1 Paľis odgeľa o Pavol andral o Ateni a avľa andro foros Korint.
2 Ode arakhľa varesave Židos, o Akvilas, savo sas andral o Pontus a nadočirla avľa peskera romňaha la Priscillaha andral e Talijaňiko. Soduj džene ode avle, bo o Cisaris Klaudius diňa avri oda, hoj savore Židi mušinen te džal het andral o Rim. O Pavol pes pridiňa paš lende,
3 a vašoda, hoj džanelas te kerel o stani avke sar on, bešelas ke lende a kerelas lenca.
4 Vakerelas andre sinagoga sako Šabbat (sombat) a prevakerelas le Židen the le Greken.
5 Sar avle andral e Macedonija o Silas the o Timoteus, o Pavol diňa calo peskero časos pre oda, hoj te vakerel o lav a te svedčinel le Židenge, hoj o Ježiš hino Kristus.
6 Ale sar pro Pavol o Židi džanas a namištes vakerenas pre leste, o Pavol razinďa avri peskere gada le prachostar a phenďa lenge: “Tumaro rat pre tumaro šero! Me som žužo olestar. Akanastar džava ko manuša, save nane Židi.”
7 Odgeľa odarik a geľa andro kher ko Titus Justus, savo lašarelas le Devles. Leskero kher sas igen pašes paš e sinagoga.
8 O Krispus, angluno andral e sinagoga, pačanďiľa le Rajeske caľa peskera famelijaha. A sar šunenas, but aver manuša andro Korint pačanas a denas pes te bolel.
9 O Raj phenďa le Pavloske rači andro viďeňje: “Ma dara tut. Vaker a ma av čhit!
10 Bo me som tuha a ňiko pre tu na thovela o vast, hoj tuke te kerel vareso nalačho, bo hin man andre kada foros but manuša.”
11 A ačhiľa ode berš the šov čhon a sikavelas len le Devleskero lav.
12 Ale sar sas o Gallion guverneris andre Achaja, ušťile o Židi jekhetane pro Pavol a ľigende les pro sudos.
13 Phende: “Kada marel upre le manušen, hoj te lašaren le Devles avke, sar o Zakonos na domukel!”
14 Sar imar o Pavol kamľa te prevakerel, phenďa o Gallion le Židenge: “Židale! Te kerďa vareso nalačho, abo te na doľikerďa amaro Zakonos, šunďomas tumen avri, avke sar kampel.
15 Ale te tumen vesekedinen vaš o lava, vaš o nava the vaš tumaro Zakonos, oda hiňi tumari veca. Bo me na kamav te avel sudcas oleske.”
16 A čhiďa len odarik avri.
17 Akor chudle savore Židi le Sostenes, savo ľidžalas e sinagoga, te marel pre oda than, kaj pes sudzinel. Ale o Gallion pre oda ňič na phenďa.
18 O Pavol ode ačhiľa mek but dživesa a paľis pes rozgeľa le phralenca. Geľa la loďaha andre Sirija a geľa leha e Priscilla the o Akvilas. Andre Kenchrea peske diňa te strihinel o bala, bo diňa ajso lav.
19 Sar avle andro foros Efezus, o Pavol len ode mukľa a geľa korkoro andre sinagoga, kaj vakerelas le Židenca.
20 Sar les mangenas, hoj ode te ačhel buter časos, ov na kamľa.
21 Ale, sar pes lenca rozgeľa, phenďa: “Te kamela o Del, avava pale ke tumende.” Avke geľa la loďaha andral o Efezus.
22 Sar doavľa andro pristavos Cezarea, geľa upre andro Jeruzalem te dikhel e khangeri a odarik geľa andre Antiochija.
23 Sar ode imar ačhiľa varesavo časos, geľa pale dureder pal e Galatsko phuv a paľis pal e Frigija a podhazdelas savore učeňiken andro pačaben.
24 Varesavo Židos andral e Alexandrija, savo pes vičinelas Apollo, avľa andro Efezus. Ov sas murš, savo džanelas te vakerel a sas zoralo andro Devleskero lav.
25 O Apollo sas imar avrisikado le Rajeskere dromeske. Ov sas igen horľivo andro duchos a vakerelas a sikavelas mištes pal o Raj Ježiš, ale prindžarelas ča le Janoskero boľipen.
26 A chudľa bi e dar te vakerel andre sinagoga. Sar les šunde e Priscilla the o Akvilas, ile les ke peste a feder vakerde leske avri le Devleskero drom.
27 Sar o Apollo kamľa te džal andre Achaja, o phrala leske pomožinde oleha, hoj pisinde le učeňikenge andre Achaja, hoj les te prilen. Sar ode avľa, igen pomožinďa olenge, save pačanďile prekal o lačhipen (milosť) le Devleskero.
28 O Apollo zorales phenelas pre goďi le Židenge a anglo manuša sikavelas andro le Devleskero Lav, hoj o Ježiš hin o Mesijašis.
