SAN JUAN 8:1-16 in Tzotzil

¹ Ti ho'ontutique xchi'uc ti Jesuse nibatutic ti vits Olivatic sbi.

² Hech yu'un ti sob ic'luman ti yoc'omal nisututic tal xchi'uc ti Jesuse, ni'ochtutic ti yut templo te ti Jerusalén yan vuelta. Ep crixchanoetic italic ti stojol ti Jesuse. Hech yu'un laj snacan sba ti Jesuse, te lic chanubtasvanuc.

³ Italic fariseoetic xchi'uc ti much'utic chchanubtasvanic ti smantal ti Diose ti scuyoj sbaique. Laj yiq'uic tal jun ants. Yac'oj sba chmulivaj xchi'uc yan vinic istaic. C'ot yaq'uic ti stojol ti Jesuse te ti o'lol ti crixchanoetique.

⁴ Hech laj yalbeic ti Jesuse: ―Maestro, yac'oj sba chmulivaj xchi'uc yan vinic ijta avi ants li'to.

⁵ Ti Moisese hech laj spasuntutic ti mantal ti ac'o ac'batuc ton ti much'u hech tspase. ¿C'usi chaval ho'oti? ―xchiic.

⁶ Yu'un ti hech laj yalique yu'un tal spasbeic proval yo'nton. Sc'an tsa'beic smul ti Jesuse. Ti Jesuse laj snijan sba, laj sts'iba lum ti sbic'tal sc'ob.

⁷ Yu'un mu xlaj yo'ntonic tsjaq'uic, toj lic nacluc ti Jesuse. Hech laj yalbe ya'yic: ―Ho'oxuc ti much'u mu'yuc smule ja' jbael ac'o yac'be ton ti antse ―xchi.

⁸ Laj xcha'nijan sba yan vuelta ti Jesuse, laj xcha'ts'iba lum yan vuelta.

⁹ C'alal laj ya'yic ti totiletique ti hech laj yal ti Jesuse, ep ilo'laj yo'ntonic yu'un ti smulique. Jujuntic iloq'uic batel. Ja' jbael iloq'uic batel ti más moletique. Ja' patil iloq'uic batel ti bu unenic toe. Stuc no'ox icom ti Jesuse xchi'uc ti antse te ti o'lol ti crixchanoetique.

¹⁰ Toj lic cha'nacluc yan vuelta ti Jesuse. Yu'un mu xa teuc ti much'u laj yiq'uic tal ti antse, ja' no'ox te oy ti antse, hech yu'un ti Jesuse hech laj yalbe: ―Me'e, ibat xa ti much'utic laj stabot amule. Mu'yuc much'u laj yac'bot ton yu'un ti amule ―xchi.

¹¹ Hech itac'av ti antse: ―Mu'yuc, tote ―xchi. Ti Jesuse hech laj yalbe: ―Hechun uc, mu xacac'bot castigo yu'un amul uc. Batan, mu me xasa' yan amul ―xut batel.

¹² Yan vuelta lic chanubtasvanuc ti Jesuse. Hech laj yalbe ya'yic: ―Ho'oni luzun avu'unic, ho'oxuc ti mozoimbiloxuc yu'un ti mulile li' ti balumile. Ti much'u chists'acliune ja' chcom yu'un ti mulile, ja' tspasilan ti c'usi leque yu'un ho'on ti jtojobtas batel hech chcuxi sbatel osil ―xchi.

¹³ Hech i'albat yu'un ti fariseoetique: ―Ho'oti atuc no'ox chachol ac'opilal. Mu'yuc rextico avu'un. Hech yu'un mu stac' ti jch'untutic ac'op ―xchiic.

¹⁴ Hech itac'av ti Jesuse: ―Manchuc mi chach'unic ti jtuc no'ox ti jchol jc'opilale, melel ti c'usi chcale. Jna'oj ti bu niloc' talele, jna'oj ti bu chibate. Ho'oxuque mu xana'ic ti bu niloc' talele, mu xana'ic ti bu chibate.

¹⁵ Ti ho'oxuque ti ora chach'unic ti oy smul yan. Muc unuc chanopic lec. Ho'oni mu jnopbe smul yan.

¹⁶ Mi oy c'usi ti jnope, lec ti jnop. Mu jtucuc no'ox ti jnop. Co'ol ti jnop xchi'uc ti Jtote, ja' ti laj stacun talele.

¹ Li Jesuse ibat ta vits Olivatic. Jchiꞌucutic batel, joꞌoncutic li yajchanbalajeltacuncutique.

