19 Can' goc Herodíasna' bgue'ede' Juanṉa' na' goclaže' gote'ne', perw bi goc.
20 Ḻe Herodesen' gwṉezde' Juanṉa' naque' to beṉe' chon da' zej to ḻicha na' to beṉe' yo'o ḻo na' Dios, nachen' Herodesen' bžebe' Juanṉa' na' bi be'e latje bi gone Herodíasen' ḻe'. Na' ḻa'czḻa' bi gwyejni'iteque Herodesen' dan' bšalj Juanṉa', con bebede' bzenague' c̱he'.
21 Perw Herodíasen' beyiljwlaže' nac bene' cate' ben Herodesen' ḻṉi goḻa' ža le', bsiṉi'e xše' da' gwdagüe' len beṉe' gwnabia' c̱he' ca' na' no x̱an soldadw ca' na' nochle beṉe' blao že' distritw Galilean'.
22 Bi' no'ol c̱he Herodíasen' gwyo'obe' bya'abe' gan' gosagüe' xšen' na' beca'a Herodesen' can' bya'aben', ḻez ca' ben' gosagw len ḻe' xšen'. Na' reyna' gože' bi' no'ola': ―Gwṉabe neda' con da' žan c̱hio' na' goṉan'.
23 Na' ḻecze gože'be': ―Diosen' naque' testigw c̱hia' goṉa' le' con da' ṉabdo'nda', ḻa' gašjo yež ca' gan' mbanda' chnabi'a.
24 Na' bechojbe' na' gožbe' xṉa'ben': ―¿Bi ṉabda'ne'? Na' ḻe' gože'be': ―Gwṉab yic̱hj Juan ben' chzoe' beṉe' nis.
25 Na' ḻa' beyo'otebe' gan' chi' reyna' na' gožbe'ne': ―Che'nda' ṉetecṉa'a goṉo' neda' to ḻo' platw yic̱hj Juan ben' chzoa beṉe' nis.
26 Na' ṉe late'ze bi gwyazlaže' reyna' gone' can' gož no'ol güegon' ḻe', perw bac̱hle gwne' lao beṉe' ca' jasa'ac ḻṉin' Diosen' naque' testigw c̱he' gwnežjue'be' bite'teze ṉabebe' ḻe', da'nan' bi bžone' gac dan' gwṉabebe' ḻe'.
27 Nach ḻa' gwseḻa'te reyna' to soldadw na' gože'ne' šjax̱i'e yic̱hj Juanṉa'.
28 Na' gwyej soldadon' ḻo' yo'o ḻižyan' na' jac̱hogue' yen Juanṉa', na' bžie' yic̱hje' to ḻo platw jasanen' bnežjuen' bi' no'ola', na' bi' nga bnežjwben' xṉa'be'.
29 Cate' goseṉeze beṉe' ca' zjanaque' txen len Juanṉa', jasexi'e cuerp c̱hen' cont bosocuaše'ne'.
30 Beyoža' postlw ca' besyežague' len Jesúsen' na' gose'ene' bica' da' ba gosone' na' da' ba bosolo'ede'.
31 Na' Jesúsen' gože'ne': ―Ḻe da, ḻe šo'o ga nac lchojiže' yezi'laže'cho late'. Gwne' ca' ḻe chep chetj chac beṉe', ṉeca chac latje yesagüe'.
32 Nach Jesúsen' len postlw c̱he' ca' gosa'aque' ja'aque' ḻegacze' to ḻo' barcw, ja'aque' ga nac lchojiže'.
33 Perw zan beṉe' besele'ede' gosa'aque' na' besyeyombi'e Jesúsen', na' zan yež beṉe' ca' bosoxoṉjsese' na' byobch besežine' ca Jesúsen'.
34 Na' cate' Jesúsen' bchoje' ḻo' barcon' ble'ede' ba besežag beṉe' zan na' beyaše' beži'ilaže'de' ḻegaque', ḻe nite' ca nita' no xila' be nono de gwyoeba'. Nach gwzolaogüe' bsed blo'ede' ḻegaque'.
35 Cate' ba zoa x̱in, beṉe' ca' zjanaque' ḻe' txen gose'ene': ―Ba zoa x̱in, na' latj gan' zoacho nga naquen latj daš.
36 Na' beseḻa' beṉe' quinga cont šja'aque' ga že' beṉe' do ranšw na' do yež dao' ca' dan' nyec̱hj mbi'i šjasexi'e da' yesagüe', ḻe bibi de yesagüe'.
37 Na' Jesúsen' gože'ne': ―Le'e ḻe güe'e da' yesagüe'. Na' ḻegaque' gose'ene': ―Bi de laxjwto' c̱he c̱hop gayoa ža žin cont šjax̱i'to' da' güe'to' ḻegaque' yesagüe'.
38 Jesúsen' gože'ne': ―¿Gaca' yetextilen' de c̱hele? Ḻe šja'ac ḻe šjaṉa'. Cate' goseṉezde' na' gose'ene': ―De gayo' yetextil na' yec̱hop beḻ ya'a.
39 Nach gože' beṉe' ca' yesebi'e to x̱oṉj güeje' ḻo yixyen'.
40 Na' gosebe' to gayoa güeje' na' yebaḻe' šiyon güeje'.
41 Nach Jesúsen' gwxi'e yetextil ca' gayo' na' beḻ ya'an c̱hope, na' gwṉe'e ḻe'e yaba bi'e yeḻa' chox̱clen c̱he Dios na' bzoxje' yetextilen' bi'en beṉe' ca' zjanaque' ḻe' txen cont goseyisen' len beṉe' ca'. Ḻeze gwdise' beḻ ya'a ca' c̱hop lao yogo'ḻoḻ beṉe' ca'.
