Marcos 3:16-29 in Achi

¹⁶ I qui bi i cablajuj-le: jun, ma Simon, chi xak ma Pédro xbix che rumal i Jesus;

¹⁷ y queb chic: ma Jacóbo, chilam u chaʼ chi ma Wan, chi je racʼal i mam Zebedéo; i Jesus xu ya pi qui bi “Boanérges” chi queʼelok je achiab pacha u chʼawbal jab.

¹⁸ Xak i ma Andres, i ma Felípe, xak i ma Bartolome, i ma Matéo, i ma Tomas, y jun chic ma Jacóbo chi u cʼojol i mam Alféo; xak i ma Tadéo, xak i jun chic ma Simon chi re i partído cananísta,

¹⁹ xak ʼo i ma Júdas Iscarióte chi xoʼon panok xu jach i Jesus piquiʼab i tzel que ʼilawic. (Ile je are i cablajuj apostelab je chatal rumal i Jesus.) I Jesus xtzalij chali cuʼ u tijoxelab ruʼ ja.

²⁰ Are xe uponic, xqui mol tan chic quib i winak ruʼ; ique n-xtijtaj ta chic qui wa cumal.

²¹ I rachalal i Jesus, are xqui ta rason wach ca tijin chu ʼanic, ique xe ʼe chu cʼamic, man quiqui bij i winak xa chʼujernak, quiqui bij.

²² Xak xe upon i je aj tijonel re i ujer ʼatbal tzij; cʼa pa Jerusalen je petnak wi. Ique xqui bij: —I achi-ri ʼo puʼab i cajʼatzil itzel, chi Beelzebu u bi. Ruʼ u choʼab i itzel-le, ca tiqui chi relsaxic itzel tak tew —xqui bij.

²³ Rumal ʼuri, i Jesus xe u siqʼuij ruʼ y xu ya jun tijojbal tzij chique. —I cajʼatzil itzel ¿xataba que resaj i je u takon ire? N-que resaj taj —xu bij i Jesus chique—.

²⁴ Iwetaʼam yix, jun tinimit we quiqui jach quib pa tak tzobajil, y quiqui ʼan chʼoʼoj chiquiwach, n-que najtin taj.

²⁵ Xak queje juban alal, we n-junam ta qui wach, we quiqui jach quib chiquiwach, xak n-que najtin ta ʼuri.

²⁶ Xak queje i itzel cuʼ u takon; we quiqui jach quib chiquiwach, y quiqui ʼan chʼoʼoj chiquiwach, n-que najtin taj, xa que sachic. (Rumal-i, i Satanas, n-que resaj ti u takon ire che jun winak.)

²⁷ Jun, we craj coc pa rachoch jun achi chi lic ʼo u choʼab, cresajbej re ubitak-re, ire n-ca tiqui ta che we nu yutʼum ti rajaw ja nabe. We u yutʼum chic, teʼuri ca tiqui chi relsaxic ubitak-re. (Queje xu bij i Jesus ile, cʼutbal-re chique chi ire tiquinak chic che itzel.)

²⁸ —Chitapeʼ —xu bij i Jesus chique i nimak qui patan—, ʼo u cuytajic i qui mac i winak, wach tak quiqui ʼano, wach tak quiqui bij,

²⁹ xui-ri, we cʼax quiqui bij chirij i u Tewal i Dios, ile lic n-tu cuytajic. Pachin i que ʼanaw ile, lic ʼo ni qui mac chiquij ronojel ʼij sak.

¹⁶ Ekꞌu kibꞌiꞌ waꞌ wa kabꞌlajuj xebꞌuchaꞌo: Simón ri xkoj Pedro che,

¹⁷ Jacobo y ruchaqꞌ Juan (rike e ukꞌajol ri Zebedeo y xkoj ne kibꞌiꞌ “Boanerges”, waꞌ keꞌelawi “E ralkꞌoꞌal ruchꞌawibꞌal jabꞌ”),

¹⁸ Andrés, Felipe, Bartolomé, Mateo, Tomás, Jacobo rukꞌajol ri Alfeo, Tadeo, Simón, ri kabꞌiꞌx che “ri Cananista”,

¹⁹ y Judas aj Iscariot, ri xkꞌayin re ri Jesús.

²⁰ Tekꞌuchiriꞌ, xok ri Jesús chuchiꞌ jun ja y xemolotaj tanchi ukꞌiyal winaq. Y ruma kꞌu riꞌ, ri Jesús kukꞌ rutijoꞌn na utz ta chi ne kewaꞌik.

²¹ Echiriꞌ xkita ri ratz-uchaqꞌ ri Jesús, xekꞌunik y xkaj kakikꞌam bꞌi kukꞌ, ma rike kakibꞌiꞌij xsach runaꞌoj ri Jesús.

²² Noꞌj raj kꞌutunel re ri tzijpixabꞌ, ri e petinaq Jerusalem, xkibꞌiꞌij: «Ri Jesús kꞌo puqꞌabꞌ ri Beelzebú» y «Ruma kꞌu ruchuqꞌabꞌ waꞌ wa kajawal ri itzel uxlabꞌixel, kebꞌeresaj bꞌi itzel uxlabꞌixel» xechaꞌ.