² Ta sob ta yocꞌomal lijsutcutic talel schiꞌuc li Jesuse, te lijbatcutic nojtoc li ta mucꞌta chꞌulna li ta Jerusalene. Ep jchiꞌiltac italic ta stojol Jesús. Ichoti li Jesuse, lic chanubtasvanuc.

³ Te italic eꞌuc jayvoꞌ li buchꞌutic spꞌisoj sbaic ta jchanubtasvanej ta smantaltac li Diose schiꞌuc jayvoꞌ li jfariseoetique. Te yicꞌojic talel jun ants. Li antse yacal ta mulivajel istaic. Cꞌot yaqꞌuic ta stojol Jesús ta oꞌlol crixchanoetic.

⁴ Jech laj yalbeic li Jesuse: ―Jchanubtasvanej, li ants liꞌi yacal ta mulivajel ijtacutic.

⁵ Li Moisés li iyal scꞌop Dios ta voꞌonee yalojbutic mantal ti acꞌo acꞌbatuc ton li buchꞌu jech ta spase. ¿Cꞌusi chanop eꞌuc li joꞌote? ―xutic.

⁶ Ti jech laj yalbeic li Jesuse, yuꞌun tsqꞌuelbeic yoꞌon yuꞌun chac saꞌbeic smul. Li Jesuse la snijan sba, la stsꞌiba balumil ta sbicꞌtal scꞌob.

⁷ Ti mu xlaj yoꞌonic ta sjaqꞌuele, jech la stuqꞌuibtas sba li Jesuse, jech laj yal: ―Mi oy buchꞌu junucal ti muꞌyuc amulique, jaꞌ baꞌi acꞌo yacꞌbe ton li antse ―xut.

⁸ La schaꞌnijan sba nojtoc li Jesuse, la schaꞌtsꞌiba nojtoc li balumile.

⁹ Cꞌalal iyaꞌiic ti jech laj yal Jesús li jꞌabteletique, icꞌopoj yoꞌonic ta scoj li smulique. Ta jujuntal iloqꞌuic batel. Jaꞌ baꞌi iloqꞌuic batel li buchꞌutic más molic xae. Jaꞌ xa noꞌox te icom li Jesús schiꞌuc li ants li te ta oꞌlol crixchanoetique.

¹⁰ Li Jesuse la schaꞌtuqꞌuibtas sba, iyil ti muc xa bu te oyic li buchꞌutic laj yiqꞌuic talel li antse, jaꞌ xa noꞌox stuc te oy li antse. Li Jesuse jech laj yalbe li antse: ―Li buchꞌutic laj yalic amule ibatic xa. Muc buchꞌu laj yacꞌbot ton ta scoj la amule ―xut.

¹¹ Itacꞌav li antse: ―Muꞌyuc, tata ―xi. Li Jesuse jech laj yalbe: ―Jaꞌ jechun eꞌuc, muc bu chacacꞌbe avichꞌ vocol ta scoj la amule. Batan, mu xa me xasaꞌ amul ―xꞌutat batel li antse.

¹² Li Jesuse ichanubtasvan nojtoc, jech laj yal: ―Li joꞌone coꞌol schiꞌuc xojobal cꞌocꞌun yaꞌel ta atojolic, joꞌoxuc ti oyoxuc ta icꞌal acꞌubal yaꞌel ta scoj li mulile. Li buchꞌutic chiyichꞌic ta muqꞌue ta xictaic spasel li mulile. Jaꞌ xa ta spasic li cꞌustic leque yuꞌun joꞌon ta jcoltaic, jech ta xcuxiic o sbatel osil ―xi.

¹³ Li Jesuse jech iꞌalbat yuꞌun li jfariseoetique: ―Li joꞌote atuc noꞌox chaval acꞌoplal. Muꞌyuc avajtextico jech mu jchꞌuncutic li cꞌusi chavale ―xutic.

¹⁴ Itacꞌav li Jesuse: ―Acꞌo mi chavalic ti jtuc noꞌox ta xcal jcꞌoplale, pero jaꞌ melel li cꞌusi chcale. Yuꞌun jnaꞌoj ti bu liquemun talele, jnaꞌoj ti bu chibate. Li joꞌoxuque mu xanaꞌic ti bu liquemun talele, jech mu xanaꞌic bu chibat nojtoc.

¹⁵ Li joꞌoxuque chanopic ti crixchanoun noꞌoxe jech chasaꞌbecun jmul. Li joꞌone muc buchꞌu ta jsaꞌbe smul.

