2 Zeꞌ brim cyuu dzi. Orzeꞌ zeꞌ bicy nuras preb mi. Dub laa lat nu brim zeꞌ wangow lam gyit. Na despuees, orzeꞌ briib nu ran mi.
3 Orzeꞌ na nuras rab yum: ―Benu ru rishli gaal nac ru iꞌñ Ñgyoozh, orzeꞌ mnii lo de gyitaꞌ ii nu gyac ni gyishtily ―nay.
4 Orzeꞌ Jesuuz nam rab mi nuras: ―Lat de riidz ni Ñgyoozh rniin: “Walab gyishtily ziꞌl gyicy ñi nu cui mbañ mbecy”, rniiñ ―nam.
5 Gazeꞌ nu nuras gua nuy mi tub zeꞌ nu gya. Orzeꞌ nañ tub miiñ ziꞌl blyuuy dela lugaar ni gyishlombecy lom.
6 Orzeꞌ nay: ―Ya̱ gyicya̱ nu gac gyub ic ru dutuub la gyishlombecy ii, nunu grica̱ dela gyel nap nu yuꞌ loñ nir. Ya̱ bi guud ñi ne̱, nunu gac grica̱ ñii ni cyu ziꞌl mbecy nu rlagya̱.
7 Ya̱ grica̱ ndeꞌ nir benu zu tib ru lo̱ nu griib zily ru ya̱ ―nay.
8 Orzeꞌ Jesuuz nam rab mi nuras: ―Gun lat de riidz ni Ñgyoozh rniin: “Briib zily Shuaan ru, biñ nu nac Ñgyoozh nir, nunu se coz nu rlagy ziꞌl mi gyicy ru”, rnii riidz nim ―na Jesuuz.
9 Gazeꞌ nu za nu nuras mi par Jerusaleeng. Orzeꞌ pshup yum zeꞌ nu gya zir ni yuꞌ nu driib zily de mbecy Israeel Ñgyoozh. Orzeꞌ nay rab yu Jesuuz: ―Benu rishli gaal nac ru iꞌñ Ñgyoozh, orzeꞌ bzut yeñ gashtal lo yu la re.
10 Gun lat de riidz ni Ñgyoozh rniiñ: Ñgyoozh cuꞌm riiñ yaa de anc nim nu ña dey ru, nunu wazaan dey nu shiñ gzac ru.
11 Orzeꞌ lagy yaa dey ru, gun orzeꞌ cueꞌ nu gad güii par ni gyiꞌr lo de gyitaꞌ, rniiñ, nay.
12 Orzeꞌ Jesuuz nam rab mi yu: ―Niꞌ ziꞌl rniiñ lat de riidz nim: “Cueꞌ gyicy ru preb Ñgyoozh, Shuaan ru”, rniiñ ―na Jesuuz.
13 Orzeꞌ nuras wangadaꞌ mod nu ñgyicy yu preb Jesuuz. Orzeꞌ bruu chuy lom par la be tiem.
14 Orzeꞌ Jesuuz ya gaꞌm par lo de yu ni Galilea, nunu riib ic zaꞌ la Espiriit Yon ni Ñgyoozh mi. Orzeꞌ brush las riidz ni de coz nu bicy mi dela lugaar nu yuꞌ gaab ga zeꞌ.
15 Orzeꞌ rlyuum nañ de yuꞌ nu rsyaꞌ de mbecy Israeel riidz ni Ñgyoozh de ga la lugaar zeꞌ nu rded mi. Nunu dela mbecy ryabic dey gyel mbecy nim.
16 Orzeꞌ Jesuuz yam Nazaret, gyedz zeꞌ nu guul mi. Na ornu pshuub sab, dzi nu rzu lagy de mbecy Israeel, orzeꞌ bicy mi gal mod nu nil ricy mi. Orzeꞌ guꞌm nañ yuꞌ zeꞌ nu rsyaꞌ dey riidz ni Ñgyoozh. Gazeꞌ nu wes sum nu lab mi riidz ni Ñgyoozh.
17 Orzeꞌ briic dey libr ni Isaías, tub yu nu rnii por cuen ni Ñgyoozh, par nu lab mi. Na ornu pshaal mi looñ, orzeꞌ byap mi zeꞌ nu cañ nu rniiñ:
18 Espiriit Yon ni Ñgyoozh Shuaana̱ riib ic mi ya̱, gun bzum ya̱ nu cha̱ ne̱e̱ de riidz nu sac lo de mbecy zi. Nunu bzuu nez mi ya̱ par nu gyicya̱ nu cueꞌ gyub ic reñaꞌ coz nañ lardoo de mbecy. Nunu bzuu nez mi ya̱ nu gyicya̱ nu zac de mbecy nu wacsac. Nunu bzuu nez mi ya̱ par nu gyicya̱ nu gruu nap de mbecy nu rzac zi nu nac nu shiñ ricy nu de losaꞌy yu.
19 Nunu bzuu nez mi ya̱ nu ne̱e̱ lo dela mbecy nu bi pshuub ñaꞌn nu nap gyicy nu Ñgyoozh dela mbecy, rniiñ, nam.
20 Laab ndeꞌ la. Orzeꞌ Jesuuz ptub mi gyicy zeꞌ. Orzeꞌ byabic mi ñii ni yu nu zu riiñ nañ yuꞌ zeꞌ. Orzeꞌ gusub mi. Orzeꞌ mbi la bgüii de yu nu yuꞌ nañ yuꞌ zeꞌ lom.
21 Orzeꞌ brugyiꞌ rniim. Orzeꞌ nam rab mi dey: ―Lat nu blaba̱ de riidz zeꞌ lo der, orzeꞌ byuꞌ niñ ―nam.
22 Orzeꞌ dela mbecy nap mnii dey nu nac Jesuuz, nunu bet lagy dey de riidz cyit na nu mniim. Orzeꞌ na dey rab dey losaꞌy: ―Zeꞌ, ¿a walab yu ii iꞌñ See? ―na dey.
23 Orzeꞌ na Jesuuz rab mi dey: ―Ya̱ rad lagya̱ nu segur la nii der tub riidz cyit. Riidz zeꞌ, ndeꞌ: “Ru nac ru tub mbecy nu ricy guñaa. Orzeꞌ gyicy yac ru ub ru. Orzeꞌ gal nu bicy ru gyedz Capernaum, niꞌ ziꞌl gyicy ru ledz ru ii”, nii der lo̱.
24 Ya̱ rishli rne̱e̱ lo der nu ni tub la mbecy nu rnii por cuen ni Ñgyoozh, de mbecy ledz yu wagyicy cuen dey yu.
