10 “Ŋic moc e âgo‐ticnere ŋonâŋhec sau gie banicmuo ine ŋic mecne ŋokac mecne mâmâc qâhâmoc‐jofazo.
11 Ŋic moc e neŋgococ‐ticne bâsâqorehuc mamac‐ticne mimi qaqa ecneocmu, irec e mecne â neŋgococ‐ticne mâmâc qâhâmoc‐jofazo, jahe okacne fua‐jactezejec.
12 Me ŋic moc e joŋao‐ticne bâsâqoreocmuo ine jahe mâmâc jaha qâhâmoc‐jofazo, jahe wâwânâŋhec epicte okacne fua‐jactezejec.
13 Me ŋic moc e ŋokac jaŋehec foeŋgopieŋ irec sâc ŋic mochec foocmu ine jahe wiac mamakâcne epicte qâhâmoc‐jofazo, jahe okacne fisi‐jactezejec.
14 Me ŋic moc e ŋokac moc â neŋgoc‐ticne rocjofame wiac hehesicne eocmu, irec jaŋe mâmâc ʒoczi ʒacjopame ŋondeŋ‐ŋeŋicko hehesiczi omaezejec.
15 Me ŋic moczi qowi mochec foocmu ine ŋic mecne qowi mecne mâmâc qâhâmoc‐jofazo.
16 Me ŋokac moczi qowi i me i moc maickerâ ehec foocmuo ine ŋokac mecne qowi mecne mâmâc qâhâmoc‐jofazo, jahe okacne fua‐jactezejec.
17 “Ŋic moc e seŋoc‐ticne, mamac‐ticnere otâ me neŋgoc‐ticnere otâ hâcne, ehec mamanac ehuc sasec gie bapire wiac miminehec eocmu, irec jahe gurufâc‐jekic jaŋere ŋondeŋkonec bâsirowec‐jofazo. Ŋic e seŋticne bâsâqorewecte kiŋticnere okacne fuacnezejec.
18 Me ŋic moc e ŋokac moc mosa huc dameŋ‐ticne maickeha bâsâqoreocmuo ine jahe mâmâc jaha ŋokac soc roro‐ticnere fuŋne bajaŋgeŋkenicmu, irec jahe gurufâc‐jekic jaŋere ŋondeŋkonec bâsirowec‐jofazo.
19 Go neŋgocgere qo me mamacgere seŋ mi bâsâqorec‐jofazemec. Go iŋuc etec soctofa jahecge bâsâqorec‐jofakic eocmu. Irec kiŋŋeŋicte okacne fua‐ŋareocmu.
20 Me ŋic moc e woki‐ticne bâsâqoreocmuo ine wawa‐ticne mimi qaqa ecneocmu, irec ŋic e â woki‐ticne jahe sâqocne‐jekicte okacne hufiŋne erâ juku hâmozepirec.
21 Me ŋic moc e qozi‐ticne bâsâqoreme wiac gâgâpâcne eocmu, ehuc hahac‐ticne mimi qaqa ecneocmu; irec jahe hufiŋne erâ juzepirec.
22 “Ŋoŋe irec hâcne dâŋsanaŋ â mumutâc dâŋnane sasawa i bajuhuc mana rereŋ efârenʒepieŋ, ehame mâreŋ qikiŋne‐ŋarepe ŋec juc eniŋmu izi râsi mi eŋarezejec.
23 Ŋoŋe ŋic gurune gurune mai‐ŋeŋicko jâpe bâsuec ejarekopac jaŋere hata mi âtenʒepieŋ, jaŋe hâcne wiac i sasawa efârepie honec‐joparâ mamakâcnuwec.