¹⁶ Mi oy buchꞌu ta xcalbe ti oy smule, yuꞌun xa onoꞌox oy smul. Yuꞌun mu jtucuc noꞌox ta jnop ti oy smule; jaꞌ coꞌol ta xcalcutic jchiꞌuc li Jtote, jaꞌ ti listac talele.

¹ Ti Jesuse ibat ta vits Olivos.

² Cꞌalal isacub ta yocꞌlomale, isut batel ta templo. Jaꞌ o tey lic stsob sbaic talel ti cristianoetic ta stojole. Tey ichoti lic chanubtasvanuc.

³ Ti jchanubtasvanejetic yuꞌun ti mantale schiꞌuc ti jfariseoetique tey yicꞌojic talel jun ants ti yacal ta xmulivaj laj staique. Tey laj svaꞌanic ta oꞌlol.

⁴ Jech laj yalbeic ti Jesuse: ―Jchanubtasvanej, ti ants liꞌe yacal ta xmulivaj laj staic.

⁵ Ti buchꞌu jech ants jech chac cꞌu chaꞌal liꞌe, ta xalbotic ta smantal ti Moisese ti acꞌo yichꞌ milel ta tone. Ti voꞌote, ¿cꞌusi ta xaval? ―xutic ti Jesuse.

⁶ Ti jech laj yalic taje, yuꞌun ta slajeltsabe yoꞌnton yoꞌ jech ta stabeic smul ti Jesuse. Ti Jesuse cuji. Lic stsꞌiba ti banomil ta sniꞌ scꞌobe.

⁷ Ti jech tey xvulajetic ta sjaqꞌuele, jech ti Jesuse tey ivaꞌi. Jech laj yal: ―Buchꞌuuc noꞌox junucal avuꞌunic ti mu snaꞌ saꞌ smule, jaꞌ acꞌo syales baꞌyel ti ton ta stojol ti antse ―xi ti Jesuse.

⁸ Jech xtoc lic chaꞌcujiuc ta stsꞌibael ti banomile.

⁹ Cꞌalal jech laj yaꞌiic ti stuquique, lic yaꞌiic ta yoꞌntonic ti oy smulique. Jech o xal un, ta jujun tal iloqꞌic batel. Jaꞌ baꞌyel iloqꞌuic batel ti moletique. Cꞌalal jech loqꞌuemic xa batel scotolique, stuc xa icomtsanatic ti antse schiꞌuc ti Jesuse.

¹⁰ Ti Jesuse tey ivaꞌi. Laj yil ti muꞌyuc xa buchꞌu tey oye, ti jaꞌ xa noꞌox stuc ti antse. Jech laj yalbe ti antse: ―Ants, ¿bu ibat ti buchꞌutic ta saꞌ amule? ¿Mi mu junuc buchꞌu laj yacꞌ atoj ti amule? ―xi ti Jesuse.

¹¹ Ti antse jech itacꞌav: ―Muꞌyuc chquil, Cajval ―xi. Ti Jesuse jech laj yal: ―Mi jaꞌuc ti vuꞌun ta xcacꞌ atoj ti amul eque. Avi liꞌe batan. Mu xa me xasaꞌ amul yan velta ―xi ti Jesuse.

¹² Ti Jesuse jech icꞌopoj yan velta ta stojol ti cristianoetique: ―Vuꞌun luzun yuꞌun ti cristianoetique. Ti buchꞌu ta xistsꞌaclie, oy luz yuꞌun ti jaꞌ ta xꞌacꞌbat ti scuxlejale. Mi jaꞌuc ta xanav ta icꞌal osil ―xi ti Jesuse.

¹³ Ti jfariseoetique jech laj yalic: ―Ti voꞌote jaꞌ noꞌox ta xavalbe aba acꞌoplal atuc. Ti jech ta xaval taje, muꞌyuc cꞌusi bal o ―xutic.

¹⁴ Ti Jesuse jech itacꞌav: ―Ti ta xcalbe jba jcꞌoplal jtuque, yuꞌun jaꞌ melel. Yuꞌun jnaꞌ bu lital, bu ta xibat xtoc. Ti voꞌoxuque mu xanaꞌic bu talemun, bu ta xibat.

¹⁵ Ti voꞌoxuque atalelic noꞌox atuquic ti ta xachapanvanique. Yan ti vuꞌune muꞌyuc buchꞌu ta jsaꞌbe smul.

¹⁶ Ti mi ta xichapanvane, ta yutsil coꞌnton. Yuꞌun mu jtucuc noꞌox ti jech ta xichapanvane. Yuꞌun tacbilun talel yuꞌun ti Jtote, jaꞌ ti ta xischiꞌin ta xchapanele.

