11 Tomtom ta so le ŋgar ambaiŋana, nako keteene malmal karau som. Tana tere mbulu kini na, iŋgeeze men. Pa sombe tomtom tikam ŋoobo mbulu pini, na ni irao ikam ŋgar biibi pa na som. Ire kembei koroŋ sorok.
12 Sombe king keteene malmal, ina ikamam ti ma tomototo kembei laion ta kalŋaana izalla be ikan tomtom. Mi kampeŋana ki king, ina kembei tolou ta izzu mi ipalumluumu kini.
13 Wal kankaanaŋan ta tizorzooro na, tipasansaana mbotŋana ki taman bizin. Mi sombe kusindi bizin tinoknok zooroŋana mi tiŋoŋooŋo, inako tikam ma mbotŋana kiti isaana kembei ruumu ta ka kooto sumbunsumbun, mi yaŋ itoptop su ruumu leleene na.
14 Ruumu mi pat, ina matamur ta tamanda ma nanda bizin tikamam piti. Mi sombe towoolo moori ŋonoono ta le ŋgar ambaiŋana, ina kampeŋana biibi ta Yooba ikam piti.
15 Wal maolŋan sombe tikeene, na tizemke zin kat. Mi tomtom ta so ikamam uraata som mi imbomboorene sorok, nako peteli.
16 Tomtom ta so ikamam ŋgar pa itunu be imbot ambai, nako mataana iŋgalŋgal be ito kat zaala ambaiŋana. Mi tomtom ta so irepilpiili zaala ambaiŋana mi itoto som, na ni ko imeete ma ila lene.
