3 Mi iŋgo zin mbesooŋo moori kini ma tisala lele mbukuunu ta igarau kar na, bekena tiboboobo la pizin tomtom be timar pa kini kanŋana.
4 Mi zin wal ta ŋgar kizin ipet zen na, ni izzo pizin ta kembei: “Ai, niom wal ta leyom ŋgar biibi som na, niom ta boozomen kamar ruumu tio.
5 Pa kini mi yok baen, ta aŋurpe ma imap kek. Kamar ma kakan mi kiwin.
6 Kezem mbulu tiom kankaanaŋana ma imborene. Naso kombot ambai. Koto zaala ki ŋgar ambaiŋana.”
7 Zin wal ta tipakurkur zitun mi tirepilpiili ŋgar ambaiŋana na, sombe tomtom sa itoombo be ipazal zin, nako tipiri sua sananŋana pini. Mi sombe tayaamba zin wal sananŋan, nako tipekel sua sananŋana kat piti ma kanda miaŋ!
8 Tana zin wal ta tipakurkur zitun mi tirepilpiili ŋgar ambaiŋana na, toombo be pazal zin pepe. Kokena tiur koi pu. Mi tomtom ta le ŋgar ambaiŋana, to pazali. Pa ni ko leleene ambai pa sua ku pazalŋana mi iur leleene pu.
9 Zin wal ta len ŋgar ambaiŋana na, sombe so zin pa sua ambaiŋana, nako tikam len ŋgar pakan ma isala ki. Mi tomtom ndeeŋeŋana ta kembena. Sombe paute i, nako iseeŋge ŋgar kini.
10 Mbulu tau tomototo Yooba mi teleŋleŋ la kalŋaana, ina ŋgar ambaiŋana uunu ŋonoono. Pa sombe tuute kat Anutu ta potomŋana i, inako tarao be tikilaala kat ŋgar iŋgoi ta ambai ma ilip.
11 Ŋgar ambaiŋana ko iseeŋge swom ma molo. Ko ikam ma kom ndaama boozo, mana meete.
12 Tana nu sombe to ŋgar ambaiŋana, nako iuulu u ma biibi. Mi sombe pakurkur itum mi zorzooro, na kozo re u. Pa mbulu ku tana ko ipasaanu.
13 Ŋgar kankaanaŋana, ina kembei moori ta le ŋgar somŋana, mi irao iyaraama itunu som, mi kalŋaana izalla sorok.
