31 The varesave uradňika andral e Azija, save sas leskere prijaťeľa, bičhade ke leste a mangle les, hoj te na džal andro teatros.
32 Avke sas, hoj dojekh lendar vriskinelas vareso aver, bo savoredžene sas sar diline a but lendar aňi na džanenas, soske pes zgele.
33 O Židi cirdle avri le nipendar le Alexander a ispidle les anglal. O Alexander kerďa le vasteha, hoj te čhiten a kamľa te prevakerel ko manuša.
34 Ale sar prindžarde, hoj hino Židos, chudle savoredžene vaj duj ori jekhetane te vriskinel: “Bari hiňi e Dijana andral o Efezus!”
35 Sar o foroskero pisaris zaačhaďa le manušen, phenďa: “Muršale andral o Efezus, savore manuša džanen, hoj o foros Efezus ľikerel o chramos la bara Dijanake the ole sentne bareske, so peľa andral o ňebos.
36 Vašoda, hoj pes pre oda na del ňič te phenel, kampel tumenge te zaačhel, hoj te na keren varesavo diliňipen.
37 Bo anďan kade kale manušen a on na vakerenas namištes pre tumari devľi.
38 Te hin le Demeter the olen, save hine leha, vareso pre varekaste, pre oda hin o foroskere sudi the o prokonzula. Ode pre peste mi vakeren avri.
39 A te kamen mek vareso aver, oda pes dela te vakerel akor, sar vičinaha le manušen, hoj pes te zdžal pal o Zakonos.
40 Bo amen šaj den andre vaš e vzbura, so pes ačhiľa adadžives. Bo aňi na džanas sar te phenel avri, so pes ačhiľa.” Pal ola lava rozmukľa le manušen.
