23 Che nu benne' zua nague̱', dxal-la' xenne̱' da nigá.
24 Cá'anqueze gunná Jesús: ―¡Le xene xanne' ca da dxénele! Ca da dxudxíxrele, nen le̱ na' gudxíxrequeze Dios chee̱le, na' gúnnadxe̱' le'e dxénele.
25 Caní gaca na, benne' nape̱' da naca chee̱ xrtizre̱'e, gunézrujdxe̱' chee̱', na' benne' quebe bi nape̱', ca da dauze da nape̱' xecá'ate̱' na.
26 Na' gunnáqueze Jesús: ―Da dxenná bea Dios naca na ca da dxaca gate tu benne' dxaze̱' bínnedu ca' lu xu.
27 Dxásie̱' chizrela, dxase̱' te zra, na' bínnedu caní dxelezría na, ne dxelegula na, ne quegá nézene̱' ájala.
28 Dxaca na caní lawe' da nácaqueze ca da dxun xe̱zr la xu. Nedxu dxebía na xrlegue na, nadxa za dau, na' bzé̱bete̱ dxebía na bínnedu ca' lu dau.
29 Gate ba gulegula xíxredu caní, na' dxechugue̱' na lawe' da ba bzrin zra xequé̱'e̱ na.
30 Cá'anqueze gunná Jesús: ―¿Ájala gutil-la lé̱bedxu da dxenná bea Dios, u che bila dizra' da dxulé'e na cá'adxu da gutil-la lé̱bedxu le̱ na?
31 Naca na ca tu binne mostaza da dxázadxu lu xu. Bínnedu nigá nácadxa cuide' ca da zaj nnita lu xe̱zr la xu.
32 Gate ba gúzadxu na dxegula na, na' dxaca na da zrendxa ca xixre' ca' da zaj naca na ba dagu, na' dxebía zruze na zren, na' dxácate̱ dxelebía bxínnedu ca' zran zrula chee̱ na.
33 Caní bse̱de Jesús benne' ca' xrtizra Dios, na' bchálaje̱' zánete̱ da dxululé'e na caní, cadite̱ guléajni'ine̱'.