¹ Li Jesuse ibat ta vits Olivatic. La jchi'incutic batel, vu'uncutic li yajchanc'opuncutique.

² Ta sob yoc'omal libatcutic ta Jerusalén xchi'uc li Jesuse. Tey libatcutic yan velta ta yamaq'uil templo. Ep cristianoetic italic ta stojol li Jesuse, jech lic chotluc, tey lic chanubtasvanuc.

³ Tey italic ec jayibuc li jchanubtasvanejetic ta smantal Dios yalojique xchi'uc jayibuc fariseoetic. Tey yic'ojic tal jun ants. Li antse sbats'il mulivajel la staic. Tey ic'ot yaq'uic ta stojol Jesús ta o'lol li cristianoetique.

⁴ Jech laj yalbeic li Jesuse: ―Jchanubtasvanej, li ants li'i sbats'il mulivajel la jtacutic.

⁵ Li j'alc'op Moisés ta vo'onee yalojbutic mantal ti ac'o ac'batuc ton li boch'o jech ta spase. ¿C'usi chaval ec li vo'ote? ―xutic.

⁶ Ti jech laj yalbeic li Jesuse yu'un tsc'an cha'yic c'uxi ta xtac'ov yu'un tsc'an ta sa'beic smul. Li Jesuse la scujan sba la sts'iba banamil ta sbic'tal sc'ob.

⁷ Ta sventa ti mu xlaj yo'ntonic ta sjaq'uele, jech ichoti lec li Jesuse. Jech laj yal: ―Me oy boch'o mu'yuc smul avu'unique, ja' ba'yuc ac'o yac'be ton li antse ―xut.

⁸ La scujan sba yan velta li Jesuse, la sts'iba noxtoc li banamile.

⁹ C'alal laj ya'yic jech laj yal Jesús li jchapanvanejetique, ep ilo'ilaj yo'nton yu'un smulic. Ta jujuntal xa iloq'uic batel. Ja' ba'yuc iloq'uic batel li boch'otic molic xae. Ja' ts'acal iloq'uic batel li boch'otic queremetic toe. Stuc xa no'ox tey icom li Jesuse xchi'uc li ants ti tey oy ta o'lol cristianoetique.

¹⁰ Li Jesuse ichoti lec yan velta, laj yil ti mu'yuc xa tey oyic li boch'otic laj yiq'uic tal li antse, ja' xa no'ox stuc tey oy li antse. Li Jesuse jech laj yalbe: ―Yaa, li boch'otic laj yalic amule ibatic xa. Mu'yuc boch'o laj yac'bot ton ta scoj ti oy amule ―xut.

¹¹ Itac'ov li antse: ―Mu'yuc, tata ―xi. Li Jesuse jech laj yalbe: ―Ja' jechun ec, mu'yuc ta xcac'bot castigo yu'un li amule. Batan, mu xa me xasa' amul ―x'utat batel.

¹² Li Jesuse ichanubtasvan yan velta, jech laj yal: ―Vu'un luz c'otemun avu'unic, vo'oxuc ti oyoxuc ta ic' osil ta scoj li mulile. Li boch'o ta xtal ta jtojole ta xcom yu'un li mulile. Ja' ta spas li c'usi leque yu'un vu'un ta jtuq'uibtas batel, jech ta xcuxi sbatel osil ―xi.

¹³ Li Jesuse jech i'albat yu'un li fariseoetique: ―Li vo'ote atuc no'ox chaval ac'oplal. Mu'yuc testigo avu'un jech mu jch'uncutic li c'usi chavale ―xutic.

¹⁴ Itac'ov li Jesuse: ―Ac'o me chavalic ti jtuc no'ox ta xcal jc'oplale pero melel li c'usi chcale. Yu'un jna'oj ti bu liquemun tale, jna'oj noxtoc ti bu chibate. Li vo'oxuque mu xana'ic bu liquemun tal, jech mu xana'ic bu chibat noxtoc.

¹⁵ Li vo'oxuque chanopic ti cristianoun no'oxe jech chanopbicun jmul. Li vu'une mu'yuc boch'o ta jnopbe smul.

¹⁶ Me oy boch'o chcalbe ti oy smule, yu'un oy smul o. Yu'un mu jtucuc no'ox chcal ti oy smule. Ja' co'ol chcal jchi'uc li Jtote, ja' ti la stacun tale.

¹ Ti Jesuse ibat ta vits Olivotic.

