4 Navong meteiai kistal, Iesu mai mulomal en vali oai. Ka meatin keil onen arkileatei keke vi Iesu keinek.
5 Viso va ven keil vit, “?Litetai keil, mukave? ?Mikur etai mesau?” Avit kesi avit, “Vuo, tovuol varei.”
6 Viteni min keil vit, “Miheson net onami heha en usite matu ten vot. Hemukonek, mihelah tei.” Sakini, keil ason net one. Ka navong alehei, alesi keke asakras veni alah vupon mesau varei.
7 Meatin koa envatien onen Iesu mul ien viteni min Pita vit, “!Asuv keinek!” Navong Pita raengoni keke vi Asuv, musin en eisin omon (veni musin en titi kaliko tanges) ka vut vita en oai.
8 Ka meatin sav keil avalis en vot uva ut. Keil amul aleh net one koa vilelau vasi en mesau. Keil alehei mukok veni armultei soutin ran out ut, vi mita handred tai (100 m) enges.
9 Navong arokol out ut, ales ahang tai ten sakol mukan, ka hati mesau mul ien ral min veret koa.
10 Iesu viteni min keil vit, “Alkur tei mesau koa milahi vamai.”
11 Sakini, Saemon Pita va en vot, ka leh net koa vil en marmari mesau keil houlu. Navong avuli, avotini keke alah mesau handred tai hanumau elu ka teindan etel emun (153). Ka avaseini avi houlu mukok, arrali vastei net one.
12 Iesu viteni min keil vit, “Almai alianian.” Meatin keil onen ametau keke avahisi keke vi isei, veni keil akilea vi Asuv.
13 Sakini, Iesu va ven keil, kur veret, ka sani min keil. Evus, mumoni vatte tas en mesau.
14 Koanik vi avong hatte etel koa Iesu kistal ven meatin keil onen katau en avong koa moul eris ran matien.
15 Navong akanian evus, Iesu vis Saemon Pita vit, “?Saemon, natin Sion, anatin keke envatien onom mul enau muli meatin sav keil ekek?” Pita vit kesi vit, “Asuv, keik kokilea vi anatin keke ek vatuk suval tuak tai.” Iesu viteni mini vit, “Kihengan titi sipsip keil osak.”
16 Hatte elu, Iesu visi vit, “?Saemon, natin Sion, anatin keke envatien onom mul enau?” “Asuv, keik kokilea vi anatin keke ek vatuk suval tuak tai.” Iesu viteni mini vit, “Kilei kat revi sipsip keil osak.”
17 Hatte etel eni, Iesu visi vit, “?Saemon, natin Sion, anatin keke em vat inau suval tumali tai?” Pita longe tisa ka tin mis, veni Iesu visi hatte etel eni vit, “?Anatin keke em vat inau suval tumali tai?” Sakini, vit kesi mini vit, “Asuv, keik kokilea en tounah vasi. Keik kokilea anatin keke ek vatuk suval tuak tai.” Iesu viteni mini vit, “Kihengan sipsip keil osak.
18 Ka anatin eli naviteni minuk keke navong kovi litetai semau, kosak meseinuk ka kokilea kova en out vasi em vati. Ka navong kimatu revi, kitelan hem ka mesav tai hesin enuk ka helamunuk kiha en out koa em hervattei kovaha ien.”
19 Iesu selus mukok keke vahit luvat hemukave Pita hehati lat isen Ahi heka en matien onen. Evus, Iesu viteni mini vit, “Kiles kusil kat nau.”
