5 Bɛ̀ yɛ̀ dɛ̀ urikɛ dìì mɔ̀nnì ndi kɛ̀ bɛ̀ kpetí yɛcɑ̀kɛ̀, n yí yɛ̃́ bɛ̀ kɔ̀tɛ kɛ̀ɛ̀ bíɛ́kɛ̀. Tũnnɛnɛ̀ bɛ di yóó bɛ̀ nìntɛmu.
6 Kɛ yɛ̃́ kòò bɛ̀ dèe ntimùmmùntì nti, kɛ bɛ̀ sɔ̀nnɛ titɔ̃̀ntì mɑtì miɛkɛ ò dɔ̀ɔ̀ tì.
7 Kòo kpɑ̀ɑ̀tì tɔ̃nní bɛ̀ɛ yɛ̀, kɛ̀ bɛ̀ɛ kpetínnɛ́ dihɛì kó dibòrì, kɛ̀ bɛ̀ɛ bɛ̀ tũ̀nnɛ kɛ́yɛ̀ Suditɛ̃ɛ̃ tipètì borɛ̀ diyɛ̀rì.
8 Kɛ̀ dɛ kó bɛnìtìbɛ̀ nsɔri timùmmùntì ĩ́nkɛ̀, bɛ̀ mu nyí nduɔ́ kɛ̀ Dɑhɑbuu dekoo bɛ borɛ̀,
9 kɛ́ bɛ̀ nɑ̀kɛ́ kɛ dɔ̀: N yɛ̃́mu kɛ tú ti Yiɛ̀ nKuyie ndi duɔ́ ndi nhɛì. Bɛnìtìbɛ̀ bɛmɔu kèè di kpɛ́í nkɛ̀ kufɔ̃wɑɑ́ nkuù bɛ̀ ɑutɛ́ kɛ̀ bɛ̀ kɔ̃̀ntì ɑu.
10 Ti kèèmu di yɛ̀nní Esibiti kɛ̀ di Yiɛ̀ nKuyie ndɔ̀ɔ̀ dɛ̀, kɛ kèétɛ́ tipèntì kóo dɑ̀mɛ́ɛ̀rì kɛ̀ dɛ̀ kpeí kɛ̀ di sèńtɛ́, kɛ kèè di kùɔmɛ̀ Amɔriibɛ kó bɛkpɑ̀ɑ̀tìbɛ̀ bɛdɛ́ Sionni nɛ̀ Ɔku kukó Suditɛ̃ɛ̃ kó diyɑ́ɑ̀ kɛ bɛ̀ pɔ̀ntɛ.
11 Ti dɛ̀ kèèmu kɛ̀ ti kɔ̃m̀bùɔ̀tì duò, òmɔù tɛ̃́nkɛ í mɔkɛ dikɔ̃m̀bùɔ̀ kɛ bo di bɑɑo. Di Yiɛ̀ nKuyie ndi tũ nkù kuù bɑkɛ́ kɛĩ́nkɛ̀ nɛ̀ kɛtenkɛ̀.
12 N di bɑ́ɑmmu kɛ tú di yú Kuyie nyètìrì kɛ dɔ̀ di yó n dɔɔ̀ mɛsɑ̀ɑ̀ n di dɔ̀ɔ̀ mɛ̀, kɛ́ m bɛnkɛ dɛ kó mɛcɑnnimɛ̀.
13 Dí bɛ́i nweti weti kɛ dɔ̀ di yóó yóu n cicɛ nɛ̀ n yɔ̃ nɛ̀ n yɔ̃fũ̀ɔ̃̀ kɔbɛ nɛ̀ bɛ cɛ̃́ĩ kɔbɛ bɛnitidɑɑbɛ̀ nɛ̀ bɛnitipòbɛ̀.
14 Kɛ̀ dɛ kó bɛnìtìbɛ̀ dɔ̀: Ti bo kúmɛ̀ bo ntɔ̃ũ kɛ̀ fɔ̃́ɔ̃̀ sɑ̀ɑ̀ í ti dɑ́ɑ. Kɛ̀ ti Yiɛ̀ nKuyie nti duɔ́ ndihɛì ti yóó dɑ dɔɔ̀mu mɛsɑ̀ɑ̀.
15 Kɛ̀ Dɑhɑbuu bɛ̀ cũ̀ũnnɛ̀ kuhɔ̃ũ tɛbòtɛ̀. O cĩ́ɛ̃̀tɛ̀ do cómmú dihɛì kó kuduotí ĩ́nkɛ̀ nkɛ.
16 Kòo bɛ̀ nɑ̀kɛ́ kɛ dɔ̀: Kɔtɛnɛ̀ ditɑ̃rì bíɛ́kɛ̀ kɛ́nsɔri kɛ dɔ̀ yɛwe yɛ̀tɑ̃ɑ̃ti. Kɛ̀ bɛ̀ɛ wɛ̃tɛní kɛ̀ di nɛ́ nɑ kɛ́kétɛ́, kɛ̀ di kètɛ́ di yɑ̀ɑ̀ bo bɛ̀ conɛ̀.
17 Kɛ̀ dɛ kó bɛnìtìbɛ̀ dɔ̀: Ntɛ ɑ yóó dɔɔ̀mɛ̀, kɛ̀ tí nɑ kɛ́ dɑ dɔɔ̀ ti yu Kuyie nyètìrì kɛ bɛ́i ntì.
18 Kɛ̀ ti tɑtiní dìì mɔ̀nnì dihɛì ɑ́ núnnɛ́ mupɑ̀ɑ̀konwũɔ̃́ ntɛbòtɛ̀ ɑ ti cũ̀ũ ntɛ̀. Kɑ̀ɑ dèè ɑ́ tíí nhɑ kɔbɛ bɛmɔu ɑ cĩ́ɛ̃̀tɛ̀ miɛkɛ. A cicɛ nɛ̀ ɑ yɔ̃, ɑ yɔ̃fũ̀ɔ̃̀ kɔbɛ nɛ̀ ɑ cĩ́ɛ̃̀tɛ̀ kɔbɛ bɛnitidɑɑbɛ̀ nɛ̀ bɛnitipòbɛ̀.
19 Kɑ̀ɑ cĩ́ɛ̃̀tɛ̀ kou mɔù yɛ̀, kɛ̀ ti ò kùɔ dɛ̀ tu o kó mɛyɛi mmɛ, kɛ̀ ti mɛ nkùɔ òmɔù ɑ cĩ́ɛ̃̀tɛ̀ miɛkɛ dɛ̀ tu tíì kó mɛyɛi.
