Sua Tutŋana 2:7-21 in Mbula

⁷ Zin wal ta mbulu kizin iŋgeeze men na, ni iuluulu zin ma uraata kizin iurur ŋonoono. Mi zin wal ta tipa pai kizin ma ambai men na, ni iwe kembei siŋgiao pizin.

⁸ Pa ni mataana pizin wal ndeeŋeŋan pa pai kizin. Zin wal ta tiurur lelen pini mi tikiskis mbulu kini na, ni imborro zin ma timbotmbot ambai.

⁹ Tana kam kinkiini pa ŋgar ambaiŋana. Naso mbot mat pa zaala ambaimbaiŋan ta boozomen. Nu ko kilaala mbulu ta indeeŋe men pa Anutu mi tomtom matan, mi kam mbulu raraate men pizin tomtom ta munŋaana men.

¹⁰ Pa ŋgar ambaiŋana ko izeebu. Mi sombe kam kat ŋgar, nako yamaana ambai.

¹¹ Mbulu ki tombot mi takam kat ŋgar muŋgu, inako imboro u ma mbot ambai. Mi sombe nu rao be kilaala ŋgar iŋgoi ta ambai ma ilip, nako iuulu u be mbotmbot molo pa koroŋ boozomen tabe ipasaanu i.

¹² Ŋgar ambaiŋana ko iuulu u be mbotmbot molo pa zaala ta wal sananŋan titoto na. Wal tana tipasansaana zin tomtom pa sua kizin pakamkaamŋana.

¹³ Zin tizem zaala ndeeŋeŋana kek, mi iŋgi titoto zaala ki zugut.

¹⁴ Zin lelen pa mbulu sananŋana ilip. Sombe tikam ŋoobo mbulu pa tomtom sa, ina ikam zin ma menmeen zin biibi.

¹⁵ Tana zaala ŋonoono, zin tizem kek. Mi iŋgi titoto zaala sananŋana.

¹⁶ Ŋgar ambaiŋana ko iuulu u be mbotmbot molo pizin moori zaala lwoono kan. Zin moori ta kembei kwon imbesmbeeze pizin tomooto bekena tiyaaru zin ma tila kizin.

¹⁷ Pa zin moori ta kembei tipizil ndemen pa kusin bizin ta mata popoten kana i kek. Mi sua kizin mbukŋana ta tikam la Anutu mataana na, matan mbelele kek.

¹⁸ Zaala ta isula pa Andewa na, kwoono imbot kat ta ndeete uunu kizin. Tana wal ta so titop la kizin, nako tisula ma tigaaba zin wal meeteŋan ma ziŋan timbotmbot.

¹⁹ Zin wal ta so tila kizin moori ta kembei, na kizin tasa ko imiili mi ito zaala ki mbotŋana mata yaryaaraŋana mini na som. Sombe tila, na timbot pataaŋa.

²⁰ Tana zaala tau wal ambaimbaiŋan titoto na, nu tomini motom iŋgal be pa pa. To zin wal ndeeŋeŋan pa mbulu kizin totomen. Zem pepe.

²¹ Pa zin wal ta len uunu sa isaana som, mi mbulu kizin iŋgeeze men, ta tirao be timbotmbot pa toono ta Yooba ikam pa wal kini na.