15 Tomtom ta so imbuk sua be imender pa tomtom toro mi ikot mbun kini, nako indeeŋe pataŋana. Tana nu sombe lelem be mbot ambai, na mbuk sua ta kembei pepe!
16 Moori sa, sombe mbulu kini irao pa tomtom lelen, nako ikam zaana biibi. Mi zin wal ta tikamam zaaba pizin tomtom na, tikamam len pat men. Koroŋ toro sa som.
17 Tomtom ta so iurur leleene pa wal kini mi ikampewe zin, na iuluulu itunu. Mi tomtom ta so imuŋaiŋai zin tomtom som, ina ni ipasansaana itunu.
18 Kadoono ta wal sananŋan tikamam pa uraata kizin, ina ŋono somŋana. Mi tomtom ta so iwaswaaza mbulu ndeeŋeŋana, na kadoono tabe ikam i, ina koroŋ ŋonoono.
19 Tomtom ta so ikam kinkiini be ito mbulu ndeeŋeŋana, nako ikam mbotŋana ambaiŋana. Mi zin wal ta tirru zaala pa mbulu sananŋana, nako timetmeete ma tila len.
20 Zin wal ta tikamam ŋgar sananŋana na, Yooba leleene pizin ri sa som kat. Mi zin wal ta tipa pai kizin ma ambai men na, ni leleene pizin ilip.
21 Lelem iwe ru pepe. Wal sananŋan na, Anutu irao ileele zin na som. Zin kola tire kadoono pa mbulu kizin. Mi wal ndeeŋeŋan ziŋan popoŋan kizin na, zin len uunu sa isaana som. Tana pataŋana sa ko irao ikam zin na som.
22 Moori ta so ruŋguunu ambai, mi tamen ipizil ndemeene pa mbulu ambaiŋana, ina kembei aigau ta izuk koroŋ buzaanaŋana.
23 Wal ndeeŋeŋan lelen pa koroŋ ambaimbaiŋan men. Tana kaimer zin ko tindeeŋe kampeŋana ambaiŋana. Mi wal sananŋan na, tiurur matan pa koroŋ sananŋan men. Tana kaimer Anutu kete malmalŋana kini ko ikam kat zin.
24 Tomtom ta, ni mata merereŋana mi irairai koroŋ boozo pizin tomtom. Tamen koroŋ ta imilmiili pini na, boozo ma ilip. Mi tomtom toro, ni mata konŋana, mi ikiskis koroŋ kini ta boozomen. Tamen molo som na, koroŋ kini tana imbiriizi, mi isu ma imbot ŋoobo.
