1 Rëb Jesús loj ree xbejnman: ―Zianczi yuꞌ ree ni ruzaalguiiw bejn din güünman dol, per ¡probza na̱j bén ruzaalguiiw zatijb bejn guial güünman dol!
2 Par laaman zagdxeli na̱j guixhii reeman tijb guiaj mulin yëjnman din guzaal reeman laaman loj nijsdoo, luar guzaalguiiwaman tijb bén qui rliladxri naj din güünman dol.
3 ¡Gol gojp cudad! ’Bal xhie tijb ni mal güün tijb lasaꞌl, guneenëman. Abiꞌ bal bayüjnman xgab por ni beenman, beenman perdon.
4 Majsi gajdx volt loj tibdxej güünman xhienin contr lüj, abiꞌ bal guiꞌtaman lojl gajdx volt naman: “Been naj perdon ad züntran zian”, rayal güünl laaman perdon.
5 Dxel rëb ree xi apóstoles Jesús lojman: ―Banee dunujn mazri guialrliladx.
6 Abiꞌ rëb Jesús loj reeman: ―Bal na̱j xguialrliladxidi majsi ziꞌczi na̱j xhaj moxtajs, zileꞌ guiëbidi loj yagroꞌ guin: “Biaꞌxh guie, bisob loj nijsdoo”, zuzooban xtiidxidi.
7 ’Bal tijb lëjt rajp tijb mojs, abiꞌ chi yaguiaad mojs guin biglaꞌx yuj o bigajpix beguiꞌxh ree ya, ¿wen zëjbidi lojx ya: “Guyu, gurej din gawil”?
8 Ad zëjbtidi zian, guiëblidi: “Bachaa xabil, been ni gawan, gudaꞌn. Chi lox gawan guiëꞌ tëën dxel ma zajc gawil guiëꞌ tëël.”
9 Abiꞌ wed niꞌqui quixtëë ad zudëëtidi lojx din cayüjnzix ni rayal güünx.
10 Ziangajc lëjt chi loox güündi gra ni gunabee Dios dxel guiëbidi: “Nayajcan mojs ni ad rüjnt sirv, din baguieenzan ni rayal yaguieenan.”
11 Chi ma cadxin Jesús Jerusalén, gudëdaman guiedx rigaꞌ ree niz Samaria në niz Galilea.
12 Abiꞌ chi cayuman tijb luguiedx dobëz, bigchaagloj chii ree bén rajc guialguijdx la lepra laaman. Per zijt guzuj reeman,
13 rbixdiaj reeman, rëb reeman: ―¡Jesús, Mextr, baya dunujn!
14 Chi baguiaa Jesús laa reeman, rëbaman loj reeman: ―Gol chej loj ree bixhioz din guguiaa reeman lëjt. Abiꞌ laꞌtgaj zë reeman, baya xcuerp reeman guialguijdx ni rajc reeman.
15 Dxel tijbaman chi gogbeeman ma bayajcaman, bayejcaman, rbixdiajman rudëëman quixtëë loj Dios.
16 Abiꞌ bazuxibaman loj Jesús, basajb lojman xt luyuj persi badëëman quixtëë lojman. Abiꞌ najman bén Samaria.
17 Dxel rëb Jesús: ―¿Nid chii na̱j ree bén bayajc ya? ¿Con zagaa reeman?
