4 Mbulu ki ketende malmal mi ketende ibayou kat, ina ambai som. Pa sombe tomtom tipas ketende, inako tumuŋai zin som, mi teseseeze matan. Tamen mbulu ki matanda mburmbur, ina sananŋana ma ilip. Re sombe tomtom toro imbuuru ila ki waene, ko rao mender su kereene uunu? Som!
5 Waende sa isombe ikam ŋoobo mbulu mi iti tuur kat leleene pini, na tamaane pepe. Mbulu ki tozzo katkat sua pizin tomtom mi tapazalzal zin, ina ambai ma ilip.
6 Kom koi, ni irao ikam mbulu ambaimbaiŋan boozomen pu, bekena ipakaamu mi ikam lelem. Mi torom ŋonoono ta iurur kat leleene pu, na ni ko iyaamba katu mi ipazalu.
7 Tomtom ta so ikan kini ma kopoono bok, nako leleene be ikan kini mini som. Koroŋ ambaiŋana kat tomini kembei bigil suruunu, ni ko leleene pa som. Mi tomtom ta so peteli, na irao ipeleele kini sa na som. Kini sananŋana tomini, ni ko leleene pa mi ire kembei kini namutŋana.
8 Tomooto ta so izem ruumu mi wal kini ma timboren, mi ila ma iwwa le sorok, ni kembei man ta izem ŋgini kini raama lutuunu bizin ma timbot, mi irie ma ila lene pa lele pakaana toro.
9 Ŋgere mi koroŋ pakan ta kuzinŋan na, sombe tusuulu kulindi pa, ina ikamam ti ma nindi se mi lelende ambai. Mi torondo bizin ta kembena. Sombe tiuulu iti pa ŋgar ambaimbaiŋan pakan, ina ikam ti ma lelende ambai.
10 Itum torom bizin ziŋan tomom toroono bizin na, pizil ndemem pizin pepe. Mi sombe pataŋana sa indeeŋu mi toŋmatiziŋ ku timbotmbot molo, na la kizin pepe. Koŋuru zin wal ta timbotmbot kolouŋana pu na. Pa zin ko tikam ulaaŋa biibi pu ma tilip pizin toŋmatiziŋ ku ŋonoono.
