2 Â soctofafâc‐ŋeŋic, neŋgoc mamac me naru motec me hahac ɋafâc‐ŋeŋic jaŋe hâmopie ine ba bâuac sâcne ejareniŋmu.
3 Erâ seŋ qofâc‐ŋeŋic ʒeŋoŋne ŋic tâmiriczi maŋfuŋ‐ŋeŋicko juŋgopieŋ jaŋe hâmopie wâc sâcne ba bâuac ejareniŋmu.
4 Ŋoŋe mamac‐ŋeŋicte soctofafâc jaŋere ŋondeŋko juhuc ŋokac moc ŋichec erao sâqorerâ wâwânâŋhec mi enʒepieŋ.
5 Ŋoŋe qizec susuc‐ŋeŋic rohuc utu pârâc mi enʒepieŋ, erâ mecʒâwâ‐ŋeŋic tofane mi bâtâcnenʒepieŋ.
6 Ŋoŋe Anuture maio tirine juhuc ʒâŋe‐ticne mi sipirickenʒepieŋ. Ŋoŋe Wofuŋte taha bâzi, Anuture nânâ hâcne, i rikeeŋgopieŋte tirine erâ junʒepieŋ.
7 Taha bapa jaŋe sasec ŋokac me ŋokac wâwânâŋhec moc mi rocjopanʒepieŋ, erâ ŋokac ʒuhuc bâtâc ekicne wâc mi rocjopanʒepieŋ; taha bapa jaŋe Anutu nore maio ŋic tirine juŋgopieŋte iŋuc mi enʒepieŋ.
8 Jaŋe Anutu no taha bâzi rike‐nareeŋgopieŋte jaŋere manatec tirine juŋgopieŋ ezejec; Wofuŋ no bâtiric‐ŋopahuc tiri jukopacte jaŋere manatec tirine jaha juŋgopieŋ ezejec.
9 Ehame taha bapa mocte otâzi sasec gie barâ juju‐ticne sipirickehuc mamac‐ticnere ʒâŋe biŋe bawahaocmu; irec e ʒocko rikenʒepieŋ.
10 “Taha bapa micne wokemaŋ ruacnehuc gie ŋaqi tirine rojuocte mufiriekicne e busâqocte erâ qizec susuc‐ticne beheme mi ʒorazejec, â ŋaqi wiac‐ticne mi bâsuckezejec.
11 Ehuc neŋgoc mamac jahec‐ticne me ŋic mocte qâŋɋâŋ fokacko raʒirâ wâwânâŋhec mi ezejec.
12 E Anuture tiri wokemaŋ ruacnekicnere furufickonec mi wahazejec, â Anutu‐ticnere furufic i wâwânâŋ mi ecnezejec. No hâcne Wofuŋ jukopac.
13 E ŋokac bazo murâ ine ŋokac ʒeŋoŋ rozejec.
14 E hozec me ʒuhuc bâtâc ekicne me ŋokac wâwânâŋhec me sasec ŋokac, ŋokac iŋucne moc mi rozejec, aricne, e ŋicfâc‐ticne jaŋeraonec ŋokac ʒeŋoŋ moc rozejec hâcne.
15 E iŋuc ehuc ŋicfâc‐ticne jaŋere ŋondeŋkonec naru motecfâc‐ticne mi bawahac‐jopazejec. Wofuŋ noni hâcne e bâtirikopac.”
16 Wofuŋzi Mose ʒiŋuc âzâcnewec:
17 “Go Aroŋ kecʒiŋuc âzâcnezemec: Ɋâricfâcge gaŋne gaŋne jufeniŋmu jaŋeraonec moczi sahac fâsâc mi juocmu e Wofuŋ taha bâzi rikecneocte mi maickezejec.
18 Ŋic kecʒiŋucne jaŋe hâcne mi maickenʒepieŋ: Tiŋtuŋ me ʒeke puriŋ, me ʒâŋe mai‐jeŋic sâqorekicne, me tuturuŋ‐jeŋic tarakicne,
19 me mekike‐jeŋic herickekicne,
20 me râpe kumbeŋ‐jeŋichec, me ŋic bembeŋne, me ʒâŋe‐jeŋic hâpokicne, me wic piic piic â korehec, me biŋjeŋic bakicne.
21 Taha bapa Aroŋ ere ɋâricfâc jaŋeraonec moc sahac fâsâc mi juocmu e Wofuŋ taha bâzi rikecneocte mi maickezejec. E sahac fâsâc mi jukacte iŋuc hâcne ezejec.
22 E taha bâzi bâtirikicne â tiri jâmbâŋ Wofuŋte biŋe qakicne i nâzo murâ sâcne nâocmu,
23 mâc sahac fâsâc mi juhuc tirific‐nane bawahazacte ine ââketâc me alata mi maickezejec; Wofuŋ noni hâcne bâtirikopac.”
