19 Ehame ŋoŋe sâqocne tâtâmire tahare biŋe noniŋ ŋicne moc, me wama bâzire biŋe lama ŋicne jajahec jara‐jekic wâŋ ekicne, iŋucne râec‐jopanʒepieŋ.
20 Eme taha bapa eki nânâ bâbâsu poroŋ â lama mâmâc jaha Wofuŋte maio fenʒoŋkezejec. Jaŋe Wofuŋte maio bâtiric‐jopakicnezi taha bapare biŋe enʒepieŋ.
21 Ŋoŋe ʒoaŋ ira hâcne ŋic ʒiŋuc jazanʒepieŋ: Ŋoŋe tiri tutumaŋ ehuc gie moc mi banʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.
22 “Ŋoŋe padi wiac qa roro ehuc, gie qaŋeŋnao doma rakac i mi rofârenʒepieŋ â kisecne doma raocmu i wâc mi unucke‐fârenʒepieŋ. Ŋoŋe wiac i ŋic hapetac â jabane jaŋere biŋe behepie fozejec. No Wofuŋ ŋoŋere Anutu hâcne.”
23 Wofuŋzi Mose kecʒiŋuc âzâcnewec:
24 “Go Israe ŋic ʒiŋuc jazazemec: Mosa 7 irec ʒoaŋ gie bapa wâŋ ira hombaŋ moc ŋenʒepieŋ, erâ sawaŋ qaqac ehuc qeŋ qanʒepieŋ, ehuc tirificko tumaŋnenʒepieŋ.
25 Ŋoŋe gie bapao gie baeŋgopieŋ irec sâc hombaŋ ira mi banʒepieŋ, ehuc Wofuŋ taha bâzi rikecnenʒepieŋ.”
26 Eme Wofuŋzi Mose kecʒiŋuc âzâcnewec:
27 “Mosa 7 irec ʒoaŋ gie bapa 10 izi kiwiric roro dameŋ ezejec. Ŋoŋe ira hâcne tirificko tumaŋnenʒepieŋ, erâ sowa juhuc Wofuŋ tiwâ bâzi rikecnenʒepieŋ.
28 Ŋoŋe ʒoaŋ ira gie moc mi bajâmbâŋkenʒepieŋ, ʒoaŋ i kiwiric roro dameŋ hâcne. Taha bapa jaŋe ʒoaŋ ira hâcne Wofuŋ Anutu‐ŋeŋic ere maio kiwiric‐ŋeŋic ronʒepieŋ.
29 Eme ŋic moc e ʒoaŋ ira sowa mi juocmu e ŋic âgofâc‐ticne jaŋere ŋondeŋkonec bâsirowezo.
30 Me moc e ʒoaŋ ira gie baocmu e ŋic âgofâc‐ticne jaŋere ŋondeŋkonec bâsirowepemu.
31 Ŋoŋe ʒoaŋ ira gie moc mi bajâmbâŋkenʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.
32 Hombaŋ izi sabata hombaŋ fârine eha sowa junʒepieŋ. Ŋoŋe sabata‐ŋeŋic ʒoaŋ gie bapa 9 ira hae owâeme fuŋkerâ ŋehapie hae furerâ owâeme ŋetaranʒepieŋ.”
33 Eme Wofuŋzi Mose kecʒiŋuc âzâcnewec:
34 “Go Israe ŋic ʒiŋuc jazazemec: Mosa 7 irec ʒoaŋ gie bapa 15 ira fuŋkerâ Wofuŋte rehac boze hombaŋ ŋehuc juhapie ʒoaŋ gie bapa 7 tarazejec.
35 Ʒoaŋ bâbâni ira tirificko tutumaŋ ehuc gie moc mi banʒepieŋ.
36 Ŋoŋe ʒoaŋne ʒoaŋne Wofuŋ tiwâ bâzi rikecnehuc juhapie ʒoaŋ 7 tarazejec. Ʒoaŋ gie bapa 8 ira ine tirificko mocwâc tumaŋnehuc Wofuŋ tiwâ bâzi rikecnenʒepieŋ wâc; i hombâŋ fârine jaha, irec gie moc mi bajâmbâŋkenʒepieŋ.
37 “Ŋoŋe hombaŋ biri ʒi mucjopakicne ira hâcne Wofuŋ taha bâzi kecʒiŋuc rikecneniŋte mupie tirificko tutumaŋ fuazejec. Qowi bâzi, taha bâzi fuŋne fuŋne erâ waiŋzi taha bâzi; i dameŋ bakicnao rikenʒepieŋ.
38 Ŋifec ine Wofuŋte sabata hombaŋ ŋenʒepieŋ wâc, ehuc mumupaŋ taha, me buafec taha me taha wiac gâcne i Wofuŋ râcnenʒepieŋ jaha.
39 “Ŋoŋe gieonec nânâ wiac rofârepie tarame mosa 7 irec ʒoaŋ gie bapa 15 ira Wofuŋte hombaŋ sâko fuŋkerâ ŋehuc juhapie ʒoaŋ 7 tarazejec. Ʒoaŋ bâbâni izi hombaŋ fârine eha gie moc mi banʒepieŋ, â ʒoaŋ namba 8 izi wâc hombaŋ fârine jaha ezejec.
40 Ʒoaŋ wâŋ ira jâchândâŋ biaŋne erâ hâmu rehacne â jâc rehac sâkohec irec tieŋne â kakikic jâc irec tieŋne jaha bazurâ fenʒoŋkehuc Wofuŋ Anutu‐ŋeŋic ere maio ʒeri ehuc juhapie ʒoaŋ gie bapa 7 tarazejec.
41 Ŋoŋe hombaŋ i Wofuŋte manasuhuc jara sâc ŋehuc juhapie ʒoaŋ 7 tarazejec. Ŋoŋe hombaŋ i mosa 7 ira ŋenʒepieŋ. Dâŋ izi ŋic gaŋne gaŋne fuarâ jufeniŋmu ŋoŋere dâŋsanaŋ erâ forahuc juzejec.
42 Israe kikefuŋ sasawa ŋoŋe dameŋ ira rehac bozeo ŋehuc juhapie ʒoaŋ 7 tarazejec.
43 Iŋuc epie Wofuŋ noni hâcne Israe ŋic ŋoŋe Aigita mâreŋkonec jowac‐ŋopa waharâ rehac bozeo ŋec juc eniŋte muŋarepo, ɋâricfâc‐ŋeŋic jaŋe iŋuc mana taranʒepieŋ. No Wofuŋ Anutu‐ŋeŋic hâcne.”