² Sob ta yocꞌomal isut tal, tey icꞌot noxtoc ta tiꞌ mucꞌta templo ta Jerusalén. Cuncꞌun istsob sba ep jchiꞌilticotic yoꞌ bu ti Jesuse. Ti Jesuse ichoti, lic chanubtasvanuc.

³ Tey icꞌotic jayvoꞌ ti muchꞌutic ta xchanubtasvanic yilel ta smantaltac Rioxe xchiꞌuc jayvoꞌ jfariseoetic. Tey yicꞌojbeic cꞌotel jun ants ti Jesuse. Yuꞌun la xchiꞌuc yajmul itae ti antse. Tey isvaꞌanic ta oꞌlol crixchanoetic yoꞌ bu ti Jesuse.

⁴ ―Jchanubtasvanej, li ants liꞌi xchiꞌuc yajmul itae.

⁵ Ti Moisese yaloj mantal ti chichꞌ milel ta ton ti muchꞌu jaꞌ yech tspase. Li voꞌote, ¿cꞌusi chaval? ―xutic ti Jesuse.

⁶ Ti xꞌelan iyalbeic ti Jesuse, naca noꞌox chaꞌiic cꞌu xꞌelan chtacꞌav yoꞌ stabeic o smul ti yalojique. Ti Jesuse isnijan sba, istsꞌiba balamil ta sniꞌ scꞌob.

⁷ Ti mu xicta sbaic ta sjaqꞌuele, ichoti lec ti Jesuse. ―Mi oy muchꞌu junucal ti chꞌabal smul chaꞌie, jaꞌ baꞌyi acꞌu yacꞌbe ton li antse ―xꞌutatic yuꞌun ti Jesuse.

⁸ Isnijan sba noxtoc, ixchaꞌtsꞌiba balamil.

⁹ Cꞌalal iyaꞌiic ti xꞌelan iyal ti Jesuse, ti jmeltsanejcꞌopetique iyul ta sjolic ti oy smulique, jujuntal iloqꞌuic echꞌel. Jaꞌ baꞌyi iloqꞌuic echꞌel ti más moletique. Stuc xa tey icom ta oꞌlol crixchanoetic ti Jesuse xchiꞌuc ti antse.

¹⁰ Ti Jesuse ichoti lec noxtoc, iyil ti mu xa bu tey ti muchꞌutic yicꞌojic cꞌotel ti antse, ti stuc xa teye. ―Laj xa batuc ti muchꞌutic ay yalbon lamule. Muc muchꞌu layacꞌbe ton ―xut ti antse.

¹¹ ―Chꞌabalaꞌa, totic ―xi. ―Jaꞌ noꞌox yechon uc, muc bu chacacꞌbe castico. Batan, jaꞌ noꞌox ti mu xa me xasaꞌ yan amule ―xut echꞌel ti antse.

¹² Ti Jesuse ichanubtasvan noxtoc, jaꞌ yech lic yal: ―Li voꞌone coꞌol xchiꞌuc aluzicon yaꞌel, voꞌoxuc ti teyoxuc ta icꞌ osil yaꞌel ta scoj li mulile. Ti muchꞌutic chiyichꞌic ta muqꞌue mu xa bu ta saꞌ smulic. Jaꞌ xa tspasic li cꞌusitic leque yuꞌun voꞌon ta jcoltaic. Jaꞌ chcuxiic ta sbatel osil ―xi.

¹³ ―Li voꞌote atuc noꞌox chaval acꞌoplal. Chꞌabal avajrextico yechꞌo ti mu xuꞌ jchꞌunticotic li cꞌusi chavale ―xi ti jfariseoetique.

¹⁴ Itacꞌav ti Jesuse: ―Acꞌu mi jtuc noꞌox chcal jcꞌoplal pero xuꞌ xachꞌunic yuꞌun jnaꞌoj ti bu liquemon tale, jnaꞌoj noxtoc ti bu chibate. Li voꞌoxuque mu xanaꞌic bu liquemon tal. Mu xanaꞌic noxtoc ti bu chibate.

¹⁵ Chanopic ti yech noꞌox crixchanoone yechꞌo ti chasaꞌbecon jmule. Li voꞌone muc muchꞌu ta jsaꞌbe smul.

¹⁶ Mi oy muchꞌu chcalbe ti oy smule, yuꞌun onox oy smul. Mu jtucuc noꞌox chcal ti oy smule; coꞌol chcalticotic xchiꞌuc ti Jtote, yuꞌun jaꞌ listac tal.