutumaŋ hâcne kecʒiŋuc fokac i dameŋ mukicne ira musokahuc ŋenʒepieŋ:
5 Mosa wâŋ irec ʒoaŋ gie bapa 14 owâcne Wofuŋte aakic hombaŋ maickeocmu.
6 Eme mosa irec ʒoaŋ gie bapa 15 ira ine Wofuŋte manasuhuc poroŋ goreŋ tâmiric nânâ irec hombaŋ ŋenʒepieŋ, ŋoŋe dameŋ ira fuŋkerâ nânâ poroŋ goreŋ tâmiric nâhuc juhapie ʒoaŋ gie bapa 7 tarazejec.
7 Ʒoaŋ ira tiri tutumaŋ moc ehuc gie moc mi banʒepieŋ.
8 Erâ Wofuŋ alatao bâzi rikecnehuc juhapie ʒoaŋ gie bapa 7 ira ine mocwâc tiri tutumaŋ ehuc gie moc mi banʒepieŋ.”
9 Wofuŋzi Mose kecʒiŋuc âzâcnewec:
10 “Go Israe ŋic ʒiŋuc jazazemec: Ŋoŋe mâreŋ ŋarepemu ira fisirâ nânâ nânâsu dameŋ maickeme nânâ gieonec fuŋkerâ rohuc taha baparao râenʒepieŋ.
11 Eme sabata hombaŋ ŋerâ irec faicnao Wofuŋte maio fenʒoŋkeme Wofuŋzi mana‐ŋareme biaŋkezejec.
12 Fenʒoŋkeocmu ʒoaŋ ira ŋoŋe lama ŋicne biaŋne moc Wofuŋ bâzi rikecnenʒepieŋ.
13 Ehuc taha bâzire biŋe wiac kecʒiŋuc ʒuhuckerâ Wofuŋ rikecnepie âsu biaŋ fuazejec: Poroŋ uucne wokemaŋhec bâsifuckekicne oto mocjahaonec teŋkonec jajahec â waiŋzi taha bâzi ine fifia râqâckonec nâfocne 4 irec sâc ʒuhuckenʒepieŋ.
14 Erâ ŋoŋe nânâ poroŋ me jacgoŋ hâcbuc me sâŋsâŋ bakicne i mi nânâ mâc juhapie ʒoaŋ i hâcne maickezejec, ŋoŋe qanaŋ Anutu‐ŋeŋic taha bacnenʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.
15 “Ŋoŋe sabata hombaŋ tarame nânâ nânâsu dameŋko taha baparao nânâ wiac râepie fenʒoŋkeocmu, ʒoaŋ gie bapa irecnec fuŋkerâ jufekupie sabata hombaŋ 7 tarazejec.
16 I tarame ʒoaŋ gie bapa 50 eha gie ɋârionec padizi taha bâzi Wofuŋ râcnenʒepieŋ.
17 Ehuc oto mocjahaonec teŋkonec jajahec irec sâc poroŋ uucne rorâ goreŋhec bâsifuckerâ poroŋ jajahec rikepie tarame ficŋeŋickonec taha baparao bafisipie eki fenʒoŋkezejec. Poroŋ izi hâcne Wofuŋtao nânâ bâbâsu tinac ekac.
18 Erâ lama biaŋne 7, jara‐jeŋic wâŋ ekicne, erâ bulimakao motecnezi ŋicne â lama ŋicne jajahec jaŋe poroŋhec tahare biŋe râec‐jopanʒepieŋ. Jaŋe hâcne Wofuŋtao qowi bâzire biŋe enʒepieŋ. Ehame taha bâzi â waiŋzi taha bâzi i ʒuhuckerâ rikepie Wofuŋte maio âsu biaŋ fuazejec.