²³ Ekꞌu ri Jesús xebꞌusikꞌij y rukꞌ kꞌambꞌal naꞌoj xubꞌiꞌij chike: «¿Saꞌ nawi we ta ri Satanás karesaj bꞌi ri Satanás chike ri winaq?

²⁴ We ri taqanelabꞌ re juna tinamit kijachom kipa ruma kechꞌoꞌjin chikiwach, riꞌ na ketikiꞌ ta chi utz.

²⁵ Yey we ri ejeqelel pa juna ja kijachom kibꞌ ruma kechꞌoꞌjin chikiwach, riꞌ na ketikiꞌ ta chi utz.

²⁶ Jekꞌulaꞌ, we ta ri Satanás kayaktaj chiribꞌil ribꞌ y utukel kujach upa rutaqanik, riꞌ na kanajtir ta rutaqanik, xa kasach uwach.

²⁷ »Na jinta kꞌu juna eleqꞌom kok pa rocho junoq lik kꞌo uchuqꞌabꞌ yey kareleqꞌaj kꞌu lo rubꞌitaq re pa ja, we na kuyut ta nabꞌe ri rajaw ja. Ma we releqꞌom uyutum chi ri rajaw ja, kꞌa ekꞌuchiriꞌ utz kareleqꞌaj bꞌi ronoje la kꞌo pa ri ja.

²⁸ Paqatzij wi kambꞌiꞌij chiwe: Kꞌo puqꞌabꞌ ri Dios kukuy ronoje taq ri mak ke ri tikawex, rukꞌ ronoje taq ri na utz taj kakibꞌiꞌij, tobꞌ china chirij;

²⁹ noꞌj china ri tzel kachꞌaꞌt chirij ri Santowilaj Ruxlabꞌixel ri Dios, riꞌ na kakuytaj ta kꞌana umak. Ma ri kaꞌanaw waꞌ, kꞌo chi ri qꞌatbꞌal tzij puwiꞌ na jinta utaqexik» xchaꞌ.

¹⁶ Ecꞌu quibiꞌ waꞌ wa cablajuj xebuchaꞌo: Simón ri xcoj Pedro che,

¹⁷ Jacobo y ruchakꞌ Juan (rique e ucꞌajol ri Zebedeo y xcoj ne quibiꞌ “Boanerges”, waꞌ queꞌelawi “E ralcꞌoꞌal ruchꞌawibal jab”),

¹⁸ Andrés, Felipe, Bartolomé, Mateo, Tomás, Jacobo rucꞌajol ri Alfeo, Tadeo, Simón, ri cabiꞌx che “ri Cananista”,

¹⁹ y Judas aj Iscariot, ri xcꞌayin re ri Jesús.

²⁰ Tecꞌuchiriꞌ, xoc ri Jesús chuchiꞌ jun ja y xemolotaj tanchi uqꞌuiyal winak. Y ruma cꞌu riꞌ, ri Jesús cucꞌ rutijoꞌn na utz ta chi ne quewaꞌic.

²¹ Echiriꞌ xquita ri ratz-uchakꞌ ri Jesús, xecꞌunic y xcaj caquicꞌam bi cucꞌ, ma rique caquibiꞌij xsach runaꞌoj ri Jesús.

²² Noꞌj raj cꞌutunel re ri tzijpixab, ri e petinak Jerusalem, xquibiꞌij: «Ri Jesús cꞌo pukꞌab ri Beelzebú» y «Ruma cꞌu ruchukꞌab waꞌ wa cajawal ri itzel uxlabixel, queberesaj bi itzel uxlabixel» xechaꞌ.

²³ Ecꞌu ri Jesús xebusiqꞌuij y rucꞌ cꞌambal naꞌoj xubiꞌij chique: «¿Saꞌ nawi we ta ri Satanás caresaj bi ri Satanás chique ri winak?

²⁴ We ri takanelab re juna tinamit quijachom quipa ruma quechꞌoꞌjin chiquiwach, riꞌ na quetiquiꞌ ta chi utz.

²⁵ Yey we ri ejekelel pa juna ja quijachom quib ruma quechꞌoꞌjin chiquiwach, riꞌ na quetiquiꞌ ta chi utz.

²⁶ Jecꞌulaꞌ, we ta ri Satanás cayactaj chiribil rib y utuquel cujach upa rutakanic, riꞌ na canajtir ta rutakanic, xa casach uwach.

²⁷ »Na jinta cꞌu juna elekꞌom coc pa rocho junok lic cꞌo uchukꞌab yey carelekꞌaj cꞌu lo rubitak re pa ja, we na cuyut ta nabe ri rajaw ja. Ma we relekꞌom uyutum chi ri rajaw ja, cꞌa ecꞌuchiriꞌ utz carelekꞌaj bi ronoje la cꞌo pa ri ja.

²⁸ Pakatzij wi cambiꞌij chiwe: Cꞌo pukꞌab ri Dios cucuy ronoje tak ri mac que ri ticawex, rucꞌ ronoje tak ri na utz taj caquibiꞌij, tob china chirij;

²⁹ noꞌj china ri tzel cachꞌaꞌt chirij ri Santowilaj Ruxlabixel ri Dios, riꞌ na cacuytaj ta cꞌana umac. Ma ri caꞌanaw waꞌ, cꞌo chi ri kꞌatbal tzij puwiꞌ na jinta utakexic» xchaꞌ.